💞💎ياقوت💎💞 ( مكتملة )

الجزء 65

                                   🌛 شمس الغريب 🌜

                                  💞 💎 ياقوت 💎 💞 
                                        

انتهى الزفاف وكل واحد قصد داره أو داره الجديدة خديجة والدراري مشاو مع ح.زينب يباتو معها أما ياقوت وهلال مشاو للفيلا القديمة تما حبهم كان كيبان وكيزيد يكبر وتما قررو يدوزو أول ليلة ليهم أما شروق كانت هي ومصعب فأحسن اوطيل دوزو ما بقي من الليلة غير فالنعاس لأنهم عياو ديال بصح
الضوء بدا كيدخل مع النوافذ حلات عينيها وهي مخشية فالحضن دياله عريان من الفوق ولابس سروال ديال البيجاما من لتحت وهي حتى هي بشورط قصير وديباردور دياله شعرها مغطيها هي وصدره مع تحركات فاق حتى هو وبقاو فحضن بعض ما متيقينش بلي اليوم ولاو لبعضياتهم وراهم ففراش واحد في الحلال
قرب من اذنها هلال هامس بنبرته المبحوحة: صبااااح النوور اا الغزالة ما يصحابش ليا كتفيقي بهاد الحلاوة كيصحاب ليا واش كتكوني زوينة ونتي فايقة
قربات منه بنفس الهمس: علاش شنو كان غايتغير
حط فمه كله على اذنها كيهضر ومنوض عليها المواجيع: كنت فنهار الإعلان على النتائج ديال الشركات المتسابقة نتزوجك ديك الليلة تمشي تباتي فدارك
تخشات فيه حشمانة: هلاااااال
عضها: خليني نعبر راه كنت محروم ندير لي بغيت حتى تعطاني هاد الحق وتحرميني منه نتي
ياقوت بغات تنوض: بلاتي نوض نوجد لينا الفطور
جرها: جلسي ااا بنتي جلسي باقي ما وصلتي لداك السطاج ديال دخلي نيشان للكوزينة غادي نفطرو برا
ياقوت: وخاص نمشيو عند ميمة زنووبة حيت خالتي فاضمة بغات مسكينة تجيب ليا الفطور ديال العروسة تما
جلس مقاد فالسرير ووقفها خاشيها فحضنه: الله يكبر بيها (تكسل) الله يالاه ااا حبيبتي باش يالاه نتحركو نوصلو فالوقت (شاف فيها بطول) اش بان ليك نسافرو مجموعين للسعيدية فهاد الصيف
جلسات بحماس: اوووه كاااملين كاااملين
قلبها تحته بسرعة: اايييه اا لالة كاملين كاملين كاينة دار تما نقولوها حتى لمصعب وشروق ناهدة وعثمان خديجة ونعمان والدراري ونمشيو
خرجات عينيها: والميمة زنوبة وبا الحاج
هلال كيهضر ويدوز بالبوسان: غايمشيو للعمرة مرة أخرى وعلى ما أظن حتى هما غادي يعتامرو مجموعين عائلة شروق وأم مصعب ايوة حنا نمشيو للسعيدية
ياقوت: ما نمشيوش للعمرة حنا
خشا راسه فعنقها: باقي ما درناش الذنوووب (طلق بوسة فعنقها) غير كنضحك بالحق اا حبيبتي غادي نمشيو انشاء الله المرة الماجية انشاء الله
ياقوت طبطبات عليه: علاش ما عمرك قلتي ليا بلي مشيتي حجيتي واعتمرتي
هلال: حجيت واعتمرت للواليدة الله يرحمها باقي نمشي أنا وياك
ياقوت: انشاء الله (وقفات) نوض نلبس حوايجي باش نمشيو (رجعات) فوقاش غادي نمشيو للسعيدية
هلال: يتقادو المسائل للمعتمرين وديك الساعة نشدو الطريق

إلى كان هلال صبر على ياقوت وراعا ليها حيت عياو سي مصعب ما قدرش مسكين وحتى شروق عيات من كلشي إلا من حلوتها دوزو ليلة أو صباح ولا في الأحلام خلاها تحس بلي ما صانتش شرفها غير هكاك بلي خلات راسها هي مرفوع وراس عائلتها مرفوع وجا سي مصعب توجها على المحافظة ديالها حسسها بلي غير هي لي أنثى على وجه الكرة الأرضية وكملها بهدية عبارة على خلخال ذهبي لبسو ليها فرجليها فور انتهاء العلاقة الحميمية وامرها باش عمرها تلبسو من غير إلى كانت هي وياه الراس فالراس أو فبيتهم أما من غير ذلك يقطع رجليها
فاق هو الأول بانت ليه عيانة من ملامحها خلاها ترتاح وخدا الدوش دياله وطلب ليهم الفطور للبيت ديالهم ورجع كيعنكش فيها وهي كتمرمد وسط داك الفراش يحسن عوان لي مسؤولين على غرف النوم مساكن غير بيتهم غايجلسو فيه عامين
بعيون ذابلة: عيييييب عليييك ااا موصعااااب بايتة كنجاهد وفاش جيت ننعس دخلتي الجيوش ديالك فيا وحررتيني ودبا مصبح عليا (ضارت للجهة الثانية) صافي ياك قضينا الغرض وخليني نيني
خرج عينيه من هاد المتحولة لي ربط حياته بها: وااخاا اا لالة الغزالة غير فيقي دبا نفطرو باش نمشيو للدار راه ماماك غاتبغي تجيب الفطور وخاصك تكوني تما
شروق ضارت لعنده وتوسدات ركبته: ما بغيتش غير خليني ننعس
هزها بين يديه ودخلها للدوش حمحمها بيديه وشروق كانت من البنات القلال لي ما كيكونش عندهم شي مشكل كبير من بعد أول علاقة كانت كتحرك عادي واخا كتعgر ولكن غير شوية ماشي بزاف حتى هي لبسات حوايجها وفطرات هي وياه برومانسية ويا سلام ضربات ليك جلابة وكيف جات شروق بالبلدي بينها بعقلها وزادها زين على زين مصعب شوية ويخرج ليه العقل
باقي كتصايب غوج اليفغ حتى طيرها مصعب جرها من خدودها وطبع بوسة حارة على شفايفها خلاها كتوزوز بقات غير كتشوف فيه هذا مالو تهاوش
مصعب جرها معنقها: كتهبلي اا المشاغبة
هزات خنافرها للسماء واخا عاق بيها بلي معجبة من سن المراهقة إلا أنه هادشي ما زادو غير حب فيها حيت ما عمرها جات اعترفت ليه بمشاعرها كانت كدير لي فو كونط وإلى شكر شي وحدة ولا تغزل بيها كتغرق ليه وليها وتدي ليه لي كونط دياله ولا تغزل بيه وتسبو فنفس الوقت ايوة هادي هي شروق يخ منه وعيني فيه ومصعب ما عليه غير يتعايش مع الوضع حيت لي بغا لولو كيخصو يسهر الليل كله
من تما للدار ديال عائلة رمزي لقاو سكينة فاستقبالها بالحليب والتمر وعثمان داير ليهم الطليعة وخالق ليهم الأجواء فرحان حيت حمقة أخرى جاية لعندهم للدار يخربها هو وياها مزيان وحتى هي ضاغي دخلات فالدور وما حساتش بيهم غراب عليها ولا يالاه غادي تعرف عليهم حاسة براسها كأنها بنت العائلة ومزال ما دخلش معها الفراق ديال عائلتها حيت باقي ما قرداتش للأرض