💞💎ياقوت💎💞 ( مكتملة )

الجزء 41

                                    🌛 رمضان كريم 🌜

                                   💞 💎 ياقوت 💎 💞 
                                          

فالدروج كتسمع صوت الصداع بحال كل مرة ديال خوتها وزايد عليهم دبا صوت باها لي باينة معرعر عليهم كما العادة قربات من الباب حلاته لقاته فوجهها كيلبس حذائه يستعد للخروج دفعها حتى كانت غادي تجي على قزيبتها وخرج خلاها كتشد التوازن ودردب مع الدروج بحال البرق سمعات صوت مينة كتبكي وتنوح لداخل تنهدات ودخلات
مينة باقي غير كتبكي وتشير ولادها كيطلو من الكولوار مخبيين ولكن ياقوت شافتهم هزات حذاءها بين يديها وبقات غير كتشوف كتحاول تعرف شنو وقع بالضبط
مينة غير كتغوت: علاش غييير اناااا لي كيوقع ليا هاادشي ياا سيدي يا يربي علااااش اا شنو ذنبي ااناا اااش ياا ربي علاش انا لي يوقع ليا هادشي ااااع هءءهءههء
ياقوت مشات من قدامها حتى وقفاتها مينة بصوتها: وقفي ااا مجبد البلا وقفي (ناضت كتعتر فجلايلها فاتجاه ياقوت لي وقفات ثابتة) نتي السبب اا المصيبة نتي سبابي فعذااابي نتي سيييري ل بييتك سيييري غبري عليا تفرقي عليا الله يفرق لحمك على عظمك
انهارت قبل ما توصل لعند ياقوت هاد الأخيرة لي مشات وخلاتها عارفة بلي الى قربات منها غادي دفعها ولا تبدا تخبط فيها وحاليا هي ما مستعدة تهرس البيسي ديال الخدمة لي ما بقات عرفات مصيرها باقي معاهم وما قادراش حتى تخسر ليها الملامح ديالها بشي دقة ولا ضربة من عندها وتخرج على راسها وسطاج ديالها مشات للبيت ديالها وسدات عليها وهي فكرة كتديها لاخرى ومينة  برا كتبكي وتشكي وتنوح
مع الاسف شحال من مرة حنا كنكونو دايرين خطأ وملي كيدور علينا كنقلبو فشكون نلصقو داك المشكل ونرجعوه هو السبب باش نرضيو نفوسنا وغرورنا مشكل كيبدا صغير مع مرور الوقت كيكبر وفوق ما كيكون فوق من طاقتنا كنبردو الغدة فشي حد اخر يمكن هادشي لي وقع ل ياقوت مع عائلتها ولكن شنو هو الخطا لي وقع ومسبيينو فيها
******       ******       ******       ******       ******       ******
إبراهيم مشا للوجهة الدائمة ديالو كما العادة شنو هي الوجهة الله اعلم ولكن المسافة ما بعيداش بزاف بين البيت دياله وهاد الوجهة وصل لاقامات ماشي واو ولكن زوينين بناء جديد فمجمع سكني انيق وبسيط برطمات كاين لي متكونين من جوج بيوت صالون كويزين وحمام مع طواليط وسيجور وجوج بالكونات وكاين برطمات لي فيهم ثلاثة ديال البيوت وصالون كويزين طواليط وحمام سيجور وثلاثة ديال لي بالكون مع المصعد هو توجه لهاد البرطمات الثانيين لي فيهم ثلاثة ديال البيوت توجه للطابق الثالث والاخير ولي كل طابق فيه ثلاث بيوت رقم البيت لي كيحل فيها هو 8
دخل رما السوارت فوق السداري ديال السيجور لي جا على الدخلة وتلاح فوق من السداري خشا يديه فجيب ديال جاكيط جبد تيلي كيقلب على النمرة لي باغي حتى لقاها ودوزها بلا ما يراعي لا للوقت ولا لحتى شي حاجة
ابراهيم بنبرة امرة وتساؤل: االو فينك نتي دبا
السيدة لي كيهضر معاها كيتسمع حداها صوت بيبي كيبكي: ااناا فالداار اا ابراهيم ااش بغيتي
ابراهيم مجرد سمع صوتها حس براسه ارتاح: واااش ماا تقدريش تجي لعندي ااناا فالدار غير حداك
السيدة بعصبية: ابراهيم رااجلي فالدااار وزاايدون فاش غادي نبغي نجي انا غادي نجي وغادي نعلمك قبل
ابراهيم شوية ويبكي تحلفي عليه ماشي هو لي كيضل يخبط فمينة: محتاااجك ااا حبيبة وزايدون هاداك المصيبة راه خدام الليل هاد السيمانة باينة ما كاينش
قلبات عينيها مبتاسمة فرحانة براسها: يمشي الراجل ونشوف ديك الساعة