Bamboo Forest

အပိုင်း (၃၉) Unicode

ဆောင်းရာသီပွဲတော် ကျင်းပဖို့ရွေးထားသည့်နေရာ၌ သူ့ရဲ့လက်အောက်ငယ်သားများနှင့်အတူ ဝမ်ရိပေါ်ရောက်ရှိနေသည်မှာ ညနေစောင်းလို့နေပြီဖြစ်သည်။

"ဝါးပန်းတွေ ပွင့်တော့မယ်ထင်တယ်နော် ခေါင်းဆောင်..."

လူတစ်ယောက်ပြောလာသည့် စကား​၏အတိမ်အနက် ကို ဝမ်ရိပေါ်နားထောင်ရင်း နှုတ်ဆိတ်လို့နေမိသည်။သူတို့ ရောက်ရှိနေရာ ဝါးရုံတောကြီးထဲရှိ ဝါးပင်များသည် အပွင့် ပွင့်ဖို့ အဖူးအငုံတွေလှိုင်ဖူးလို့နေကြပြီဖြစ်သည်။

ပန်းပွင့်တတ်သော ဝါးအမျိုးအစားတို့သည် အနှစ် ၆၀ မှ အနှစ် ၈၀ အတွင်း၊ တစ်ခါတစ်ရံ အနှစ် ၁၀၀ နေမှ တစ်ခါ အပွင့်ပွင့်တတ်တာဖြစ်ပြီး၊ အပွင့်များလှိုင်လှိုင်ပွင့်၍ဝေဆာသွားသော ဝါးပင်သည် ပန်းများပွင့်ပြီးသည်နှင့် သေဆုံးသွားတတ်တာဖြစ်သည်။

ဝါးပန်းများပွင့်ခြင်းဆိုသည်မှာ ကောင်းသည့်ပြယုဂ်မဟုတ်။ ရှေးကအစတည်လာသည့် ဘိုးဘေးအယူအဆတွေအရ ဝါးပန်းများပွင့်ခြင်းသည် မကောင်းသည့်လက္ခဏာကိုဆောင်ကျည်းသည်။တစ်နိုင်ငံလုံး တစ်ပြည်လုံး၊ အင်ပါယာတစ်ခုလုံးနဲ့ သက်ဆိုင်သည်အထိ သက်ရောက်မှုများကို ဖြစ်ပေါ်မည်ဟုလည်း တစ်မျိုးတစ်ဖုံ အဓိပ္ပာယ်ပေါ်လွင်​၏။

"ခပ်သွက်သွက် ရှင်းကြ...နေပျောက်တော့မယ်..."

ဝမ်ရိပေါ်​၏ မှာကြားချက်ကြောင့် ဝါးရုံတောကို ရှင်းလင်းနေကြသူများ မြန်မြန်လှုပ်ရှားလိုက်ကြသည်။ သူတို့ကျေနပ်လောက်သည်အထိ ပွဲတော်အတွက် နေရာအကျယ်အဝန်းတစ်ခုရသွားသည့်အခါတွင်တော့ လက်ထဲက တောရှင်းသည့် ပစ္စည်းပစ္စယတွေကိုချလိုက်ပြီး အမောအပန်းဖြေကာ အိမ်ခြေရာစုဘက်သို့ပြန်ဖို့ပြင်ကြတော့သည်။

ဝမ်ရိပေါ်က ခန္ဓာကိုယ်ထက်မှာ ချွေးတွေစို့နေသေးတာကြောင့် အိမ်ရှေ့ရောက်တော့ ချက်ချင်းအိမ်ထဲပြန်မဝင်သေးဘဲ ဟာရာရှီကိုရေတစ်ခွက်လှမ်းတောင်းရင်းဟိုဒီကြည့်၍...

"ဟိုတစ်ယောက်ရော..."

"ဘယ်တစ်ယောက်လဲ..."

ဝမ်ရိပေါ်က ဟာရာရှီကမ်းပေးလာသောရေကိုမော့သောက်လိုက်ပြီး...