ပိတောက်ပန်းများ ရွှန်းရွှန်းဝေအောင် ပွင့်ဖူးသည့် လွန်ခဲ့သောနှစ်များအကြာမှ လွမ်းဆွတ်ဖွယ် နွေရာသီသင်္ကြန်အကျနေ့တစ်နေ့ ။
သင်္ကြန်သီချင်းသံများသည် ရပ်ကွက်အလှူမဏ္ဍပ်များထံမှ မြိုင်မြိုင်ဆိုင်ဆိုင် ပေါ်ထွက်နေ၏ ။ မနက်ရှစ်နာရီအချိန်၌ ဇဝါတို့ နယ်မြို့လေးတွင် ရေပက်သူ ရေပက်ခံသူများဖြင့် ပျော်ရွှင်မြူးကြွနေလေသည် ။ ကိုယ်တိုင်ကိုယ်ကျ ခါချဉ်အကိုက်ခံ၍ အပင်ပေါ်တက်ခူးလာသော ပိတောက်ခက်လေးများကို ဆုပ်ကိုင်၍ ချစ်ရသူဆီ အပြေးလေးရောက်လာသည် ။ ရေစင်ဖြန်းပက်ရန် လက်ထဲ၌ရေဖလားခွက်ကိုင်ထားသည် ။
အပြာရောင်ဆေးများ ခြယ်ထားသော တစ်ထပ်တိုက်အိမ်၏ ခြံဝန်းအတွင်းရောက်တော့ ချစ်ရသူကို ရှာဖွေမိသည် ။ ကိုယ်ကျပ်အင်္ကျီနှင့်အဝါနုရောင် စကတ်အရှည်အဖားကို တွဲဖက် ဝတ်ဆင်ထားပြီး အလှဘီးကုတ်ပန်ထားသည့် မ၏ကျောဘက်သည် ဤနှစ်နွေတွင် ပိတောက်မင်းသမီးလိုလှ၏ ။
မသည် ခြံထဲရှိ ပန်းအိုးများကို ရေလောင်းပေါင်းသင်၍ သစ်ကိုင်းခြောက်ရိုးလေးဖြင့် မြေတူးဆွနေသည် ။ ပိတောက်ပန်းကို လက်နှောက်ပစ် ဝှက်၍ ခြေသံလုံလုံဖြင့် မအနားသို့ သွားပြီး ဦးဦးဖျားဖျား ရေလောင်းရန် ယူလာသော ရေဖလားလေးဖြင့် မ,ပခုံးကနေ ဇဝါရေခိုးလောင်းလိုက်သည် ။
"အမလေး ! စိုကုန်ပြီ''
မက အလန့်တကြားရေရွတ်၍ လှည့်ကြည့်သဖြင့် ဇဝါ အတောက်ပဆုံးပြုံးပြမိတော့သည် ။
"ညီမလေး''
ဟုတ်ပါသည် ၊ မ ကျွန်မကို ခေါ်သည့် နာမ်စားက ညီမလေး ။ မက ကျွန်မရဲ့ ဂိုက်ဆရာမတစ်ဦးဖြစ်သလို ကျွန်မ အရမ်းမြတ်နိုးတန်ဖိုးထားချစ်ရတဲ့ အစ်မတစ်ဦးလည်း ဖြစ်သည် ။ မက ကျောင်းဆရာမတစ်ဦးတော့ မဟုတ်ပေမယ့် အကူအညီတောင်းခံသော မည်သူမဆို တစ်ဦးချင်းသင်ပြပေးရင်း စာအသင်အပြကောင်းသဖြင့် ကျွန်မတို့ နယ်မြို့လေးတွင်တော့ နာမည်ရပြင်ပဆရာမတစ်ဦးဖြစ်ခဲ့သည် ။ မိဘတွေက မဆိုလျှင် သူတို့သားသမီးများကို ယုံကြည်စိတ်ချကြသည် ။ ထိုအထဲတွင် ကျွန်မ၏ဖေဖေလည်း အပါအဝင်ပေါ့ ။
![](https://img.wattpad.com/cover/273756645-288-k600619.jpg)
YOU ARE READING
This is my prayer
Romanceကာမပိုင်လင်ယောက်ျားရှိ ဣတ္ထိယအမျိုးသမီးတစ်ဦးကို အရူးအမူး စွဲလမ်းမိသော မိန်းမငယ်လေးတစ်ဦး၏ အဆုံးသတ်သည်... ကာမပိုင္လင္ေယာက္်ားရွိ ဣတၳိယအမ်ိဳးသမီးတစ္ဦးကို အ႐ူးအမူး စြဲလမ္းမိေသာ မိန္းမငယ္ေလးတစ္ဦး၏ အဆုံးသတ္သည္...