🌛 شمس الغريب 🌜
💞 💎 ياقوت 💎 💞
جات خارجة من المكتب ديالها المشترك مع الريسالي تلاقات بهلال فالكولوار حتى هو خارج من المكتب دياله الظاهر أنه حتى هو صافي غادي يغادر أول مرة يخرج بكري هادشي شغل تفكيرها فين غادي يكون غادي بقات كتلعن شيطانها واش شغلها فيه إلا أنه تفكيرها كيقول ليها لا راه خاصك تعرفي لكن عقلها كيعاود يقول ليها ماشي سوقك اا لالة
تعمد أنه يسبقها باش ما يبقاش يشوف فيها ويعبرها من اللور ولا يشوف فيها بالغلط وحتى هي فهماته لكن المصعد ما فهمهومش وتعطل باش يوصل حتى وصلات هي عليه وملي تحل طلع وبقات كدور فعينيها واش تطلع ولا لا زعمات فاللخر ملي بانت ليها واحد الموظفة طلعات عاد تقدمات وأخيرا لكن توسعو عينيها ملي بانت ليها ضغطات غير على الزر ديال الطبقة لي كاينة مباشرة قبل الأخيرة لي هما فيها يعني غادي تبقى هي وياه حتى لتحت غير هبطات الموظفة لصقات ياقوت فواحد القنت مخلية ليه الباقي
بغا هلال يكسر داك الصمت: كنظن شفتي التلخيص ديال الإجتماع لي كنتي متألقة فيه
غير هضر ليها على الخدمة تنفست الصعداء: الصراحة التلخيص لي دارت الكاتبة ديالك تلخيص ديال المحترفين ما نسات حتى شي نقطة من النقط لي تطرقو ليها جل المصممين ولا حتى الشركاء كان تلخيص متكامل الصراحة استافدت منه بزاف وغادي ينفعني
تبسم هلال وبلا ما يدور جهتها: مزيان التلخيص ديالي التلاخيص ديال الإجتماعات كنديرهم بيدي باش كنعرف اش كنوطي
خرجات عينيها ياقوت وحطات يديها على فمها: فعلا راه تلخيص بقيت كنعاود فيه أكثر من مرة وكل مرة كنزيد نفهم حاجة
تحل باب المصعد ودعاته وخرج ثاني هو قبل منها بحال قبل باش ما يبقاش يعبر فيها بعينيه أحسن ليه وليها وداكشي لي كان خرجات حتى هي وشدات طاكسي نيشان لواحد السويقة تقضات شحال من حاجة خاصاها فالكوزينة من مواد غذائية وخضر وفواكه وبعض الأواني الضرورية ومشات نيشان للدار ديالها من بعد ما اتصلات بشروق عارضاها قالك للعشاء
*** *** *** *** *** *** *** *** *** *** *** ***
أما هلال نيشان قصد المنزل ديالهم لقا عائشة ثاني باغيا غير معامن ومصطفى كيحاول ياخد بخاطرها حيت هادشي لي ممكن يدير ليها ما يقدرش يواجه هلال حتى بالضحك أما ح.زينب جالسة كتميق فيهم و ح.يونس كيشرب القهيوة دياله ما مركزش معاهم
عائشة بعصبية: أنا مليت اااا مووصطفى بزااااف وااش غاادي نبقااا فالدااار أنا راني ما ولفتش
الحاجة لي بيد مصطفى هي يكالمي الأوضاع: عااائشة صاافي تكالمااي سيري للجمعيات مع نورة اختك
عينيها وعروقتها عائشة خرجو: والله إلى أنت حمق وكلكم حماق كيفااااش اانااا عائشة لي كان يتضرب بيها المثل نولي جالسة فالدار
مع ديك الهضرة دخل هلال: شكون لي حمق هنا فالدار كتبان ليا حمقة وحدة لي فالدار وها هي قدامي (هز سبابته أمام وجهها) ونصيحة مني ليك راقبي الألفاظ ديالك ولا غادي ندير شي تصرف لي ما غاديش يعجبك الحال
وقفات ح.زينب بيناته: صاافي اا وليدي الله يرضي عليك سير ترتاح خليها عليك
ح.يونس وقف حتى هو: سير اا ولدي ترتاح عاد دخلتي واجي للجردة على الموضوع لي قلتي ليا
حنا راسه ومشا ملبي ليهم النداء قبل لا يفوت فيها شي دقة أما مصطفى بقا مكواني فواحد الركنة كيشوف فيها مكالمي ومهني الوقت قبل لا تنوض ثاني تحيح ليهم ولكن عارف بلي غادي تلبدها دبا حيت صافي دخل هلال ومعصب
YOU ARE READING
💞💎ياقوت💎💞 ( مكتملة )
Romanceالسلام عليكم ورحمة الله وبركاته البنات لباس عليكم أولا وقبل كل شيء 🌛🌛رمضان مبارك كريم يدخل عليكم بالصحة والسلامة انشاء الله والثوبة والمغفرة يا رب🌜🌜 رجعت ليكم من بعد قصة 🌹بيان النصر🌹 لي عشنا فيها مجموعين أحداث شيقة مثيرة وواقعية قصة لي تعرفت ف...
