Bamboo Forest

အပိုင်း(၄၈) Unicode

"ဒဏ်ရာနက်တဲ့လူတွေကို ဒီဘက်တွဲခေါ်လာခဲဲ့ကြ..."

ညနေ ညီအစ်ကို မသိတသိ အချိန်ရောက်လာပြီဖြစ်၍ အင်အားစမ်းသည့် တိုက်ပွဲငယ်တစ်ခုကို ရပ်နားလိုက်ကြပြီးနောက် ရှေ့တန်းအခြေစိုက်စခန်း​၏ အနောက်ဘက်ရှိကုသဆောင်တွင် လူများခြေချင်းရှုပ်လို့နေသည်။

ဒဏ်ရာရ စစ်သည်များထဲတွင် အထိပိုနာကြသူများမှာ ရန်သူနဲ့တိုက်ရိုက်တိုက်ခိုက်ရသည့် နန်းတွင်းစစ်သည်များနှင့် ဆာမူရိုင်းတို့ဖြစ်ပြီး၊ နင်ဂျာတို့ဘက်မှလည်း အနည်းအကျဉ်းပါဝင်သည်။

နာကျင်မှုကြောင့် ညည်းညူသံများ၊ အမိကိုတသံများ၊သားသမီးကိုတသံများ၊ အိမ်သူသက်ထားတို့ကို တသံများ စသည့်အသံမျိုးစုံပြန့်လွင့်နေသလို အချင်းချင်းအားပေးစကားသံတို့ကလည်း ပေါ်လွင်နေသည်။ ပေါ်လွင်နေသည့် ထိုအသံမျိုးမျိုးထဲမှ စစ်သည်အားလုံး​၏ အင်ပါယာနဲ့ လူမျိုးအပေါ်ထားသည့် ဇောဖြင့် မာန်တင်းသံများကပို၍ ထင်ရှားလို့နေတော့သည်။

"ဒီလူကို အရင်ကြည့်ပေးပါ...သွေးတွေအရမ်းထွက်နေတယ်..."

ကုသဆောင်ထဲသို့ ရှောင်းကျန့်ရောက်ရှိလာကာ လူတစ်ယောက်ကို တွဲလာပြီး သမားတော်များကိုခေါ်လိုက်သည်။ ရှောင်းကျန့်တွဲခေါ်လာသည့်လူမှာ သူဦးဆောင်သည့် တပ်ခွဲမှစစ်သည်တစ်ဦးဖြစ်ပြီး ခုနကတိုက်ပွဲအတွင်း ဝမ်းဗိုက်နေရာကို လက်နက်ခဲယမ်းထိမှန်ခဲ့သူဖြစ်​၏။ ဝမ်းဗိုက်တစ်လျှောက် သွေးတို့က ရေတံခွန်အလား စီးကျနေတာဖြစ်ပြီး လျှောက်လှမ်းနေသော ခြေထောက်များပေါ်၌ တတောက်တောက်ကျလျက် ခြင်းခြင်းနီလို့နေပြီဖြစ်သည်။

"ဒီဘက်မှာ ချလိုက်..."

သမားတော်တို့က ဒဏ်ရာပြင်းသည့်လူများကို ဦးစားပေးကုသပေးတာကြောင့် ​ရှောင်းကျန့်လက်ထဲမှ လူကို သစ်သားအခင်းတစ်ခုပေါ်တွင်လှဲစေလိုက်သည်။ပထမဦးဆုံးအနေဖြင့် သွေးများတရဟောစီးဆင်းနေမှုကို တားလိုတာကြောင့် ကုသဆောင်ထဲမှာ တွေ့သမျှ အဝတ်စများကိုတစ်လွှာချင်းထပ်ကာ ဒဏ်ရာပေါ်သို့ဖိထားကြ​၏။တစ်ခဏလေးတွင်းမှာပင် စိုရွှဲလို့သွားသည့် အဝတ်စများသည် ဆုံးရှုံးနေသည့်သွေးပမာဏများ​ကို ဖော်ပြလို့နေသည်။