Unicode
"ဝ…လုံး……"
ဧည့်ခန်းထဲမှာခေါက်စားပွဲခုံလေးနှင့် ' ဝ ' လုံးရေးနေတဲ့သားကိုသဝဏ်မီးဖိုခန်းထဲကနေတစ်ချက်လှမ်းကြည့်ကာပြုံးလိုက်မိသည်။ သားကမူကြိုစတက်တုန်းကတော့ငိုယိုနေပေမယ့်လို့နောက်နေ့တွေကျတော့တဖြည်းဖြည်းအသားကျလာပြီးမငိုတော့။ အခုနောက်ပိုင်းဆိုမူကြိုသွားခါနီးဆိုသားကပိုတောင်တက်ကြွနေသေး။
ဘာလိုလိုနဲ့သားမူကြိုတက်တာတောင်တစ်လလောက်ရှိသွားပြီပဲ။ အဟား!…ဒါပေမယ့်သားကအခုထိဝလုံးကိုပဲပြန်ရေးနေရတုန်း။ အစ်ကိုရဲ့တစ်ချက်လွှတ်အမိန့်အရ ' လက်ရေးလှအောင်လို့ဝလုံးရေးလ့ကျင့်ရမယ် ' ဆိုလို့အခုအချိန်အထိသားစာအုပ်ထဲမှာဝလုံးတွေပဲပိုများနေတော့တာ။
အစ်ကိုပြောတာဟုတ်တော့လည်းဟုတ်သား……သားရဲ့ဝလုံးက မလုံးဘဲရှည်မျောမျောပဲပင်ပေါက်နဲ့တူနေတာကို……။
"ဒယ်ဒီ……"
ကိုယ့်အတွေးနဲ့ကိုယ်ပြုံးနေမိတုန်း အနားကိုရောက်လာတဲ့သားကြောင့်ယောင်နနနှင့်မေးဆတ်ပြမိတော့ သားကလက်ရေးလှစာအုပ်လေးနဲ့ခဲတံလေးကိုထိုးပေးလာတယ်။
"သားသားကိုဒယ်ဒီ့နာမည်ရေးပြ……"
ပြောရင်းနဲ့လက်ထဲကစာအုပ်နဲ့ခံတံလေးကိုရှေ့ပိုတိုးပေးလာတာကြောင့် သဝဏ်ပန်းကန်ဆေးနေတာကိုအမြန်ရပ်ကာလက်ကိုအဝတ်သန့်သန့်တစ်ခုနှင့်အမြန်သုတ်လိုက်ရသည်။
အစ်ကိုကသားကိုညစ်ပတ်နေတဲ့လက်နဲ့ထိရင်မကြိုက်ဘူး……။
"ဒယ်ဒီ ရော့……"
သားနဲ့အရပ်တန်းတူဖြစ်အောင်ဆောင့်ကြောင့်ထိုင်ချလိုက်သည်နှင့်စာအုပ်ကိုအတင်းထိုးပေးလာတဲ့သားကြောင့် ပါးဖောင်းဖောင်းလေးကိုဖွဖွလေးဆွဲကာစာအုပ်နဲ့ခဲတံကိုလှမ်းယူလိုက်ရတယ်။
("သားကဒယ်ဒီ့နာမည်ကိုဘာလုပ်မလို့လဲဗျ……")
"သားသားဒယ်ဒီရဲ့နာမည်ကိုရေးတတ်ထားချင်လို့လေ…ဒါမှသူများတွေကိုဒယ်ဒီကဘယ်လောက်ချောကြောင်းကြွားရင်နာမည်ပါပေါင်းပြလို့ရမှာပေါ့……"
YOU ARE READING
Second life ( အချို့သောချစ်ခြင်းတို့သည် )
RandomHydrangeaတွေနဲ့အတူ အမြဲနောင်တရနေလိုက်ပါအစ်ကို။ နောင်တတရားတွေ အားနာစိတ်တွေနဲ့နာနာကျင်ကျင်ရှင်သန်နေလိုက်ပေါ့။
