جنّة إبليس

من البارت القادم 🩶

كل سنة وانتم طيبين قراء جنة إبليس 🥰

وحشتوني ❤️

__________________

- مستر نديم وصل يا دكتور.

- خليه يدخل.
قالها بعدم اكتراث دون أن ينظر إليها، عادت ادراجها من جديد وبعد لحظات ليست بطويلة، دخل نديم بخطوات مترددة بعض الشيء كشفها هشام من اللحظة الأولى، حتى اقترب من المكتب فأمره هشام بالجلوس، فجلس وهو يفك أزرار بذلته ثم قال ببعض الأسف:
- القضية كبيرة أوى..

- ايه التفاصيل؟؟

- مبدئيا هادي رفض تماما إني أدخل معاه أو أن المكتب كله يكون له علاقة بالموضوع.. بس أنا عرفت التفاصيل بطريقتي.
اللي حصل أن واحدة وقفته في الطريق وطلبت منه يوصلها بعد ما اتسرقت متعلقاتها الشخصية، وافق وخدها في طريقه وبعدين دخل بيها في طريق مقطوع واغتصبها ورماها من العربية.
البت قدمت بلاغ من المستشفى اللي راحتلها ادت فيه مواصفاته ونمرة العربية واوصافها دا غير ان فيه فيديو متصور من كاميرا البنزينة وهي بتطلب منه يساعدها ويوصلها.. وفيديو تاني وهي راكبة معاه العربية.

كان هشام ينصت إلى حديث نديم بكامل تركيزه، ولم يتوقف عقله عن التفكير للحظة، وبعد الانتهاء، ظل على صمته لعدة لحظات قبل أن يعقب:
- يعني مفهمتش من هادي اللي حصل فعلا.. وهو عمل كدا ولا لأ.

- الحقيقة من كلامه بيقول أنه معملش كدا وأنها تلفيقة..
ثم تابع ببعض التردد:
- هو شايف أن حضرتك اللي ملفقهاله عشان كدا رفض يتعامل معايا وبلغني أوصلك كلمتين.

قطب هشام حاجبيه وهو يتسائل:
- كلمتين إيه؟

فقال نديم بخبث:
- أعذرني يا دكتور أنا مش هقدر أقولهم..

تسلل الغضب الى هشام حين رد عليه بحدة:
- متخلص يا نديم مش عايز استعباط.

زمّ الرجل شفتيه وقال بحرج:
- شتيمة مش كويسة.

ابتلع هشام رده وأخذ نفسا عميقا أخرجه بضيق، ثم قال لنديم بحسم:
- قوم أطلع برة.

- أنا أسف يا دكتور بس...........

- أطلع برة..
قالها هذه المرة مجلجلة وبصوت مرتفع للغاية، والشرر يتطاير من عينيه، فنهض نديم بتوتر وخرج من المكتب بخطوات واسعة.
استند هشام بظهره إلى مقعده واستراح أكثر في جلسته وحاول السيطرة على غضبه وشعوره بالرغبة في الإنتقام والتدمير، وبعد عدة دقائق انتظمت أنفاسه من جديد وبدأ يشعر بهدوء عام، التقط هاتفه وقام ببعض الاتصالات ليعلم وضع هادي القانوني بعد تحقيقات النيابة ولكنه تفاجئ بقرار حبسه خمسة عشر يوما على ذمة التحقيقات قابلة للتجديد بالتأكيد بسبب الفديوهات التي ظهر فيها مع الفتاة، يتبقى فقط تعرف الفتاة عليه وان أثبت الطب الشرعي ادعائها فلن يخرج منها..