💞💎ياقوت💎💞 ( مكتملة )

الجزء 15

                                   🌛 رمضان كريم 🌜

                                 💞 💎 ياقوت 💎 💞
                                       

اما ياقوت دخلات البيت لي كيحبس الأنفاس كان من البيوت ديال الزمن الجميل بالgرونة والgولد والبيج بيت قدو قد دارهم فيه حمام كبير بجاكوزي دريسينغ كبير تقول ماgازا وبيرو فقلب البيت عاد جليسة بنفس الستيل ديال الفراش والبالكون كيطل على الجردة الخلفية لي ما شافتهاش وملي شافتها تصدمات كانت عالم آخر هاد الناس عندهم فيرمة وسط فيلا اييه فالجردة الخلفية وبعيدة بامتار كان اسطبل ديال الخيل وبانو ليها حيوانات متعددة
ياقوت جمعات رأسها أخيرا خافت لا تعطل ورحمة وراتها بزاف ديال البيوت حيت هي ما كانتش فالحوار لي دار بين الحاجة و ياقوت داكشي باش صحاب ليها جات تنظف البيوت بدأت ليها ببيت الحاجة والحاج لي حمق ياقوت بقات كتنفض وتنقي الغبرة البيت اصلا نقي غير هي نفضاتو مزيان يعني بان الفرق عاد توجهات للبيوت لاخرين واحد بواحد
أما الحاجة من بعد ما مشا الحاج يونس يصلي الظهر فالمسجد جماعة هي طلعات توضى فبيتها مع دخلات بان ليها الفرق ولكن ما دات ما جابت حتى دخلات الحمام لقاتو كيضوي ومجموع والبنات ما كيقادوهش ليها هاكا ليوم لقاتو كيف كتبغي حيت مولفة كتقادو و تنقيه رأسها باش تهنا كملات الوضوء وصلات وياقوت حتى هي توضات فداك البيت لي كانت كتقاد فيه ولي هو البيت الأخير وبيت خالة فاتي نيت كملاتو هو لي كان مغبر بزاف حيت ما كيدخلوش ليه بزاف كملات ولبسات جلابتها وجات هابطة وصلات لتحت وبقات واقفة ما عرفات فين تمشي حتى بانت ليها مساعدة أخرى ومشات باش تسولها
ياقوت: عفاك ا ختي انا ساليت شغلي الفوق وما عرفت فين نمشي
المساعدة2 بابتسامة:واخا أجي معايا
سبقتها المساعدة وهي تبعاتها من الوراء
أما عند الحاجة مشات عند البنات للمطبخ ديال القصر لي كان بحال شي مطبخ ديال شي مطعم كبير كان كبير بزاف ومجهز بآخر ماكاين بآلات المطابخ
ح.زينب: ا لبنات زعما تبارك الله على لي جمعات البيت والحمام اليوم
لبنات كلهم تبسمو فرحانين لهادي لي غاتكون دارتها وكيتسناو البطلة ديال الحمام لي داير ليهم العقدة كيتنافسو على شكون تخلي الحاجة فرحانة وهي لي ديما مفرحاهم
رحمة: الحاجة راه البنت لي جات هي بدأت بالبيت ديالك
ضارت عندها بالزربة: كيفاش ا رحمة بدأت بالبيت ديالي
رحمة: اه ا لالة انا قلت ليها تبدأ بيه هو اللول عاد دوز للبيوت الآخرين

                      💞💎💞💎💞💎💞💎💞💎💞💎💞
ايوة كيف جاتكم زنوبة واش غاتكون ردة فعلها