💞💎ياقوت💎💞 ( مكتملة )

الجزء 45

                                    🌛 رمضان كريم 🌜

                                   💞 💎 ياقوت 💎 💞 
                                          

تعصبات والعصبية بانت عليها بقات غير مخنزرة وكتشوف فيه ما دار حتى شي ردة فعل حتى بان ليها غادي اتجاه الدروج وهي طير تابعاه حتى وصلو للغرفة ديالهم مع حلها ضرباته الريحة ديال النقاوة بدا كيحل ازرار الشوميز دياله حتى لاحها فالارض تبعاته هزاتها ووقفات قدامه قبل لا يدخل للحمام حطات يديها الباردين على صدره العاري حتى حسات بالتبوريشة دياله يالاه غادي يطير عليها حبساته مبعدة ماشي هذا هو الهدف ديالها
عائشة مبعدة عليه معصبة: هااادشي مااشي معقووول اا مووصطفى (بقات كتبعكك حتى ولات هكاك بالطبيعة)
هز يديه كيبعد الخصلات لي بداو كيحجبو عليه رؤية ملامحها مزيان: شنو لي معقول اا مادام عائشة
خرجات عائشة عينيها: كيفاااش اشنو هااد السؤال راه باينة على اشمن معقول كنهضر راه ولدك اا مصطفى ولدك خااص يحتارمك انت باه وانا راني فمقام ماماه ما كيحتارمناش حتى قد هااكاا (كتوريه بين صباعها)
قرب منها مصطفى وجرها للحضن دياله: تهدني نتي عارفة بلي قال غير الحقيقة واصلا غير كيقول انا كنبقى الاب دياله
عائشة تغددات ومشات تجبد من الفاليز لي طلعو المساعدات باش تاخد الكسوى لي شرات وجابت خصيصا باش تحضر لهاد المناسبة لبساتها وقادات ماكياجها وخدات زينتها الكاملة وجلسات كتسنى فيه حتى لبس حوايجه وهي مخنزرة فيه على هاد السكوت دياله كل مرة لولده لي كيخرج فيه وفيها طولا وعرضا
******       ******       ******       ******       ******       ****** 
اما فالقاعة ديال الاوطيل كانت شروق هي وياقوت شادين قنت لابسين لي بادج ديال الشركة ديال الاب ديالها محمد واقفين وشادين النميمة فعباد الله كيبانو بحال الاميرات متبتات ومرزنات
شروق كتلعب فالكاس ديال العصير: يااا ختي شووفي القاعة كييف داايرة يا ختي زوينة وحتى الاوطيل غزال
ياقوت تبسمات ليها: اييوة يا ختي الفلوس ماشي بعيد يكون ديال عائلة الادريسي
ميقات فيها شروق: لاا لا وااش من نيتك هااداا راه ديال بنييس يااا ختي ولكن كيتعاملو معاهم هما (خسرات ملامحها) شووفي ياا ختي شووفي داااك المدير ديالك المغرور داخل هو وديك قطيب الخيزراان دياله
قلبات عينيها ياقوت للدخلة ديال الباب بانو ليها كل من مصعب وغيثة لي فرحتها ما تعطيها لحد خاشية يديها فدراعه مبتاسمة وفرحانة تقول غدا العيد وكدور تشوف فالناس وتضحك بحال الهبيلة تقول لقات درهم خصوصا ملي قشعاتهم زيرات عليه
شروق ميتة بالضحك: شوية وتبوسو من فمه تقوول غير هي لي مصاحبة مع واحد لباس عليه وكيتفلى عليها
خزرات فيها ياقوت: شروووق يهدييك الله ااش داارو ليك بعدي من الناس
شروق قلبات عينيها من عليهم ماففة: بففف ياا ختي لوكان غير جاا هااد الحبس يقول لينا دوك جوج كلمات يخليني نمشي

نبعدو من جو الحفلات ونمشيو فين خلينا مينة ناشرة رجليها ملي تعاشات العشية دخلات بنتها "اسراء" مقضية كما العادة بياسات معاها من القصارية كتوجد وتوجد وشي ما وجداتو فاللخر
اسراء بابتسامة زنقاوية: خوييلتي عندنا وانا كنقول ماال الدار مضوية يا ختي
فاطمة مبتاسمة فرحانة ببنتها: زيدي اا كبيدتي زيدي اا حبيبتي وجيبي طااس ديال القهوة نكب ليك ما حدها باقي سخونة
اسراء مبتاسمة: صبري هاا حفصة طاالعة ونشرب انا وياها (شافت ف مينة) كييف داايرة اا كبيدتي وكيف داير سي ابراهيم والدراري كلشي بخير
مينة كطبطب على ظهر اسراء مفتاخرة بيها: ربي يخليك ااا الحبيبة ديالي الله يسهل عليك اا بنتي فين حفصة
مع دكراتها دخلات كتنفخ وتصوط غير بوحدها هازة ولدها لي مفركساه ومزيزاه وهي كذلك ولكن باينة عليها العصبية غير هي وجنونها لي جا قدامها تصوط فيه فهاد اللحظة
فاطمة خنزرات فور ما بانت ليها بنتها مقلقة: ااا ماالكي يا ختي جايا بعجااجتك يااكما داك جرتيلة ديال راجلك ثاني
خبطات ولدها مع السداري لي جالس مكالمي كيلعب بلعبته ما على بالوش: اانااا ا مي عيييت عييت اا عباااد الله وااش لي خدمها كيخسرها على امه وخواتاته فينما نقول ليه انا خاصاني شي حاجة يخرج ليا جيابه بحال ودنين الكلب ويهز يديه للسماء ويسبق ليا لي بين رجليه
مدات ليها امها الصبع: ايييوة هااكي فين تشدي نهااار كنت نقول ليك راه ماجاتش بالكلام الحلو قبل الزواج وبتلميسة من هنا تخويرة من لهيه باركة عليا الحب والخرا ايوة طلعيه معاك دبا ياك كنت نقول ليك دبا يطوال ويعجبك
مينة كتهدن فاختها لي بانت ليها تعصبات: تهدني يا ختي يا بردي ياه ماالها دبا فهمي من البنت ونتي نايضة تغوتي
تنطرات فاطمة معصبة: قيليني ااا مينة ختي قيليني ***** لوخرى نهار قلت ليها خودي شاف ديالك فالباتيسري هي تابعة ليا هاد السلوكي ايوة دبا تجي تبكي عليا (بدات كتعوج وتعيب فحفصة) اااا حقااا شاارف عليا ااا حقااا مااا كنبغيهش (خرجات فيها عينيها) ايييوة خودي لي كتبغيه بالليل يضل هاز ليك رجليك وبنهار يهز ليك يديه
تعصبات وحمارت وهما كيبردو فيها ومينة كتشوف فهاد الحوارات لي عمرها تقدر تعيشهم مع بناتها وتختار معاهم النساب تعصبات ثاني جات تنسى عند ختها صدقات غير منوضة على راسها المواجيع
حفصة وقفات ناوية تهز ولدها: نووض بحاالي ااناا
مينة هزات راسها فيها: صبري يجي ابراهيم ونوصلوك معانا الليل هذاا
حفصة ميقات فيها: لاا لا ا ختي نمشي بحالي
خبطات فاطمة السربيتة: جلسي يا البرهووشة جلسي حتى يوصلوك معاهم لا تمشي يزرق مووك من شي قنت على الديعان بعدا يعرفك غير مع خاالتك

وقف اللوطو دياله لي كانت من نوع داسيا جددة عائلية كلاكصونا عليها بعد ثلث ساعة بانو ليه ولاده كيتجاراو حلو الباب وطلعو تستفو اللور كيسلمو عليه وهي حلات الباب وطلعات ما شافش حتى فيها
يالاه بغا ابراهيم يديماري: وليتي تخرجي بلا شوار اا بنت الحراااام
حبساته بابتسامة صفرة ما باغياش تعيق حيت هما فالزنقة: بلاتي اا سي ابراهيم نوصلو معانا حفصة
مع كملات قلب عينيه للباب لي تحل من طرفها باقي معصبة طلعات وخبطات الباب حتى السلام نسات تقولها ليه هو لي هز حاجب مخنزر عاد نقذات مينة الموقف قبل لا يقلبهم تما ولا يسمعهم ليها
مينة بابتسامة كتغطي بيها: احمم ما تديش عليها اا سي ابراهيم راه غير مقلقة مع راجلها وصاافي نسات ما تقول السلام
ما جاوبهاش ديمارا وزاد وصلها نزلات وخبطات الباب وهو كمل بيهم للدار كينقر: ااااش هااد قلة الترابي اا لالة ماا طلعش فطوموبيلتي gاااع
مينة كتحاول غير تكالميه: ااا سي ابراهيم البنت معصبة غير هي وجنابها
فرانا قدام الباب ديال الدار ديالهم ودار جرها من شعرها: يصحااب ليك نسيت لدين مووك الخروج من وراايا ااا ****** دبا هبطي **** عليا ومنين نجي نتفاهمو مزيااااان على الديعان بلا خباري من هادي لهزان الرجلين رااه عمر الشطاح ما كينسى هزة الكتف
هبطات مصدومة حلات الباب ديال الدار حتى طلعو وليداتها لي كانو هبطو قبل من الحوار لي دار بيناتهم يربحو دوك الدقائق امام الباب طلعات حتى بان ليه الضوء ديال السيجور عاد تحرك من تما
******       ******       ******       ******       ******       ******
حفصة كيف وصلات قدام الاقامة دخلات وللطبقة الاولى توجهات حلات الباب ودخلات كان حاط بريريد ديال اتاي قدامه مع مكسرات فالسيجور دارهم كانت صغيرة ومتيولة مكونة من صالون سيجور جوج بيوت حمام طواليط كوزينة مفرشة مزيان ومجموعة 
حطات ولدها لي طار لعند باه كيضحك كان كيشبه ليه وهي طيرات جلابتها بقات بدوني وبيرميدة دياله طلقات شعرها وخلخلاته بيديها عاد توجهات للبيت ديالهم مخنزرة علقات جلابة وهي كتسمع فولدها ميت بالضحك طلات على الكوزينة بان ليها الطاجين طايب والخبز ملوي فسربيتة دياله تبسمات جنب وخرجات مغوبشة
راجلها غير بانت ليه نقص صوت تيvي وحط ولده فوق الزربية وتقاد فالجلسة: كيفاااش اا حفصة اشمن بلان ثاني هذا
قلبات عينيها: شنوو ثاني عمروك وصيفطوك تفركع عليا
عقد حواجبه مغوبش وبدا كيهز فيديه: وااش من نيتك وااش نتي تضلي داايعة وهما يخدمو ويشقاو عليك
هزات عليه حفصة صبعها: اولا نزززل يديك ثاانيا اا سيدي ماا قلتش لييهم يشقااو عليا هووما لي كيتدخلو فلي ماا ليهم