💞💎ياقوت💎💞 ( مكتملة )

الجزء 39

                                     🌛 رمضان كريم 🌜

                                   💞 💎 ياقوت 💎 💞 
                                          

🌄🌄أصبحنا وأصبح الملك لله 🌄🌄كما العادة فاقت قادات روتينها الصباحي فطرات ومشات هزات شنو تلبس سرحات شعرها قادات وجهها هزات صاكها والبيسي وبعض الاوراق وخرجات ثاني مطمنة ومهنية من ناحية الغداء لي راه كاين تما بقات رافدة الهم غير لداك البيسي لي غاديا تبقا غادية جاية بيه الى سلكاته البارح واش تقدر تسلكه اليوم وغدا وبعده
وقفات تسنات طرونسبور خدا منهم الوقت نصف ساعة طلعات للبيرو ديالها نيشان هاد المرة حلات الباب ودخلات قادات مسائلها خدات بلاصتها فوق البيرو ديالها وجبدات العرض لي وجدات ماشي نهائي ولكن المهم راه خاصه غير شي تواشا ماشي ساهل توجد عرض ف يوم الا الى كنتي محترف ولا عامر تجارب يمكن الياقوتة ديالنا ما عندها حتى وحدة من هادو ولكن عندها موهبة كبيرة وحب للعمل واتقانه بقات كتزيد اش خصها من هنا ومن لهيه وفبالها غير هاد العرض يتقاد ليها مزيان والحاجة الثانية هي تعيط على شروق باش تلقى حل لداك البيسي
فالباب الكبير ديال شركة رمزي توقفات سيارة من نوع مرسيدس اخر ما دارج فالسوق هبط الشيفور حل ليهم البيبان بجوج كل واحد هبط من قنت عثمان من الباب اليسار ومصعب من الباب لي على اليمين لي من جهة باب الشركة يالاه غادي يدخلو مع الباب تسمع صوتها هي لي هبطات من سيارتها بي ام رمات سوارت للسيكيريتي وطارت تابعاهم
غيثة حنقزات عليهم: اوووه الاخوااان رمزي
مصعب ما تسوقش ليها اما عثمان بنفس التبسيمة الجانبية: نتي لي غادي تقوصي علينا غيثة قربات وطبعات قبلتين على وجنتي مصعب هو لي كيمد ليها كل حنك بوحدو: نورااات الشركة بالحضور ديالك
مصعب تم داخل وهو كيهضر بجدية تامة: نتمنى حتى حسااباات هااد الشركة يكونو منورين
مشا وخلاها متبعاه هايمة دايبة وعثمان متبعها بعينيه بنظرة مامفهوماش واش استهزاء واش سخرية واش شفقة الله اعلم عاد قرر يفيقها من قلبتها ومن احلامها الوردية
عثمان طرطق صباعه قدام عينيها مرجعها للواقع: واااقييلة ما فهمتيش المغزى اا حبيبة
قلبات ليه عينيها غيثة هازة كتيفاتها: شنوووو
رجع ليها عثمان شعرها ورا ودنيها: قااليك دي ليه الملفات ديال هاد الشهورة لي ما كانش فيهم مزيانة دبا
مشا مخلي ليها عرض كتافه تبعهم وعاد ضار قال ليها: واا سيري ديهم ليه قبل لا يقلب عليك الدنيا راك عارفاه (غمزها وزاد)
تنهدات ومشات كتقرقب بطالونها دازت فكلشي واخا موالفة تجمع معاهم ولكن غير فاش ما كيكونش كتبغي تعمر الفراغ اما ملي جا صافي دبا غادي تبقا حاضياه غير هو قصدات البيرو ديالها باش تدي ليه المسائل ديالها

نطلو على فاتي لي فاقت اليوم بكري دوشات ولبسات حويجاتها قادات وجهها مزيان وقصدات الدروج كلشي بقا غير كيشوف فهاد الخلقة لي قدامهم فايقة بكري بلا قرايا لا وراشق ليها من الفوق
نورة بابتسامة مادة ليها حنكها: الحبيييبة ديالي فااايقة شنوو شي pique nique
طلقات زينها وطرطقات عينيها: لاا اا حبيبة غاادي نمشي للشركة ديال عموو مصطفى رااجل طاااتي
عبد المالك رغم تطور الزمن الا انه مزال كيقرى الجرائد وكيجيوه حتى للدار: اهااه وعلاش بالسلامة
قادات شعرها بيديها: غادي نمشي نشوف باش ندير سطااج معاهم
خبط عبد المالك دوك الجرائد فوق الطابلة وخنزر فيها: كييفاااش اا لالة تخلي الشركة ديالنا وتمشي لديال عائلة راجل خاالتك
نورة باغياها تمشي تما: احمم عبد الماالك انت عاارف بلي فاتي دارت سطاج قبل فالشركة ديالكم ودارته فالشركة ديال صاحبك خاصها تنوع ماشي تبقا فنفس البلاصة
عبد المالك وقف مخلي ليهم ديك الطبلة بفطورها: ضبرو لراسكم بالحق الله يعميها ليكم نسمع شي حاجة ماهياش
خرج مخليهم كيشوفو فبعضياتهم حتى طلقوها بضحكة بيناتهم ام وبنتها متافقين على خلاها نورة كتقرب لبنتها وتراري بيها وتحزرها باش تاكل تقرب ليها من هنا وتمد ليها من لهيه وطالقة توصياتها
نورة بابتسامة وتحذير وجدية كلشي مخلط: شوفي اا حبيبة هاا نتي وااياك تبقاي تفرفري هو ما عزيزش عليه البنات لي كيطيرو خدمي خدمتك مزيان وباتقان وتقلي اا حبيبة ما عزيزش عليه التفرفير
وقفات فاتي كتقاد حوياجها: صاافي اا مااامي كووني هانية خليني نمشي غادي نتعطل (تحنات طبعات جوج بيسات على خدود نورة وكدير ليها باي باي) يالاه بسلامة حبيبتي
خرجات فاتي من تما غاديا وكتعوج غادي طرطق من شي قنت مخلية نورة فديك الطبلة بوحدها مالقات ما دير ثاني وكما العادة غادي تحررها فيهم مساكن
نورة كتغوت بجهدها: عاااايشة ااا عااايشة الصمك ياا ربي الصمك وااجي لهنا مدي ليا المجلات ديالي
المجلات ديالها راهم غير قدامها بالحق خاصها تحررها عليهم العيشة وصافي