အရံဇာတ်ကောင်၏ လှည့်ဖြားခြင်း System [ဘာသာပြန်]

Arc 9.9

မိုးခေါ်ပွဲကို Abby သူ့ဘာသာတစ်‌ယောက်တည်းကျင်းပမယ့်အကြောင်း ဘုရင်က သူ့လူတွေကတဆင့် တစ်နိုင်ငံလုံးသိအောင် ကြေညာခိုင်းလိုက်ပါတယ်။ သူက ချီးမြှောက်မှုရဖို့အတွက် အခုထိ လက်မလျော့နိုင်သေးလို့ပါပဲ။ လူတိုင်းက Abby မိုးခေါ်တဲ့အကြောင်း မသိဘူးဆိုရင် တကယ်လို့ Abby အောင်မြင်သွားတဲ့အခါ ဘယ်သူမှမသိရင် ဘယ်လိုလုပ်မလဲ? မိုးခေါ်ပွဲအောင်မြင်ပြီးနောက်မှ သူ လူတိုင်းကို ဒါက Abby လုပ်ခဲ့တာပါ လိုက်ပြောလို့ ဘယ်သူမှ မယုံရင်ရော? Abby က မိုးကိုဆင့်ခေါ်မယ့်အကြောင်း ဘုရင်က ကြိုပြီး ကြေညာခိုင်းခဲ့ပြန်ပါတယ်။

စင်မြင့်ပေါ်ကို ပုတီးစေ့နဲ့ သွေးပုလင်းအကြီးကြီးကိုင်လို့ Abby တက်လာခဲ့ပါတယ်။ ကျယ်ပြန့်ပြီး ငြိမ်သက်နေတဲ့ ရင်ပြင်ကြီးကို ကြည့်ပြီး သူတွေးလိုက်တယ်။ ဒီတစ်ကြိမ်တော့ ဘယ်သူမှမရှိဘူး သူတစ်ယောက်တည်းပဲရှိတာ။ ပုတီးစေ့ကို အခု Leann လာမထိန်းချုပ်နိုင်တော့ဘူး။ ရင်ပြင် အပြင်ဘက်ကိုတော့သူစောင့်မကြည့်နိုင်တာမို့ ရုတ်တရက် တစ်ယောက်ယောက် ဖောက်ဝင်လာမှာကို ကာကွယ်တဲ့အနေနဲ့ Cory ကို အကူအညီတောင်းပြီး စစ်သားတွေ စောင့်ကြပ်ခိုင်းလိုက်ပါတယ်။ ဒီတစ်ခါတော့ ဘာပဲဖြစ်ဖြစ် သူအောင်မြင်မှဖြစ်မယ်!

အရင်ကထက် ပိုကြီးတဲ့ သွေးပုလင်းကြီးကို သူထုတ်လိုက်တယ်။ သူ့လက်ဖဝါးပေါ်က ပုတီးစေ့ကို သွေးတွေလောင်းချလိုက်ပြီး အာရုံစူးစိုက်မှု စတင်ပါတော့တယ်။ သူ့စိတ်ကို သန်မာအောင်လုပ်ဖို့ အလွန်သန်မာပြီးပြင်းထန်တဲ့ခံစားချက်တစ်ခု လိုအပ်နေတယ်။ ဒါကြောင့် သူ့အဖေသေဆုံးတဲ့မြင်ကွင်းကို ပြန်မြင်ယောင်လိုက်ရင်း သူသာဆက်တိုက်ရှုံးပြီး သွေးသန့်ရေသူမအတုဖြစ်တာပေါ်သွားခဲ့ရင် ဘယ်လိုဖြစ်သွားမလဲဆိုတာ တွေးတောလိုက်ပါတယ်။

သူလေးလေးနက်နက်ကြီးတွေးနေတာကြောင့် အဲ့ဒါတွေက အခုဖြစ်ပျက်နေသလို ခံစားနေရတယ်။ သူ အရမ်းစိတ်ခံစားလွယ်လာပြီး သူ့ခန္ဓာကိုယ်က တုန်ခါလာပါတယ်။ သိပ်မကြာခင် လက်ထဲက ပုတီးစေ့ဆီက အနည်းငယ်တုန်ခါလာတာ သူခံစားလိုက်မိတယ်။ ပတ်ဝန်းကျင်အပူချိန်က စတင် ကျလာပြီးနောက် ကောင်းကင်ကြီးက မှောင်မိုက်လို့လာပါတယ်။