တစ်ည၌ မွမ်းမံငိုသံကြားရ၍ ညို့ကိုယ်ပူစမ်းကြည့်သော် သားလေး အဖျားတက်နေ၏ ။ ညို့လည်း အဖျားပျောက်ဆေးတိုက်ပြီး ချော့မြူပြန်ပေးအိပ်တော့ အဖျားကျပြီး အိပ်ပျော်သွားသည် ။ မနက်ရောက်တော့ သားမှာ အဖျားထပ်တက်၏ ။ ထိုကြောင့် ညို့ရုံးမသွားဘဲ ခွင့်ယူလိုက်သည် ။
ရိုးရိုးသာမန်နေမကောင်းဖြစ်သည်ဟု ယူဆပြီး ဆေးဆိုင်၌ ဆေးဝယ်၍ အိမ်တွင် ကုခဲ့သည် ။ သို့သော် သားလေးမှာ သက်သာတော့မလိုဖြင့် ပြန်ဖျားလိုက် အဖျားကျလိုက် ရက်ဆက်တိုက်ဖြစ်နေ၏ ။ သုံးရက်ခန့်ကြာတော့ သား၏ လက်မှာ အနီစက်အဖုများ သုံးလေးခု တွေ့သဖြင့် ညို့လည်း ခြင်ကိုက်ရာထင်၍ နေ့ဘက်၌ပင် ခြင်ဆေးခွေ ထွန်းညှိသည် ။
၄ ၊ ၅ရက်ကြာသောအခါ သားလေးသည် အဖျားကြီးပြီး တစ်ကိုယ်လုံးနီးပါး အနီစက်အဖုများ ပေါက်သည် ။ အနီစက်များမှာ မျက်သားအဖြူမကျန် ပေါက်သဖြင့် ဒေါ်ပိန်က ဝက်သက်ဟု ပြောသည် ။ ညို့လည်း စိုးရိမ်လွန်၍ မလုပ်တတ်မကိုင်တတ်သဖြင့် ဆေးရုံတင်လိုက်သည် ။
အစ်ကိုကလည်း အရေးအကြောင်းဆို အနားမရှိသဖြင့် ညို့မှာ အားကိုးမရှိ ။ သားလေးကို ညို့တစ်ယောက်တည်း မွေးထားသည့်အတိုင်း အစ်ကိုဂရုမစိုက် ။ အမြဲပေါ့ပျက်ပျက်နေ၏ ။ အချိန်တန်လျှင် ကောင်းသွားမှာဟု အပူအပင်မဲ့ ပြောတတ်သည် ။
ဆေးရုံတက်တော့ ဝက်သက်နှင့် ရေကျောက်ရောပေါက်သည်ဟု သိရသည် ။ ဆေးထိုးဆေးသောက်လုပ်တော့ သက်သာလာသည် ။ နှစ်ရက်ခန့်ကြာတော့ ဆရာဝန်ညွှန်ကြားသည့် မျက်ဆေးပုံမှန်ခပ်သဖြင့် မျက်လုံး၌ အနီစက်ပျောက်သွားသည် ။ ခန္ဓာကိုယ်၌လည်း ဆေးလိမ်းပေးတော့ အနီစက်မှာ တဖြည်းဖြည်းလျော့နည်းလာသည် ။
ညီမလေးဇဝါက နေ့တိုင်းဆေးရုံလာပြီး ညို့ကို အစစအရာရာ ကူညီဖေးမပေး၏ ။ ညို့တစ်ဦးတည်းဆိုလျှင် အစိုးရိမ်လွန်၍ ဘာမှလုပ်တတ်ကိုင်တတ်မည်မဟုတ် ။ သားလေး ဆေးရုံတင်ထားသော်လည်း အစ်ကိုမိုးမာန်သည် တစ်နေကုန်မှ တစ်ခေါက်မလာချင် ။ ရောက်လာလျှင်လည်း လူကြားသူကြား ညို့တွင် ကလေးမုန့်ဖိုးတောင်းသလို ငွေတောင်းတတ်သည် ။ ဤနေ့လည်း အစ်ကိုတစ်နေကုန်ပျောက်နေပြီး ညမှ ရောက်လာသည် ။
![](https://img.wattpad.com/cover/273756645-288-k600619.jpg)
YOU ARE READING
This is my prayer
Romanceကာမပိုင်လင်ယောက်ျားရှိ ဣတ္ထိယအမျိုးသမီးတစ်ဦးကို အရူးအမူး စွဲလမ်းမိသော မိန်းမငယ်လေးတစ်ဦး၏ အဆုံးသတ်သည်... ကာမပိုင္လင္ေယာက္်ားရွိ ဣတၳိယအမ်ိဳးသမီးတစ္ဦးကို အ႐ူးအမူး စြဲလမ္းမိေသာ မိန္းမငယ္ေလးတစ္ဦး၏ အဆုံးသတ္သည္...