Second life ( အချို့သောချစ်ခြင်းတို့သည် )

EP - 35

Unicode

ဧည့်ခန်းထဲကဆိုဖာပေါ်မှာစမတ်ကျကျထိုင်နေတဲ့လူတစ်ယောက်။ ခြေထောက်တစ်ဖက်ကိုချိတ်ထိုင်ထားပြီးလက်ထဲကtabletပေါ်ပဲအာရုံစိုက်နေဟန်ရှိသည့်ထိုသူရဲ့အကြည့်တွေကသိပ်ကိုစူးရှလွန်းသည်။ ဖြစ်သလိုစုစည်းထားတဲ့မီးခိုးရောင်ဆံနွယ်တွေနှင့် ဝတ်ထားသည့်တီရှပ်အနက်ရောင်လက်တိုလေးကလူငယ်ဆန်စေပေမယ့်လို့အေးစက်တည်ငြိမ်နေသည့်ပုံစံကကြောက်စရာကောင်းသည့်ဘက်ကိုသာဦးတည်နေလေ၏။

"ပြောကြည့်……ဘာကိစ္စနဲ့ငါ့ကိုသစ္စာဖောက်ရဲတာလဲ……"

အနိမ့်အမြင့်အတက်အကျမရှိဘဲအေးဆေးတည်ငြိမ်သည့်အသံကတစ်ဖက်လူအတွက်တော့ကြောက်စိတ်ကိုပို၍တိုးစေသည်။ ကြမ်းပြင်ပေါ်မှာဒူးထောက်ထိုင်ကာတုန်လှုပ်နေပုံရသည့်သူကိုတစ်ချက်စိုက်ကြည့်ပြီးသဝဏ်မဲ့ပြုံးတစ်ချက်သာပြုံးမိသည်။ ထို့နောက်စီးကရက်တစ်လိပ်ထုတ်ကာမီးညှိနေလိုက်တော့ရှေ့ကလူရဲ့ပုံစံကသူ့ကိုယ်သူသိနေပြီထင်ပါရဲ့ ၊ ကမ္ဘာပျက်သလိုတုန်လှုပ်နေလိုက်တာများ။

"အဟက်!……ပြောရခက်နေတာလား……"

ပြောပြောဆိုဆိုနှင့်ဘေးမှာချထားတဲ့tabletကိုစားပွဲပေါ်ပစ်တင်လိုက်တော့ဆတ်ခနဲတုန်ယင်သွားတဲ့ခန္ဓာကိုယ်။
အခုမှသိပ်ကြောက်နေတာလား……။

စီးကရက်ကိုတစ်ချက်ဖွာရှိုက်ရင်းမီးခိုးငွေ့တွေကိုမှုတ်ထုတ်လိုက်တော့ကြည့်ကောင်းလွန်းတဲ့နှုတ်ခမ်းပါးကဆွဲဆောင်မှုရှိသည့်အသွင်ဆီသို့ပြောင်းလဲပြန်သည်။ သို့သော် ချောမောလွန်းတဲ့ထိုလူငယ်က လူတစ်ယောက်ကိုသေစေနိုင်လောက်အောင်အထိစေခိုင်းနိုင်တယ်ဆိုတာကိုရောဘယ်သူကသတိထားမိပါ့မလဲ။

"ပြောရခက်နေရင်……ငါကလွယ်အောင်လုပ်ပေးမယ်လေ……"

"မ…မလုပ်ပါနဲ့……ပြောပါ့မယ်boss……"

စီးကရက်ကိုနောက်တစ်ကြိမ်ဖွာရှိုက်ရင်းမေးအသာဆတ်ပြလိုက်တဲ့ပုံစံကလူတစ်ချို့ပြောဖူးခဲ့တဲ့အတိုင်းမရဏမင်းပုံစံပင်ဖြစ်တာမို့ထောက်ထားတဲ့ဒူးတွေပါတုန်ရီလာရသည်။
တ…တကယ်ပဲသူသေရတော့မှာလား……။