🌛 رمضان كريم 🌜
💞 💎 ياقوت 💎 💞
مشات ياقوت دخلات نيشان لبيت لجلاس لي مقابل للكوزينة لقات فاضمة جالسة ووليداتها ضايرين بيها طارت عليها تعانقو والولاد طارو عليها تا هما يديرو حقهم كانت فاضمة و 2 ولاد توأم كيقراو فالباك الحسن والحوسين ولي من وراهم ولد كيقرا فالكاطريام ياسين وبنت هي صغيرة عندها السادس سميتها تيتريت(ولكن كلشي كيقول ليها نجمة لي هي المعنى ديال سميتها)
تيتريت: توحشتك بزااف ا ياقوت
ياقوت: كون تشوفو انا ايوة ا لكاسولين كلكم عندكم امتحانات ومغيبين يومين
ياسين: وا غير سكتي مي دارت لينا تما كتر من هنا قرينا قراية سيمانة
ياقوت:كيف بقا عمك بعدا ا خالتي فاضمة
فاضمة كتكب ليها اتاي وكحزات ليها طاجين بالبيض والخليع: وا مسكين توادعنا معاه قاليك نجيو حنا وولادنا حيت هو ما كانش كيولد
ياقوت: ايوة الله يرحمو ا خالتي وشكرا بزاف على الأمانة لي خليتي ليا عند با محماد
فاضمة: تستاهلي الجنة بنعايمها ا بنتي الله يرضي عليك
ياقوت شافت فالدراري: خاصني نقاد معاكم شي بروgرام ا شباب
حسن: شوفي ا ختي ياقوت حنا راه كنخدمو ولي معرفنالهاش هانتي فالدمة وياسين حتى هو ايلا معرفش شي حاجة حنا نوريوه وتيتريت كذلك ومثال
بقات كتشوف فيه بلا ماترمش ياه واش هي طلبات بزاف حتى هي كانت بغات هاكا تكون عائلتها ولكن للأسف من ديما عائلة با محماد كتبان ليها عائلة زينة مثالية لا تخلو من بعض النزاعات ولكن ماكتزيدهم غير حب وقرب عكس عائلتها هي تمنات فخاطرها ربي يحفظهم من كل عين سواء ديال الشر ولا ديال المحبة ودعاتهم وخرجات من بعد ماعطاتها فاضمة خبزة ديال الدار ودارت ليها مريقة باللحم والبرقوق واللوز فطاسة باش تعشا بين ياقوت وعائلة با محماد علاقة زينة الحي كلو كيشهد بيها فاش كتمشي فاضمة للبلاد ويبقاو ولادها ياقوت كتكلف بيهم من aحتىz وكطيب ليهم وتقابل ليهم الدار وتصبن وتنقيهم وملي يكون غير با محماد كتجي غير مرة مرة ضور بالدار
محماد فالحانوت: ياقوت ا فين غاديا سالتة أجي هاكي هاكي باش دوزي عشاك(مشات عندو مبتاسمة مد ليها كانيط ديال مونادا حيت ديما كيعطيوها العشاء وشي مرات كتغدا معاهم)
ياقوت: الله يعطيك الخير ا با محماد(ومشات)
💎💞💎💞💎💞💎💞💎💞💎💞💎
الله يكثر بحال عائلة با محماد ف بلادنا
YOU ARE READING
💞💎ياقوت💎💞 ( مكتملة )
Romanceالسلام عليكم ورحمة الله وبركاته البنات لباس عليكم أولا وقبل كل شيء 🌛🌛رمضان مبارك كريم يدخل عليكم بالصحة والسلامة انشاء الله والثوبة والمغفرة يا رب🌜🌜 رجعت ليكم من بعد قصة 🌹بيان النصر🌹 لي عشنا فيها مجموعين أحداث شيقة مثيرة وواقعية قصة لي تعرفت ف...
