💞💎ياقوت💎💞 ( مكتملة )

الجزء 44

                                    🌛 رمضان كريم 🌜

                                   💞 💎 ياقوت 💎 💞 
                                          

كيف خرجات من قاعة الاجتماعات برفقة مصعب لي رافقها برا القاعة ومن بعد كلف الكاتبة دياله توصلهم شخصيا حتى للباب رجع ادراجه للقاعة لقاها تلاحت فوق الكرسي وهزات قرعة ديال الماء صغيرة نزلات عليها
اما عثمان بقا غير كيشوف فيها وقرب كرسيه حتى قفزها حيت دفع برجليه بسرعة حيت بالروايض: ااجي كيفااش اا مادموازيل ياقوت ياكما هازة معاك شي حرز
ياقوت ما قشبلات والو اما غيثة جاها على القلب عطات لياقوت التيقار خصوصا وانها كتبان ليها كدير غير خدمتها وعمرها بانت ليها كضور بشي حد فالشركة دايرة عليها العساسة والجواسيس ولكن كتلقاها همها هو الخدمة فقط لكن هادشي ما كيمنعش تغير منها الى شي حد بين مدى اعجابه بيها بجمالها ولا ذكائها وهادشي شافت منه بزاف اليوم
غيثة وقفات: والله الى بصح نيت ما فهمتش انا هادي كانت ديما تبعصص وتنرفز على مليون ولا جوج اليوم السيدة تقول مبنجة
ياقوت وقفات جات تهز الملفات ديالها باش تخرج حتى وقفها صوته
مصعب: ياقوت تقدري تسناي واحد الدقيقة
عثمان وقف فاهم راسه كيدير ليهم بيديه بجوج بالسلامة: ااديووس كابايووس
بقا كيتسنى فغيثة لي لصقات تما بانت ليه ما ناوياش وخايف لا مصعب يصعبها عليها ويقول ليها شي مصيبة داكشي باش مشا وقفها بلباقة كيضحك معاها محاولة منه باش يسهيها
عثمان بابتسامته المعهودة: اش بان ليك نخليو ياقوت يلومها مصعب باينة ارتكبت شي خطا ما شفناهش حنا ونمشيو انا وياك اا الاميرة ديالنا نوجدو العقد ديال 'كيووووت مي'
ضغيا ضحك عليها بدوك جوج كلمات سد الباب الزجاجي وغمز خوه مخليه مع ياقوت لي كتفكر شنو ممكن يكون الخطأ لي ارتكبت
مصعب نظف حلقه وحولات هي عينيها عنده: احممم انسة ياقوت اولا بغيت نشكرك ثانيا بغيت نبارك ليك ثالثا كنتمنى انه التعامل لي درتي مع السيدة ديال اليوم يكون حيت درستي الشخصية ديالها وعرفتي النوع ديالها والا راه ماشي كاع الشركاء كنتعاملو معاهم بهاد الطريقة ما عدا هذا تبارك الله عليك
ياقوت تبسمات ليه معتزة بمدحه ليها: شكرا ليك ولكن انا تصرفت معاها بهداك الاساس حيت اممم (بتفكير) نعطيك مثال عليا انا بحال شي مراية كنعكس الصورة ديال الناس لي كنتعامل معاهم فقط (وقفات بغات تمشي)
مصعب: باقي ليا طلب اخر اا انسة (شافت فيه ياقوت باستفهام) الى قبلتي ترافقيني اليوم لحفل شركة الادريسي الى سمعتي عليه

خرجات من الدار مستفة ولادها بثلاثة قدامها وقفات قدام الباب وقلبات عينيها للمصبنة بان ليها احد العمال ديال راجلها تما عيطات عليه حتى وقف حداها حاني راسه
مينة مخنزرة ما عاجبها حال: شووف اااه غااادي تمشي تجيب ليا طاكسي من الشارع غير طاكسي صغير
شاف فيها وفالدراري: ما غايبغيش اا خالتي مينة يهزكم كلكم رااكم (كيشوف فيها) كثااااار
خرجات فيه عينيها على ديك خالتي وعلى معنى كلامه: اييوة الله يخويك فالظهر انشاء الله دبا غادي تمشي تعيط على الطاكسي اما دوك الشوفات حتى يجي سيدك ابراهيم ونتعاودو الخبار ااا جيفة (طار من تما وهي باقي كتعاير) العمى انشاء الله باغيين طيرونا غير بعينيكم ياا خزيت لا جيران لا عائلة لا خدامة لا ديالي بقا ولا وجهي تنقى يخخ تفو (طلقات الدفلة قدام راجل ومراته)
يالاه غادي يهضرو معاها وقف الطاكسي رفقة الولد ركبات اسامة فالامام ورضا وحسام دخلاتهم ودخلات هي الروايض ديال الطاكسي نقصو من البرد ملي طلعات ومول الطاكسي مسكين كان راجل صغيور وقصيور داير بحال القويلب لي كدير هي يدوي تصرطو من البلاصة المعلومة
مينة هضرات بجهد تقول بعيد عليها بأميال: رااه غير درب النور دوز غير من الزناقي والخلاص بالدوبل gاع لا تخاف
علاه هو قدر يهضر قصد بيها الدرب وفعلا بقا غادي غير بين الزناقي باش ما يطيحش فشي مشكل مع صحاب الوقت حتى وصلها للوجهة لي هي باغيا تمشي ليها نزلات وهبطات ولادها خلصاته هو مشا وهي ضارت كتشوف فالباب
******      ******      ******       ******       ******       ******
بقات كتشوف فيه مبهوطة ومصدومة من الطلب دياله كتفكر كيفاش ترفض بطريقة راقية ما ناقصهاش صداع مع غيثة لي باينة غادي طيح ليهم بالعظام الى عرفاتها مشات معاه والى شروق شافتها معاه غادي تقتلها
ياقوت تبسمات ليه وبدات كتشرح وهي كتحك نيفها بصبعها السبابة: احم الصراحة اا مسيو مصعب انا معروضة اصلا للحفل
خرج عينيه بتعجب: بصااااح وشكون عرضك اا انسة
صغرات فيه عينيها: واحد الصديق ديالي عنده شركة صغيرة وهو من العشرة لي تهز العرض ديالهم وحتى هو اليوم غادي يكون تما وعرض عليا باش نكون معاه والصراحة غادي نرافقو
مصعب حل يديه ووقف بمعنى ماشي مشكل: اذن نقلبو على شخص اخر يرافقنا وحظ موفق للصديق ديالك
حركات راسها بابتسامة: شكرااا ليك اا مسيو مصعب
خرجات مخلياه متبعها بعينيه حتى غابت على عينيه ووقف كيتذكر كلامها وتدخلاتها كيف كانو والاجوبة ديالها وكيفاش كانت غادية الند للند لصاحبة شركة "كيووووت مي"