"ခင်ဗျားတို့နှစ်ယောက်ရယ်...ကျုပ်ရယ် သုံးယောက်တည်းစကားပြောချင်တယ်..."
ဧကရာဇ်နှင့် ရှောင်းအကြီးအကဲကို "ခင်ဗျား"ဟု ရင့်သီးစွာတပ်ခေါ်လိုက်သည့် ဝမ်ရိပေါ်ကြောင့်နန်းတွင်းစစ်သည်များမခံနိုင်ဖြစ်ကာ ကြားဖြတ်ဟန့်တားလိုက်သည်။ သို့သော် သူတို့၏ ဧကရာဇ်ကိုယ်တိုင်က လက်ကာပြလိုက်တာကြောင့်စစ်သည်များလည်း နောက်ဆုတ်လို့သွားကြသည်။
ဆူရာခန်က ဝမ်ရိပေါ်ကို ကြည့်ပြီး...
"ဒီနေ့လာရတဲ့ အကြောင်းပြချက်က ဘာလဲ..."
"သုံးယောက်ဆိုင်ပြီးမှ ပြောကြတာပေါ့..."
ဆူရာခန်က သိပ်မယုံကြည်ချင်တာကြောင့် ရှောင်းဟာရုကို တိုင်ပင်သည့် သဘောမျိုးဖြင့်လှမ်းကြည့်လိုက်သည်။ ရှောင်းဟာရုကလည်း ဝမ်ရိပေါ်ကို သေချာအကဲခတ်နေတာဖြစ်သည်။ ဝမ်ရိပေါ်၏ ရည်ရွယ်ချက်အမှန်ကဘာလဲဆိုတာကို မျက်ဝန်းများမှတစ်ဆင့်သိရအောင် အကဲခတ်လို့နေပေမယ့် မည်သည့်တစ်စုံတစ်ရာကိုမှဖော်မထုတ်နိုင်။ထို့ကြောင့် ဝမ်ရိပေါ်၏ တောင်းဆိုချက်ကို ခေါင်းညိတ်ပြလိုက်ပြီး...
"အင်ပါယာအရေးနဲ့ ပတ်သက်ပြီး ညှိနှိုင်းမယ့် ကိစ္စလို့ပဲ မျှော်လင့်တယ်..."
"ပြောကြည့်မှ သိမှာပေါ့...ဒီတိုင်းမတ်တပ်ရပ်နေကြရုံနဲ့ ဘာမှ မဖြစ်လာဘူး..."
ဧကရာဇ် နန်းဆောင်နှင့် ကပ်လျက်ရှိနေသော သီးသန့်အဆောင်ရှေ့တွင် နန်းတွင်းစစ်သည်များက ဝမ်ရိပေါ်၏ ခန္ဓာကိုယ်အနှံ့စစ်ဆေးရှာဖွေလို့နေသည်။ သုံးယောက်တည်းသာ သီးသန့်ပြောဆိုကြမည်ဖြစ်တာကြောင့် ဧကရာဇ်၏ လုံခြုံရေးနဲ့ပတ်သက်ပြီး တင်းကြပ်နေကြတာဖြစ်သည်။ အကြွင်းမဲ့ယုံကြည်လို့ ရသည့်သူများမဟုတ်တာကြောင့် ဝမ်ရိပေါ်၏ကိုယ်ထက် လက်နက်များ ပါမပါ သေချာစွာစစ်ဆေးပြီးမှ အထဲကို ဝင်ခွင့်ပြုလိုက်သည်။
စစ်ဆေးခံပြီးသည့် ဝမ်ရိပေါ်က သူနဲ့အတူပါလာသည့် နင်ဂျာတစ်ဦး၏ လက်ထဲမှ စာရွက်လိပ်ကို လက်လွှဲယူကာ သီးသန့်ဆောင်အတွင်းသို့ဝင်ရောက်လို့လာခဲ့သည်။ စားပွဲခုံရှည်ဝိုင်းတွင် သုံးယောက်စာ ထိုင်ခုံသုံးလုံးက အကျအနရှိနေတာဖြစ်ပြီး လွတ်နေသည့် နေရာတွင် ဝမ်ရိပေါ် ဝင်ထိုင်ကာ ဆူရာခန်နှင့် ရှောင်းဟာရုကို မျက်နှာချင်းဆိုင်လိုက်သည်။
YOU ARE READING
Bamboo Forest
Fanfictionအာဃာတနဲ့မေတ္တာ၊ ဦးနှောက်နဲ့ နှလုံးသား။ တိုင်းပြည်နဲ့လူမျိုး ၊ တာဝန်နဲ့ဝတ္တရား။ ဘယ်ကိုဆက်လျှောက် လမ်းပျောက်နေတဲ့အခါ... ဤနေရာမှာခြေစုံရပ်လို့။ အနောက်သို့... တစ်လှမ်း...နှစ်လှမ်း...သုံးလှမ်း။ Cover Photo Crd: