السلام عليكم ورحمة الله وبركاته البنات لباس عليكم أولا وقبل كل شيء 🌛🌛رمضان مبارك كريم يدخل عليكم بالصحة والسلامة انشاء الله والثوبة والمغفرة يا رب🌜🌜
رجعت ليكم من بعد قصة 🌹بيان النصر🌹 لي عشنا فيها مجموعين أحداث شيقة مثيرة وواقعية قصة لي تعرفت ف...
فالمطار نزلات طائرة خاصة من الخارج كتبان بلي طائرة فاخرة نازل منها بشموخ الطول فالعرض فالارتفاع بنية جسمانية ضخمة غليض ولكن بصحة ماشي غير منفوخ بحال أبطال كمال الاجسام فعز البرد كان لابس سروال اسود مع شوميز وحذاء رياضي فنفس اللون شوميز محلولين ليها صدايف الفوق مع اكسسوارات رجالية ومgانة رياضية مصنوعة ليه بالخصوص كان واقف فراس درج الطائرة رجليه مفتوحين ويديه مربعهم كيشوف لبعيد حتى كيحس بشي حاجة فوق كتافو كانت المضيفة لي أمرها واحد من لي gارد باش تحط فوق كتافو سلهام لي مكيخطاوهش فوقت البرد حطاتو بلا ماتحاول تقيسو حيت ايلا قاستو غير بالغلط غادي يصوط فيها قاد السلهام على كتافو لي كان حتى هو اسود قادو بيديه وتم هابط مع دوك الدروج كيتمختر كل درجة كيدير فيها عام وصل وأخيرا للأرض فوق أرض الوطن فوق أرض بلادو لقى 4طوموبيلات jeep كيتسناوه ركب فوحدة وفضل انه هو لي يصوg تحرك مفرفر من تما وحتى دوك 3طوموبيلات لوخرين لي عامرين بلي gارد مكانوش من العاgزين تبعوه بحال خيالو ماوقف غير قدام فيلا من الفيلات الكبار تما بل قصر من القصور دخل من جهة السيارات كانت بحال الهبطة هبط منها حتى وصل قدام نافورة كانت أمام الباب ديال الدخلة وقف السيارة ارتجل منها مامشاش للباب توجه لجنب الفيلا فين كاينة الجردة بقا غادي معاها حتى لجهة البيسين فين كانو جليسات متنوعين نفس البلاصة فين لقاتهم ياقوت داك نهار لقاهم هو تاني جالسين فيها الفرق هو ملابسهم ح.زينب كانت لابسة بيجامة سخونة فالبني فيها وريدات فالصدر بالاسود مع فولار بالاسود وصابو فنفس اللون خاشية فيه رجليها لي لابسة عليهم تقاشر حداها ح.يونس بجلابة بالرمادي غامق سخونة فوق من سروال وتريكو بالكول سخانين مع صابو رجالي وداير طاgية مع كشكول كلشي بالاسود مغطيين بمينطات سخانين وكيتعاودو هو وياها ح.زينب: والله ما كرهت تعيط عليه قوليه راها مريضة شادة الفراش ايلا تعطلتي ماتلقاهاش ح.يونس: الله يهديك ا زنوبة الولد نخلعوه بغيتي يقتل شي حد بمسبتك ح.زينب: توحشت وليدي ا لحاج وداك الصgع ديال ولدك جاي هو ومرتو ح.يونس: اهااه ولدك نتي مرحبا وولدي انا الله يخليها سلعة ياكما نجري عليه ح.زينب: واش من نيتك واش انا غادي نجري على مصطفى ولكن انا غانبقا مقلقة منو حتى يعرف غلطو ويعتذر عليه ح.يونس: بقيتي تسناي وغادي تبقاي غير تمرضي فراسك وتمرضيني معاك جا هم صوت غليض رجولي كيجيب الرهبة مع بحة جميلة فصوتو: علاش تمرضو راسكم بجوج ما عاشش لي يمرضكم الحاج والحاجة بالفرح وقفو وعينيهم عليه مامصدقينس بلي جا وأخيرا جا وشحال توحشوه الحاجة ترمات فحضنو كأنها هي لي بنتو والحاج كيتسنا نوبتو هو توحشو كثر من زنوبتو ولكن كيبغي يفاجي عليها عارف معزتو عندها ح.زينب: وليدي هلال وشحال توحشتك طالت غيبتك اوليدي توحشتك توحشتك هو كان خاشيها فحضنو هابط عندها بحكم طويل عليها بزاف كيستمد منها القوة حتى هو توحشهم أكثر ما يتصورو طلق منها بزز ومشا عند الحاج باس ليه يديه بجوج وراسو عاد عنقو حتى هو مدة طويلة ورجع باس يدين الحاجة وراسها ضار شاف فين كانو جالسين عاد غادي يبدأ دبا بالملاحظات ديالو هلال: أجي واش نتوما باغيين تقتلوني جالسين فهاد الجو هنا باغين تمرضو ح.زينب: دبا ملي جيتي غادي مانخرجش من قلب الدار ااا لحبيب الغالي ح.يونس: راني غادي نغير ااا زنوبة كيفاش الحبيب الغالي تاني هلال شحال توحش هاد الحوارات القصار لي بيناتهم وشحال توحشهم ولكن ما كيعبرش ليهم بالكلمات هو الحب عنده أفعال ماشي أقوال ...
نرجعو عند ياقوت لي وصلات لقدام شركة بابات شروق ووقفات كتسناها حتى بانت ليها شروق جاية عندها زربانة كدير فالخطوة 2 وفجوج 3 شروق: علاش ا ختي ما بغيتيش طلعي عندي راه البرد ا صاحبتي زيدي نجلسو غير فالكافيتيريا لي هنا لتحت ياقوت وهي غاديا معاها: مالك اختي ما عندك ما تلبسي حتى جايا هاكا شروق: دبا تسبي ليا العروق وهانيا والله ايتا هانيا كيما قال داك دري غير عاودي ليا ملي قلتي ليا عندك ليا شي موضوع مخي وقف ا ختي وقف ياقوت: مشيت كندفع لي cvراك عارفة ايوة كلشي نفس الهضرة........(عاودات ليها) شروق: نووو وااي شركة رمزي فراسك بابا دبا فاش دار الاجتماع قاليك بين دوك 6 شركات اللولين نايضة الحراقية وشركة رمزي حالفة هاد العام حتى تربح هاد المناقصة ياقوت: باباك شركتو ا بنتي راه من دوك6 ايلا ما فراسكش وجمعي راسك وعاونيهم شروق: امممم عارفة غادي نعطيهم غير أفكاري مع الأسف الشديد ياقوت: وعصري مخك دبا قولي ليا اشنو ندير واش نسمح فخدمتي فالوزين شروق حضرات المعقول تقول ماشي هي ديك الحمقة: شوفي ا ياقوت واش نتي غادي تربطي حياتك بداك الوزين اه هو قبل عليك وعطاك شهرية لي كانت معاوناك على داركم وعلى قرايتك ولكن دبا نتي راه خريجة مدرسة التجارة والتسيير يعني هادي غادي تكون أول خطوة ليك برا الوزين نسايه بداي حياة جديدة بخدمة لي قريتي عليها ياقوت: واخا ولكن خاصني نمشي نعلمهم ونشكرهم شروق: اكيد تبغي نمشي معاك ياقوت: لا غير خليك ماشي نهار الأول نخرج عليك بالمناسبة جيتي غزالة شروق: يخليك ليلي ايوة واخا نزيانو مانجيوش قدامك يا لالة توادعو البنات مشات هاد المرة ياقوت مستاعنة بالbus وصلات الوزين خبراتهم باشنو كاين وودعاتهم بالبكا كلشي فرح ليها ولكن كلشي عرف بلي غادي تخلي بلاصتها هي الوحيدة لي كانت خدامة باش تقرأ وباش تخلص عائلتها كلهم كانو قصصهم مختلفة وحزينة ولكن قصتها هي كانت أكثر حزن وتضحية باش تغير واقعها رجعات ادراجها وهي الحزن باين فعيونها كان تيلي ديالها كيصوني ماسمعاتوش وصلات للحي سلمات على محماد وفاضمة ووليداتهم ...
💞💎💞💎💞💎💞💎💞💎💞💎💞 هوووف سخفتكم ها هلال جاااا غير كتبقاو فيا داكشي باش كنديرو ليكم ضاحك هههه ... قرار ياقوت غادي يكون صحيح ولا لا
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
