Bamboo Forest

အပိုင်း (၅၃) Unicode

ကောင်းကင်ထက် လရောင်မရှိ မှောင်မိုက်လို့နေသည့် အချိန်၌ ဝါးအိမ်လေး​၏အပြင်ဘက်တွင်ရှောင်းကျန့်တစ်ယောက်တည်းမတ်တပ်ရပ်နေသည်မှာ ကြာမြင့်လို့နေပြီဖြစ်သည်။ သူ​၏လက်ထဲ၌ အဖုံးဖွင့်လို့ထားပြီးပြီဖြစ်သော ဆာကေးအိုးတစ်လုံးကိုလည်းကိုင်ဆွဲထား​တာဖြစ်ပြီး စိတ်ကိုပြင်ဆင်လို့နေ​၏။

သူရောက်လာခဲ့သည့် နေ့မှစလို့ ဒီနေ့နဲ့ဆိုကိုးရက်ရှိပြီဖြစ်​၏။ အခုထက်ထိ အခြေအနေများကပြောင်းလဲတိုးတက်လာခြင်းမရှိသလို ပို၍ပင်ဆုတ်ယုတ်လာသည် ။စိတ်ပြေမည့်အချိန်ထိ စိတ်ရှည်စွာစောင့်စားနိုင်ပါသော်လည်း အခုရက်ပိုင်းမှပို၍ဆိုးစွာရင်ဆိုင်နေရသောလျစ်လျူရှုမှုတို့ကြောင့် စိတ်ထဲမွန်းကြပ်လို့လာရသည်။

​ကိုးရက်ဆိုတဲ့အချိန်က ဘာမှမပြောပလောက်သော်လည်း လျစ်လျူရှုခံရသူအတွက်တော့ ကိုးသက်လောက်ကြာသည်။ထို့ကြောင့်ဥပေက္ခာဆိုတာ အသွားတုံးသည့်ဓားတစ်လက်လို ထိုးလိုက်ရင်တစ်ချက်တည်းမသေနိုင်ဘဲ တရိပ်ရိပ်နဲ့အသက်ကိုဖြည်းဖြည်းချင်းခြွေယူတတ်တာဖြစ်သည်။

ထို့သို့ ကာရံထားသည့်ဥပေက္ခာတံတိုင်းကိုဖြိုချဖို့သူ့ဘက်ကစပြီးခြေတစ်လှမ်းတိုးရမည်ဖြစ်သည်။ ခြေတစ်လှမ်းတိုးဖို့ရာ၌လည်း ရဲဆေးတင်ဖို့လိုအပ်သည်။ လူအများ​၏ဆိုမှတ်အတိုင်း သေရည်ဆိုသည်မှာရဲဆေးဖြစ်သည့်အလျောက်သူ့အတွက်လည်း အကျိုးထိရောက်မှုရှိလိမ့်မည်ဟုယုံကြည်ထားမိသည်။ထို့ကြောင့်ဟင်းချက်ဖို့ပစ္စည်းများမွှေနှောက်ရင်း စင်တစ်ခုပေါ်မှာအမှတ်မထင်တွေ့ခဲ့ရသော ဆာကေးအိုးကိုသူဖွက်ယူထားမိတာဖြစ်​၏။

ရှောင်းကျန့် ပင့်သက်တစ်ချက်ရှိုက်ကာအသက်အောင့်လိုက်​၏။ မျက်လုံးကိုစုံမှိတ်ပြီး ဆာကေးအိုး​၏အဝကိုနှုတ်ခမ်းဖြင့်ထိလိုက်သည်။ အရသာခံအာရုံကိုလာရောက်ထိတွေ့နေပြီဖြစ်သည့် ဆာကေးတစ်ငုံကို မြိုချလိုက်သည့်အခါ ပြင်းရှရှအရသာတို့က လည်ချောင်းတစ်လျှောက်ဆင်းသက်သွား​၏။

မကြိုက်သည့်အရသာ၊ မနှစ်သက်သည့်ရနံ့ဖြစ်၍ နောက်ထပ်တစ်ငုံထပ်သောက်ဖို့ ရှောင်းကျန့်ဆုံးဖြတ်ရခက်သွားသည်။ သို့သော်လည်း စိတ်ကိုတင်း၍ အသက်ကိုအောင့်ပြီးထပ်သောက်ဖို့ပြင်လိုက်စဉ် ဆာကေးအိုးသည် လက်ထဲမှလွတ်ကျသွား​၏။ အမှောင်ယံမှာကျက်စားနေသည့် ညဇီးကွက်တစ်ကောင်သည် မှောင်ကြီးမည်းကြီးထဲမှာ ဖြောင့်တန်းစွာမတ်တပ်ရပ်နေသည့်ရှောင်းကျန့်ကို သစ်ပင်ထင်၍မတော်တဆ ဖြတ်တိုက်လို့သွားခြင်းဖြစ်မည်။