💞💎ياقوت💎💞 ( مكتملة )

الجزء 49

                                    🌛 شمس الغريب  🌜

                                   💞 💎 ياقوت 💎 💞 
                                          

فاقت ياقوت كما العادة بكري لقات فالبيت حمام توضات وخرجات صلات صلاتها ومشات لدوك الصيكان جبدات منهم اش تلبس وهزات صاك صغير جمعات فيه اش تحتاج حلات الباب وخرجات من البيت هبطات لتحت وفالدرجة الاخيرة تصدمات بان ليها هلال كيرتل القرآن بصوت شجي الظاهر انه يالاه صلى الفجر وجلس يقرا القرآن وديك القطة كدور جنبه تما فالصالون
بقات مترددة شنو دير حتى بان ليها سد المصحف ودار شاف فيها: نتمنى تكوني رتاحيتي
حركات راسها بابتسامة: شكرا اا مسيو الإدريسي انا غادي نمشي للشركة وغادي نقلب على الكرا معايا
صغر فيها عينيه: انا غادي نقلب ليك على الكرا غير ارتاحي نتي بنتي ليا ما عندكش تجربة كبيرة فالموضوع
حشمات وتحنات كتلعب فراس ديك القطة عاد وقفات ناوية تخرج وقفها صوته: غاتمشي بلا فطور
زاد حشمها: احمم الصراحة أنا ما كنفطرش فالصباح
خرجات هاربة منه وهي كدور هادشي لي كيطرا ماشي مزيان ليها واش هي بوضاعتها مع شخص مرموق فالبلاد اش غادي يتقال عليها الشيء لي كانت متجنباه حياتها كاملة غادي يتقال عليها ف ليلة شدات طاكسي وللخدمة توجهات مخلية امورها لله عز وجل وفبالها غادي تعيط على شروق تفكها وتعاونها تقلب على الكرا فشي بلاصة مامنة وبثمن مزيان
******      ******      ******       ******       ******       ******   
شيماء فاقت اليوم قبل الوقت لي مولفة تفيق فيه بشي ساعة واخا الحوايج لي باغيا تلبس كانت ختارتهم من البارح لباست وتقادات وخرجات باغيا تمشي قبل الوقت للشركة وداكشي لي كان وصلات vاليدات لا كارط ديالها واتاجهات للطابق لي فيه القسم لي غادي تشتاغل فيه من هنا للقدام دخلات للقاعة لي كانو فيها بزاف ديال الاشخاص بنات وولاد مراقبين حواسيب ودي كاسك على ريوسهم منقاطعين على العالم الخارجي منهم لي كيهضر ومنهم لي كيبقش فداك الحاسوب بانت ليها بلاصة خاوية بين بنت وولد شابين جميلين تقدمات حتى للبلاصة الخاصة بيها وجلسات مبتاسمة ل لي هزو فيها راسهم
البنت: ختي واش نتي جديدة معانا
حركات ليها شيماء راسها بابتسامة: ااه اا حبيبة
البنت بابتسامة لطيفة: الى حتاجيتي شي حاجة مرحبا
حركات ليها راسها: شووكرا اا حبيبة ربي يخليك ولكن انا راه كنعرف كلشي ماشي أول تجربة ليا
قلبات عينيها للحاسوب وهزات السماعة ملي تيلي لي فالبوسط ديالها صونا: وي مجموعة شركة الادريسي مرحبا (- -) ااه داكو غانا جاية دبا
وقفات خارجة من تما مخلية كلشي متبع ليها العين واثقة فراسها والثقة ديالها كتبان غير من المشية والابتسامة لي كتوزع عليهم كاملين كأنها المديرة عليهم

كيف وصل وقت الغدا وقفات بسرعة لي ماشي من عوايدها خارجة من بعد ما علمات الريسالي لي عطاها الإذن متعجب من حالها لي جاه مغير خرجات من الشركة طايرة لقات شروق واقفة كتسنى فيها فالباب ركبات فاللوطو معاها
قربات منها مادة ليها حنكها تسالمو: من صبيح ربي وأنا كنتسنى فوقيتة الغداء باش نشوفك شوشتيني
جرات الصمطة دارتها: وحتى انا بغيت نقول ليك راني هازة حمل يا ختي غير سيري لشي بلاصة
ديمارات: انا راني شريت لي صوندويش قبل ما نجي عندك نمشيو غير لبلاصتنا ياك (حركات ليها راسها ياقوت بالموافقة)
وصلو لواحد البلاصة جات كطل على واحد الواد وقفات شروق مدات يديها جبدات جوج ديال لي طاكوس مع الفريت وكانيطات ديال كوكا مدات ليها ديالها وبداو كيكلو ويهضرو حديث ومغزل باش يرجعو فالوقت
ياقوت غرغرو عينيها: جرات عليا ماما من الدار البارح
طاح ليها شروق كلشي من يديها مصدومة ما بقاتش قادرة حتى تمضغ: اويلي على اللفعة (زادت خرجات عينيها) اويلي فين بتي البارح ااا ختي اويلي علاش ما عيطتيش عليا
ياقوت بقات كدير ليها بيديها تهدني: صاافي دبا غير سمعي انا براسي ما عرفتش اش طرا ليا البارح راه - - - هادشي لي وقع
تلاحت عليها شروق معنقاها كتبكي وتنخصص وياقوت كتصبر فيها باش تسكت حتى قرب ليهم الوقت باش يرجعو عاد ناضو ما بقاوش كملو ديك الماكلة نهائيا وحلات ليهم فحلقهم
ياقوت: دبا انا كنقلب على الكرا اا ختي وخايفة حيت غادي نسكن بوحدي
دوراتها فراسها: اااش باان ليك نسكن انا ويااك همم
خرجات ياقوت عينيها: ديماري اا ختي ديماري وسيري تلعبي مع قرانك اويلي على تسكني معايا نتي واقيلة راه هبلتي
شروق حركات راسها: المهم غادي نبقا نجي نبات معاك مرة مرة وما ديريش فبالك اا حبيبتي غادي يندمو نهار يشوفوك بدارك وبطموبيلتك وبخدمتك وغادي يعرفوك مثقفة وقارية وشهوة منك
تبسمات ياقوت وهي كتخايل فراسها: ربي يسهل الامور ما صبرتش هاد المدة كاملة على ديك المعاملة غير هكاك
رددات شروق بهمس: امين
وصلاتها تاني منين هزاتها حطاتها فالباب ديال الشركة وهي مشات للشركة ديالهم والدموع فعينيها بقات فيها صاحبتها وهازة معاها دقتها بقات فيها صاحبتها بزاف ولكن ما باليد حيلة حتى واحد ما كيختار عائلته وحتى حد ما كيختار ولاده
طلعات للبيرو ديالها ومع الدورة ديال الكولوار تصاطحات معاها قد قد بقاو بجوج كيشوفو فبعضياتهم وحدة بنظرات عادية والثانية بنظرات شرانية السبب ماشي شي حاجة مع الاسف لكن القلوب ماشي صافية
******     ******     ******      ******      ******      ******     **
جالس خدام فدوك الملفات بلا ملل ولا كلل وديك القطة كدور حداه حاط ليها الماكلة ملي كمل احد الملفات طلع فالدروج وقصد واحد البيت لي مع كيحلو كيتحلو جراح الماضي بقا كيشوف مدة فالبيت لي باقي كما هو كيتنظف وكيرجع كما كان من عشرين سنة قبل ل دبا قرب من السرير ودوز يديه على الفراش عينيه غرغرو ومشا للشرفة لي فالبيت فيها جوج ديال الكراسي متقابلين واحد محطوط فيه كاب فبلاستيكة مسدود جبدو من الصاشي كيستنشق عبقه وجلس فوق الكرسي كيشوف قدامه وكيتلمس فداك الشال حتى كيحس بشي حاجة كتمحكك على رجليه هبط عينيه لقاها ديك القطيطة هي لي كتمخشش وتمحكك عليه