وقفت صافي في حالة يرثى لها في ردهة المشفي بجانب غرفة زين ، وبجانبها الفتاة المشاكسة وهي غير مبالية على الإطلاق بكل ما يحدث ، فقد جاءت فقط لمساندة صافي حين لمست قلقها وتوترها منذ ما حدث .
- متهدي شوية يا صافي أنا مش فاهمة انتي عاملة كل دا على إيه يعني ؟!!
كانت تقطع الردهة ذهابا وايابا بتوتر ، ثم قالت بغضب :
- لارا هو already أنتي مش فاهمة حاجة خالص وبتعصبيني أكتر.. ممكن تسكتي .
- لا مش هسكت أنا عايزة أفهم ، الواد المتلقح جوا دا مسك معتز لعب في وشه البخت وبعدين اتسلبط وقع وعمل نفسه ميت .. اللي هو ماشي بمبدأ ضربني وبكى سبقني واشتكى ، وأنتي سيبتي السايح في دمه وجريتي ورا الواد الرزل دا .. يعني حاجة في منتهى الكوسا الصراحة .
فقالت بعصبية واضحة :
- لارا sharp بقا .. الولد اللي جوا دا بباه هيجي يقلب الدنيا فوق دماغنا كلنا ، دي كارثة.
فقالت لارا باستنكار :
- ليه يعني هو ابن رئيس الحي ، وبعدين أبوه دا هو السبب في الحوار كله .. أنا عايزة اعرف يطلع مين أبوه دا ؟!!
وفي هذه اللحظة ظهر هشام من بداية الردهة يسير في إتجاههم بخطوات واسعة يتخللها الغضب والعصبية ، كما يكسو ملامحه إمارات الاستنكار ، قطع الردهة بأكملها في أقل من خمس ثواني ، وكان يزداد توتر صافي كلما أقترب ، حتى أصبح أمامها مباشرةً ، ابتلعت ريقها ورسمت إبتسامة عذبة على شفتيها ، ولكنه لم يبادلها أياها ، بل تحدث بنبرة خشنة وهو يسأل :
- هو إيه اللي حصل يا أستاذة داحنا حتى لسة مبدأناش ؟!
مسدت صافي خصلات شعرها في علامة واضحة للتوتر ثم قالت بقليل من التلعثم :
- مفيش حاجة خالص يا دكتور .. هو بس واضح أن زين مكنش نايم كويس أو مفطرش الصبح ، فكان بس tension شوية .. يعني مشكلة بسيطة كدا مفيش داعي للقلق .
فنظر لها في ضيق وقال :
- تمام ، هنشوف المشكلة البسيطة دي .. عنئذنك .
اكتفت صافي بابتسامة فقط كرد ،ولكنه لم يعبأ وتركهم وتوجه للغرفة الراقد بها ابنه ، تنفست صافي الصعداء بعد أن اختفى عن ناظريهما ، وشردت قليلا في لحظة خروجه من هذا الباب بعد قليل وبعد ان يعلم ما حدث بالتفصيل ، وبينما هي غارقة في التفكير في رد فعله ، كانت لارا تلكزها في كتفها في صلف دون مراعاة لحالتها ، بل وتقول في الحاح مستفز :
- صافي صافي .. صااافي .
لتصرخ صافي بعصبية بعد أن فقدت السيطرة على أعصابها بسبب هذا الضغط :
- اييييييييه .. عايزة إيه ؟!!
- هو مين المز الاربعيني دا ؟!
فنظرت لها والشرر يتطاير من عينيها ، وقالت باستنكار :
- what stupidity !! ( يا له من غباء )
هيكون مين يعني ؟!! دا بابا زين .
أنت تقرأ
جنّة إبليس
Mystery / Thrillerماذا إذا اجتمع الشر المطلق مع الذكاء ؟! وماذا إذا اجتمعا كلاهما مع النرجسية وجنون العظمة وعقدة نقص دفينة ؟! حتماً ستكون النتيجة كارثة بشرية ، وها أنتم الآن في موعد مع هذه الكارثة ... موعدكم مع شيطان بشري لن تروا في خبثه وتلاعبه وخداعه .. الانتقام عد...
