💞💎ياقوت💎💞 ( مكتملة )

الجزء 55

                                     🌛 شمس الغريب 🌜

                                   💞 💎 ياقوت 💎 💞 
                                          

وصلات للدار ديال مصطفى كانت ابارطومون دياله شاريها لراسه الساروت ديالها ما عندهاش كتجي ليها بحال الضيفة دقات وحل عليها تقول كان ورا الباب جرها بالنترة لداخل الدار
نزلو دموعها عائشة خوفانة: مصطفى شنو واااقع يااك لباس
غوت فوجهها: اشنووو واااقع ياااك لباس ياااك قدامهم كتقولي المشروع دبا غير ارتاحي ما بقا مشروع
رمات صاكها بعصبية: بلاااااش من المشروع أنا بغيت نحس براسي فرد من هاد العائلة ما قدرتيش توقف فوجه ولدك باش يرجعني للخدمة لي كنت فيها
دفعها حتى ترمات على الفوتوي: ماا بقات خدمة ما بقا مشروع هلال عاق بلي كلشي كنديرو من مداخيل الشركة وحيد ليا حق التصرف وليت بحالي بحال السكريتيرة ديالي دبا نتخلص غير على شنو كنت كندير
وقفات عائشة فوجهه: مصطفى من ديما كنت صابر على معاملة الحاجة القاسية وعلى الحاج لي فينما يشوفني يستاعذ بالله وولدك لي عييت عييت اا عباد الله وأنا كنحوزو حدايا باش يعتابرني أمه وهو حاقد عليا تقول أنا لي قتلتها أما أنت ما كدافعش عليا وما كتعاملنيش كزوجة أنت راك بصح كتعاملني بحال  شي منيكة
كاز على سنانه مصطفى هضرته بحال السم كتخرج: الحاجة كتعاملك قاسي حيت نتي كتشوفي غير فالسما والناس عندك عبيد الحاج لوكان كان كيشوفك مستورة ولابسة مقادة كون راه كيهضر معاك أما هلال طبعه هكاك علاش نتي كتحكري ونتي لي كتجبديه يصحاب ليك أنا ديك حشيان الهضرة ديال النساوي ما كنفهمهاش أنا أما أنا كون كنتي امرأة ديال القلب كون دافعت عليك زائد نتي قبلتي بهاد العلاقة تكون هكا من نهار الأول
******      ******      ******      *******      ******      ******    *
الظلام طاحت وهي باقي كضور فالزنقة ناسية راسها زيفها شاداه بيد وشعرها مطلوق صباط واحد فرجليها وواحد فيديها ناسية راسها وغادية فالطريق لي شافها كيبعد منها كيصحاب ليه بلي حمقة كيخافو منها بسبب النقاش الكبير لي خلاها ناسية ولادها لي جاو وطلعو للدار من بعد ما حلات ليهم لي كارية عندهم الباب لتحتاني وطلعو جلسو قدام باب دارهم هي دالعة فالزنقة وهو راه مع حفصة وشكون بهاد الدراري
حسام فيه البكية وجوع والبرد: غادي تكون مشات عند خالتي فاطمة ياكو
رضا عنقه: اهه ماا تخافش اا حسام واش جاك البرد (حيد جاكيط دياله لبسها ليه) هااك لبس هادي على البرد
أسامة عنقهم بجوج: عنداكم يكونو خلاونا بحال كما دارو ل ختي ياقوت
رضا خلاهم باغي يهبط فالدروج: أنا نمشي نشوف هاد جارة واش تقدر تعيط لينا عليهم هبط كيجري مخليهم من وراه غير كيشوفو هو الوسطاني وهو القافز فيهم خلى أسامة معنق حسام كيواسي فيه
******      ******       ******       ******       ******       ******  
فالبيت من بعد ما كملو الفساد ديالهم الله يعطيهم شي مصيبة جالسة بين أحضانه كتمرغ فيه وهو فرحان بيها ومرة مرة يهبط يهمس ليها وهي كتغنج عليه
بغنج مبالغ فيه: ابراااااهيم دبا غادي تكتب ليا الصالون
إبراهيم منغم ومعسل عينيه فيها تقول مبنجاه: كلشي ديالك العمر نتي غير ديري شنو نقول وها أنا بين يديك
حفصة: كيفاش ثاني
جلس متكي على الكادر وجرها عنده: هاا أنا وراك ها أنا قدااامك هايلي هايلي       لالة حفيصتي هانا طايع ليك هايلي هايلي
طلقاتها بضحكة ديال الشيخات: هاهااهاهاهاهااهاا والله إلى اا إبراهيم إلى راك زعما ما عرفت شنو نقول ليك ايمتى تكتب ليا الصالون دبا بالمعقول
كيحيد ليها الشعر من على وجهها: غادي ندير ليك الوكالة مزيانة
وقفات غضبانة: بغيته بسميتي اا سيدي ولا بغيتي نوحل مع تريكتك