💞💎ياقوت💎💞 ( مكتملة )

الجزء 21

                                     🌛 رمضان كريم 🌜

                                    💞 💎 ياقوت 💎 💞
                                           

فاضمة: ويلي واش خلصوكوم ف 2 شهور متابعين
ياقوت: لا ا خالتي فاضمة هادو ماشي فلوس الوزين اليوم مشيت درت الميناج فواحد الفيلا ومولاتها هي لي عطاتني هاد الفلوس
فاضمة: ايوة الله يعطيها الخير نتي ا بنتي شقاك متول وسكوتيا داكشي باش عجبها الحال بخدمتك ولكن عنداك تشوفهم امك ا بنتي
ياقوت تبسمات بزز ابتسامة صفراء وقالت ليها لا وسولاتها فاضمة علا اش طرا البارح عاودات ليها وهزات مسائلها من بعد ما خلصات با محماد ومشات لدارهم غير حلات الباب تلاقات ليها مينة تقول كانت غير تسناها
مينة: سربي سربي سيري بدلي حوايجك واجي بداي التخمال قادي سيجور هو الأول لا لا البيوت ديال الضيافة هما الأولين وعاد دخلي الكوزينة شوفي اش تصايبي بداكشي لي موجود حتى الغدا ونمشي نتقضا
ياقوت غير كتشوف فيها شكات ف2 حاجات يا جداتها أم باها جايا يا عمة باها هي لي جاية وبجوج بيهم مصيبة كحلة هادي هي الحاجة لي كتافق فيها مع أمها
ياقوت صرطات ريقها: علاش شكون جاي
مينة: لاش كتسولي لاش قضي شغلك ونتي ساكتة
ياقوت: باش نعرف اشنو نوجد
مينة: جايا ديك المصيبة ديال عمة سي ابراهيم(كتعيب فيها) لاااالة زهرة هي وبنتها
ياقوت فخاطرها بنتك ماشي بنتها: واخا انا غادي نقاد غير البيوت حتى الغدا راه غير الأحد ونقاد ليك الباقي
مينة: واش كاينة شي عطلة علاش جايين
ياقوت: اه كاينة عطلة
صدمات أمها بهاد الخبر لي نزل عليها كيف الصاعقة علاش لا وهي غادي تجلس ليها طول العطلة هنا هي وبنتها أطول حوارات كتكون بينات ياقوت ومينة هي فاش كيبغيو يجيو عائلة إبراهيم من بعد ما دخلات البيتها مشات خبات الفلوس هما اللولين عاد حطات شي لآخر ومشات دارت تيلي يتشارجا صيفطات ميساج لشروق وهي تعيط ليها الأخرى فالبلاصة
شروق: الو المصيبة مشيتي ياكما دارو ليك شي حاجة باينة شي شاطا ماطا بحال فاتي
ياقوت: وحدة وحدة أولا السيدة الله يعمرها دار ثانيا انا بغيت نسولك واش حنا عندنا عطلة ولا حتى للسيمانة الأخرى
شروق: لا يا حبيبتي حتى حنا عندنا عطلة وفيها جووح سيمانات حيت من وراهم ديريكت الامتحانات باش يخليو لينا فين نقلبو على سطاج يعني سوميستر4 كلها سطاج
ياقوت: يعني للسيمانة الأولى ضاعت عليا
شروق: علاش يا ختي
ياقوت: حيت عمة إبراهيم جايا
شروق: يا ربي السلامة يا ربي أجي نقوليك علاش ما نبداوش نصبو عليهم بحال شحال هادي واجي نبريباريو
ياقوت: كيفاش
شروق: كي فاس كي مكناس انا نقوليك ا حبي لي عطاني سيدي ربي
ياقوت: لا يا ختي غير خليني ليهم الأمور 
بدلات ياقوت ومشات كلات شوية حيت باقي شبعانة من الغداء خرجات هزات المسائل لي غادي تحتاج ودخلات خملات البيوت لي كانو نقايا اصلا حيت ديما كتنقي واخا عارفة بلي زهرة وخديجة غادي يستخدمو غير واحد لي فيه جوج نوامس كملات ضغيا والوقت باقي عندها مشات للكوزينة جبدات القصرية

                     💞💎💞💎💞💎💞💎💞💎💞
كيف جاكم الحنان ديال مينة على ياقوت هممم ها هي حنات
كل غلاب كيجيب ليه الله غلابه