ဆူရာခန် လက်ထဲကတံဆိပ်ပြားကို တင်းနေအောင်ဆုပ်ကိုင်လို့ထား၏။ သူ့မျက်လုံးတို့က ရှောင်းကျန့်အပေါ်သို့ အလုံးစုံကျရောက်လို့နေတာဖြစ်ပြီး မည်သည့်စကားတစ်ခွန်းမှမဆိုသေး။ ညီလာခံအတွင်းမှ လူများအားလုံးလည်း တိတ်ဆိတ်ငြိမ်သက်လို့နေကြကာ အခြေအနေကို ရင်တမမနဲ့စောင့်ကြည့်လို့နေသည်။
ခန်အင်ပါယာကြီးတွင် ဧကရာဇ်ပြီးလျှင် အာဏာအရှိဆုံးမှာ ရှောင်းဟာရု ဖြစ်မှန်းလူတိုင်းသိ၏။ထို့ကြောင့် ဧကရာဇ်အနေနဲ့ မည်သို့တုံ့ပြန်မည်ဆိုတာကို လူတိုင်းစိတ်ဝင်စားကြသည်။ လယ်ပြင်မှာ ဆင်နဲ့ ကျားတွေ့သလို အခြေအနေမျိုးဖြစ်တာကြောင့် မည်သူမှ ဝင်စွက်ဖက်ခြင်းမရှိသေးကြ။
"အရှေ့ထွက်ခဲ့ ရှောင်းကျန့်..."
ဧကရာဇ်၏ အမိန့်အရရှောင်းကျန့် အရှေ့သို့ထွက်လာခဲ့သည်။ ဆူရာခန်က လက်ထဲက တံဆိပ်ပြားကို ရှောင်းကျန့်ရှေ့သို့ပစ်ချပေးလိုက်ပြီး...
"နားလည်အောင်ရှင်းပြ..."
"လုပ်ကြံခံရတာပါ..."
ရှောင်းကျန့်၏ အသံက ပြတ်သားလို့နေ၏။ မျက်လုံးတို့ကလည်း စူးရဲလို့နေကာ လက်သီးကို ကျစ်နေအောင်ဆုပ်ထား၏။ လည်ပင်းကသွေးကြောများက ပေါက်ထွက်လုမတတ် ထင်းလို့နေပြီး ဆူပွက်နေသော ဒေါသသွေးတွေကို အတားအဆီးမဲ့မဖြစ်အောင် ထိန်းချုပ်လို့ထားရသည့် အသွင်ဆောင်နေသည်။
"ဘာလို့ လုပ်ကြံခံရတာလို့ ပြောနိုင်တာလဲ..."
"မနေ့ညက အဲ့ဒီလူကျွန်တော့်အဆောင်က်ို ရောက်လာခဲ့ပါတယ်..."
အာမေဋိတ်အသံတွေ၊ ဝေဖန်သံတွေသဲ့သဲ့ထွက်လာသည့်အခါ အားလုံးကို ဆူရာခန်တိတ်တိတ်နေစေလိုက်ပြီး...
"အဆောင်ကိုရောက်လာပြီး ဘာလာလုပ်တာလဲ..."
ရှောင်းကျန့်အတွက်ဖြေစရာစကားမရှိ။
"အဆောင်ထဲထိ ဝင်ရောက်လာခဲ့တယ်ဆိုတော့ ဘယ်လိုဆက်ဆံရေးမျိုးလဲ...ဘယ်အတိုင်းအတာအထိရင်းနှီးကြလို့..."
"အချုပ်ထဲပို့လိုက်..."
ဆူရာခန် ပြောနေသည့်စကားမဆုံးခင် ရှောင်းဟာရု၏ ပြတ်သားလှသည့် စကားသံထွက်ပေါ်လို့လာ၏။ ရှောင်းဟာရုက တွေဝေခြင်းမရှိသည့် မျက်ဝန်းများဖြင့် ဆူရာခန်ကိုကြည့်လိုက်ပြီး...
YOU ARE READING
Bamboo Forest
Fanfictionအာဃာတနဲ့မေတ္တာ၊ ဦးနှောက်နဲ့ နှလုံးသား။ တိုင်းပြည်နဲ့လူမျိုး ၊ တာဝန်နဲ့ဝတ္တရား။ ဘယ်ကိုဆက်လျှောက် လမ်းပျောက်နေတဲ့အခါ... ဤနေရာမှာခြေစုံရပ်လို့။ အနောက်သို့... တစ်လှမ်း...နှစ်လှမ်း...သုံးလှမ်း။ Cover Photo Crd: