🌛 شمس الغريب 🌜
💞 💎 ياقوت 💎 💞
وقفات السيارة ديالها قدامهم كانت غادي تصفيها ليهم كتعرفهم حق المعرفة شافتهم كاملين ما مرة ما جوج ملي كانت كتوصل ياقوت عاد زيد دارت البحث عليهم وعرفاتهم مزيان هبطات وخلات الباب محلول وناهدة بقات غير مبلقة ما فاهمة والو هبطات حتى هي سدات الباب لي من جهتها وسدات جهة أختها
عاد فاقت شروق من سهوتها وخزرات فناهدة: شوفي هزي داكشي وطلعي لعندها أنا جاية
ناهدة بهمس كتشوف فيهم وخايفة: ولكن اا شرووق شكون
قاطعاتها شروق بتخنزيرة: راني دويت يالاه سيري قلت ليك
حلات ناهدة الكوفر والباب الخلفي هزات داكشي لي جابو واخا ثقيل عليها وتمات غادية أصلا عارفة العنوان ديال ياقوت من ديما وهي كتسول وأخيرا كمل ليها الرجاء وجات واخا فهاد النهار المنحوس طلعات وهي كل مرة دور تشوف فداك المجمع حتى ما بقاوش كيبانو ليها دازت على الكونسييرج لي غير كيشوف عاقل غير على مينة ونرجس لي كانت جات واحد نهار هي وشيماء سولو
خزرات فيهم شروق وباين أنها مستعدة للقتال بحال شي قطة شرسة: ياااك شي باس ما كاين كاين ما نقضييو
من ديما إبراهيم كيشوف غير العيالات لي إلى حمر فيهم عينيه كيلبدوها وهاد ميترو لاروب خرجات فيه عينيها: نتي لي ياك لباس كنتي غادي تقتلينا وزايداها بالغوااات وتخراج العينين
ضربات الكابو ديال اللوطو حتى تزعزعو كلهم: حيييييت (دورات صبعها عليهم) كوووولكم مووتكم أحسن من حياتكم تريكة الويل
هز يديه عليها إبراهيم كيهلل: اااا شكون نتي يا هاد المسلووتة لي جاية تهزي علينا وتحطي هنا
قربات ليه وجهها: يالاه هز يديك ضرب يا شماتة ضرب حادق غير فالعيالات ااا شماتة وضعافات بالحق أنا راه ماشي أي وحدة أنا لي غادي تخرج فيك طول وعرض وارتفاع
قربات مينة: شكون نتي اا بنتي همم شكون ومالك معانا
طلقاتها شروق بضحكة استهزاء عالية: هاهاهاهاهاها والله إلى ضحكتيني (جمعات الضحكة وتكلمات بحرقة) لوكان كنتي أم مغربية حرة لوكان عرفتيني شكون أنا سمعتي كون كنتي أم (قلبات عينيها بانت ليها شيماء) أهلا شعالة العوافي ارتاحيتي ايوة نتمنى تكوني ارتاحيتي بالحق أنا غادي نوريكم (شافت نرجس) نتي غير ودعي ديك الخدمة (عاود شافت فشيماء) ااه ونتي نسيت نقول ليك مبروك الطرد من الخدمة ااا الكبيدة (انتابهات ل إدريس) وأنت اا شبه الرجال لاش جاااي حتى انت وااا ربيو بناااتكم ربيييوهم (بانت ليها فاطمة وبناتها) نتوما ما عرفتكمش ولكن ملي جيتو مع هادو راه باينة طينتكم
فاطمة تقدمات هازة يديها: ااا مااالكي من صباح ونتي كتفشي علينا وتنفخي ياك لباس اش وصلك لينا واش وصلنا ليك اا قليلة العفة
هزات صبعها السبابة: جوج كلمات هما ماشي ثلاثة يا غادي تجمعو قشاوشكم وتزيدو خلفة يا غادي نعيط على لي يجي يجمعكم
إدريس وقف قدامها: عيطي على من ما بغيتي حق أختي غادي ناخدو من هنا وما غادي حتى ناخدو
شدات صاكها قدامها شروق وجبدات تيلي دوزات نمرة وبعدات وهي كتعض على شفايفها وكتمنى يجي الرد: الو هاا الو شووف نطلبك طليبة حنا دبا نقدرو نقولو ولينا أصدقاء (زربات عليه) وااش ممكن إلى كنتي كتعرف شي حد فالبوليس أنا متأكدة كتعرفو تصيفطو ليا لهاد العنوان الله يخليك الله يخليك
وقف مصعب مفزوع حرمات عليه رياضته: ياك لباس واقعة ليك شي حاجة فينك نتي دبا
ضارت خنزرات فيهم: مزال ما وقعات ولكن غادي توقع إلى تعطلو البوليس أنا ف ******
جمع حواجبه: هذا عنوان ياقوت الراضي
حركات راسها باه كأنه كيشوفها: ااه هذا هو هو العنوان ديالها
قطع من بعد ما قال ليها أنا جاي وهي رجعات بخطوات موزونة وابتسامة شر على وجهها وواقفة ليهم أمام باب العمارة وحتى من الناس تجمعو تما الشيء لي خلاها تستدرجهم وتبدا تجبد منهم الهضرة باش دير عليهم الشهود
أنت تقرأ
💞💎ياقوت💎💞 ( مكتملة )
Romanceالسلام عليكم ورحمة الله وبركاته البنات لباس عليكم أولا وقبل كل شيء 🌛🌛رمضان مبارك كريم يدخل عليكم بالصحة والسلامة انشاء الله والثوبة والمغفرة يا رب🌜🌜 رجعت ليكم من بعد قصة 🌹بيان النصر🌹 لي عشنا فيها مجموعين أحداث شيقة مثيرة وواقعية قصة لي تعرفت ف...
