💞💎ياقوت💎💞 ( مكتملة )

الجزء 61

                                   🌛 شمس الغريب 🌜

                                  💞 💎 ياقوت 💎 💞 
                                        

الطريق كلها وداك الفولون كياكل الدق مسكين باق بربلاق وهي كتعضعض فشفايفها مغددة حيت حتى هي أعصابها احتفظت بهم لنفسها حيت بان ليها ما ناقصوش
حركة فمها كانت مخلياه غايفرفر: شرووووق رصاااي بفمك
ضارت عنده فمها كان كله أحمر غززاته: مااالي شنووو درت
دار شاف فيها وعاود قلب وجهه مركز فالسوقان: أنا لي غادي نبرد فيك غدايدي كاملين بسباب ديك الحركة
جمعات فمها خايفة بان ليها أحمر بالأعصاب وعنقه بحال مgانة ديال الضوء بسباب العروق لي مشنقين بحال الكابليات عاد زاد العرق لي كيتصبب منه بقات مدة وهي ثابتة
شروق: غادي تديني للدار طموبيلتي خليتها فلا كلينيك
مصعب: أنا غادي نوصلك وأصلا غادي عند باباك
خرجات عينيها: لاش بغيتيه
مصعب خنزر فيها: إلى بقيت معول عليك تفاتحيهم فالموضوع تما بقيت وأنا اا لالة ما بقاتش عندي ديك القدرة ديال التحمل
صرطات ريقها: دبا ملي عرفت سبب المشكل غادي نقدر نلقا شي مدخل
حرك راسه بالنفي: لا قلبي لراسك على المخرج دبا أما أنا قاد بشغلي عطيتك 100 فرصة باش تقوليها
مع وصلو هبطات والباب الخلفي قصدات ديال المطبخ لقات ناهدة هي لي مكلفة بالعشاء طيبه ومريم ماماهم كتوجد قهوة حيت عطات للبنات إجازة والدادا ديالهم داتها للمستشفى ترتاح كانت عيانة
تعجبات مريم: هادي مالها
ضحكات ناهدة: بابا قال ليك وجدي قهوة ليه هو موووصعب رااامزي
ناهدة كتلحن ومريم عاطياها للضحك بالتخبية على حالة بناتها لي حتى هما مغرومين وخايفين منها لأنها كانت دائما كالأمهات المغربيات حريصات على بناتهم يترباو بأحسن تربية
جمعات مريم الضحكة بزز: اممم ومالها هي ومال مصعب رمزي
ناهدة تخلعات: ما عرفتش غير قلت حيت هي ديما معاكسة معاه (بغات تسلت) ماما أنا تفكرت بلي خاصني نقاد واحد التمرين ها أنا وجدت كلشي العصير أنا درتو فالثلاجة
مريم حركات ليها راسها ما قادراش دور تشوف فيهم حيت غادي تبقى غير ضحك: وااخاا يالاه سيري
محمد الرايس بيديه ناض حل الباب لمصعب لي حاول قدر المستطاع يخبي ملامح العصبية والتقليقة والحالة لي كان فيها لكن واخا هكاك حاله كان متغير ومحمد قشع التسلل رحب به واستقبله أحسن استقبال فداره
محمد: تفضل اا ولدي مرحبا بيك نورتي اا ولدي مدة هادي ما دخل شي حد من عائلة رمزي لداري من وفاة عبد الله الله يواليه برحمة الله ونعم الصديق والرجل
ضحك مصعب وجلس هو وياه فالصالون والتحقت بهم مريم بالقهوة لي طلب محمد قبل: مرحبا بيك اا ولدي مصعب
بادلها الإبتسامة مصعب كانت كتشبه ليها ناهدة بزاف عكس شروق لي كتشبه لباها: شكرا اا خالتي
بعد السؤال على الحال والأحوال مصعب كان كيصحاب ليه المسألة ساهلة وشروق لي عويوينة لكن صدقات المسألة صعيبة فعلا خصوصا وأنه غير بوحده خاص يقول يفاتحهم فالموضوع
مصعب تبسم: احمم عمي محمد الصراحة ما عرفتش كيفاش نفاتحك فالموضوع ولكن تسنيت شروق حتى عييت ولكن ما قالت والو
ماعرف محمد كيفاش يعاونه باش يهضر حيت مريم خبراته بلي قالت ليها سكينة: خيير اا ولدي ياك لباس ياكما الأمر كيتعلق بالخدمة
مصعب جمع الشجاعة لي كيكساب: لا اا عمي الصراحة أنا ما كرهتش (حل الصدايف ديال الشوميز الفوق) تقبلو بيا لبنتكم شروق
مريم كتبسم لأنه محمد لي شاد فمصعب هو براسه نهار جا يخطبها كان متوثر أكثر من مصعب دبا: مرحباا اا ولدي (بغات تريحه) أنا راه كنت نيت عند سكينة اليوم الحمد لله راه بخير ولمحات ليا لشي حاجة هاكا
صدماته: حممم الحمد لله
مريم عرفات راسها دوخاته: الغلط ماشي ديالك اا ولدي راه ديالها هي لي ما قالت والو لينا باش نستقبلوك استقبال يليق بيك اا ولدي
مصعب عاد رجعات فيه الروح: الله اا ودي نتوما كلكم خير
مريم بغات تخرجه من الكهربة لي تكهرب: سكينة من نهار عرفتها وهي كدير أي خطوة فالوقت المناسب وحتى مرضها تغلبت عليه فالوقت المناسب وقالت ليا عليكم فالوقت المزيان
وقف مصعب ساد لا فيست: سمحو ليا على هاد الدخلة (وقف كل من محمد ومريم) انشاء الله تولي الواليدة شوية ونديرو الأصول
محمد ربت على كتفه بعيون براقة ذكره بصديقه: جلس اا ولدي تعشى معنا
مريم بتأكيد: ااه بقا معانا اا ولدي مرحبا بيك
مصعب حنى راسه احتراما ليهم: مرة أخرى انشاء الله
ودعهم وهما خلفه كيشوفو الدنيا صغيرة وقدرة رب العالمين كبيرة وإذا قال كن يكون هو القادر على كل شيء النسبة بين العائلتين ما كتابتش فسنوات مضت حتى الآن عاد اكتابت
                        
نعمان كان فدارهم مع أمه كريمة والجدين دياله وخواتاته مجموعين على حساء بالخضر مع تقيوتات وبريريد ديال اتاي ومجمعين عليه بالحديث وباين بلي الجد هو ونعمان ما كيتفاهموش ولكن إلى حققتي فيهم مزيان كيبان ليك واحد الحب كبير كيكنوه لبعضياتهم وحتى واحد ما باغي يهبط خنافره للأرض ويعتارف للثاني
الجدة عتيقة بفرحة: هيييه ياا مولاي الحسن ها بنات كريمة ما شاء الله الخطاب عند الباب
مولاي الحسن هز حاجب باين عليه مدوز الخير: شكووون هذا أنا بغيت بنات كريمة يتزوجو زواج تقليدي ما بغيتهم يجيبو ما جابت أمهم خاصهم رجالة ديال القلب
مع كمل جملته رما من يديه نعمان ديك الملعقة ورجع اللور ما عاجبه حال" واذكروا امواتكم بخير رجوووع الله اا مولاي الحسن هادشي وحاج وكضل وتصبح تقرى فكتاب الله زعما هاد الآية عمرك شفتيها
خواتاته حبسو الضحكة كيبقى الأب ديالهم كما بغا يكون واخا كان قمار إلا أنه كان كيبغي ولاده وكيتهلى فيهم ولكن البلية بلية
كريمة: لا اا با راه السيدة جارتنا هي لي بغاتها لولدها (بعد تردد) الكوميسير نوح (جمعات فمها حيت باها جنه وجن البوليس كيموت منهم خافت لا يعكس ليهم والولد ما فيه ما يتعاب)
فعلا يالاه كان ناوي يرفض حتى نقز نعمان أخته هضرات معاه قبل وحتى الأم وكان باين عليهم باغيين هاد ولد الناس وحتى هو قلب عليه بحكم ما معاهمش فنفس المدينة وما لقا عليه غير الخير
نعمان: باقي عاقل اا الحاج نهار جبتيني صغير حطيتيني قدامك وقلتي ليا خواتاتك انت لي غادي تكلف بيهم الحاصول أنا نوح قلبت عليه وهضرت معاه وراه الله يعمرها دار وهو لي يليق لأختي (شافها لقاها حشمانة)
كريمة بعد تردد كبير: ولوخرى اا با ومي وحتى انت اا نعمان (غمزاته حيت هو خواتاته كيقولو ليه كلشي قبل الكل) راه واحد الطبيب معها فالكلية بغا يجي يتقدم ليها
مولاي الحسن عينيه غرغرو: ايييه اا بنتي اا كريمة تعقلي فاش جبتي وليداتك
تحنات باست ليه يديه: ااه اا بااا قلتي ليا إلى صبرت وكافحت نكون أحسن من ألف راجل وراجل
مولاي الحسن: اييوة هاا نتي اا بنتي بناتك غادي يخويو علينا الدار وغادي تناسبي غير مع شكون وشكون ودوك خوتك وخواتاتك لي ما حنو فيك ما عطفو عليك غادي يندمو
عتيقة: ربي وخر ليك الخير لبناتك اا بنتي تبارك الله قراو وخدمو وها هما غادي يتزوجو بخيرة الرجال انشاء الله يبقى غير نعمان
نقز نعمان بحال الرعدة: لا حتى هو ما بقاش انشاء الله غادي نتقدم لواحد بنت الناس
كريمة بفرحة: وهداااك هو النهار الكبير اا ولدي انت غير شير بيديك
عقد حواجبه مولاي الحسن: يكون زواجه إلى كان غادي يبقى فالدار ما يخرجش منها
عارفين بلي نعمان شاداه فالدار غير أمه اما هو داره مفرشة مجهزة بكلشي من زمان وهو كان دافع فيها الكريدي ملي يالاه خدم فوقما عصبو جده ولا جداه كيبغي يهز أمه وخواتاته ويزيد كيتراجع ملي كيبانو ليه الجدين دياله حالتهم حالة فيهم غير السناطح
نعمان جمع حواجبه ورجع يشرب حساءه: لا ما تليقش تبقى معاكم فالدار
عتيقة خنزرات: علاه مالها بالسلامة اش تكون
حط الملعقة وشاف فيها: باقي كتقرى مزال صغيرة يالاه عندها الباك وباقي باغيا تكمل باقي خاصها شوية التربية من عندي ومزال خاصها تربية خاصة شي حوايج كديرهم حتى حد ما يقبلهم فداره داكشي علاش ما غايقبل عليها غير دارها
كريمة ما سوقهاش هي المهم ولدها فكر فالزواج وبغا يستقل أما عتيقة ما عاجبها حال باغيا هي تختار لولد بنتها على يديها وهو لي معروف فالدريبة وضل تفوح بيه على صحاباتها ويحكو ليها الناس فالحمام على جاله ساعة جابها حبل وبونت أما الجد ما باغيش نعمان يخرج داير ليهم الهيبة على الدار ومعروف بطبعه الحاد وحنيته رغم الغلاف ديال القسوة باش مغشي
هبة اخت نعمان: شوف اا خويا اش بان ليك يخلي ليك با الحسن الدار لي الوسط وتبقاو معمرين عليهم
حنان اخته الثانية: ااه والله إلى
نعمان بحدة شاف فخواتاته: لاا اا لالة إلى بغا جدي أنا راه ما نبغي حد يجي يشوف فيا شي شوفة ناقصة (كيمعني على خواله وخالاته) عندي داري نمشي لخربتي
خبط الجد على الطبلة: الدار ديالي وما سوووق حد فيا وأصلا أنا من نهار جيتو كنت نقول بلي ديك الطبقة راه ديال نعمان حيت صلحتي ليا الدار لي كانت غادي تريب عليا بفلوسك وهما لي ولادي كيجيو غير يشوفو واش قربت نموت باش يقسمو هاد القروش لي عندي ودبا والله لا خرجتي من الدار غير إلى خرجتيني مكفن
عتيقة: وأصلا باااك اا نعمان كتب ليك الطبقة لي الوسط من يوم صلحتي الدار وتكلفتي بمصاريفها
شاف فجده: حيييت راااجل وحيت هداااك واجبي درتو أما الدار لي كتب ليا ما بغيتهاش غادي تجيب ليا غير الصداع معاهم
عاود خبط الجد: كتبتها وعاود زممتها وموت إلى بغيتي تموت بالفقصة (وقف مخليهم باينة عليه معصب) ايييوة تصبحو على خير
هبة طلقات ضحكة وتبعاتها حنان وجداتهم كتغوت عليهم مقلقة كيصحاب ليها كيضحكو على جدهم الله يقلل حياااكم ااا اللفعات
كريمة وااخاا اا الممسوخات راه نوض نريشكم واخا تخطبتو يصحاب ليكم قطعت الواد ونشفو رجليكم
هبة والله الى ضحكني با مع نعمان كيحماقو على بعض وتخراج العينين
حنان با غير بان ليه نعمان باغي يخرج كان غادي يخرج ليت العقل
عتيقة تعصبات وهذا حال الناس الكبار الله يخرج ل باباك العقل ااا الهبيلة قالك بغاها طبيب باينة ديال الحماق اا بلحمقة