إمبراطورية الأسود

البارت 42

دخلات نيشان دوشات باش تحيد العرق بزربة و خرجات نشفات شعرها و لحمها ، مشات لخزانتها ختارت حوايج بسييطة جدا سروال جينز و ديباردو فالبلوماري قصير مع قاميجة كارويات كحل و زرق مغلوق عقداتها فخصرها و فرجليها لبسات صباط كحل طالع بسيور ... خلات شعرها على راحتو و بيان سيغ مادارت والو فوجهها حيت اصلا هي فالمعسكر دابا و ماكاين لا مكياج لا زعتر .. خرجات من تما من مور ماتأكدات بلي سدات المكتب مزيان و تمات هابطة لعندهم و تفكيرها غير فين غايمشيو و شنو غايديرو ما هي الا لحظات حتى كانت هبطات لتحت
أبراهام : تعطلتي من صباح و هما كايتسناو فيك
إيفا : ( كاتقلب بعينيها ) مشاو؟؟
أبراهام : كلشي على برا كايتسناو غير سيادتك تشرفي ... خرجو لعندهم لبرا لقاو 3 ديال طوموبيلات كل وحدة من اينا نوع .. ارسلان راكب فسيارة من نوع بولاريس مغطية فالكحل و الحمر .... و مالك راكب مع أسوار فسيارة من نوع غاز تايجر حربية فالكحل و البيض و أديب راكب فسيارة رينو فالكحل ... واقفين مستفين وحدة من مور وحدة .. مشا أبراهام ركب حدا أديب و خلاها واقفة فبلاصتها كاتشوف فين غاتركب هي
أرسلان : ناويا تبقاي تما؟!
إيفا : فين غانركب؟؟ كلشي عامر ... طل عليها اديب من شرجم ديال لوطو
أديب : إيفا دوزي ركبي حدايا ايلا بغيتي
أبراهام : و انا فين ناوي تحطني؟ فالكوفر؟؟ لوطو ديالي هادي ... شاف فيه أرسلان بملامح خالية من التعابير و عاود شاف فإيفا
أرسلان : ( حل لها الباب من الداخل ) طلعي ... بقات كاتشوف فالطوموبيلات لاخرين لعل و عسى تلقا شي بلاصة فيهم ولكن كان باين بلي فكل لوطو كايركبو 2 و هي ماحاملاش تركب مع أرسلان و خصوصا من مور هادشي لي ولا كايوقع مؤخرا بيناتهم و هي عمرها خلات شي حد يقرب لها و لو حتى بشبر داكشي لاش كانت قررات تبقا تتفادا تكون معاه فبلاصة وحدة حيت عارفا راسها هاد المرة لاوقعات شي حاجة موحال تسكت
أرسلان : غا نبقا كانتسناك؟ طلعي
إيفا : واخا ... مشات لجهة لوطو ديالو و طلعات بدا كايشوف فيها من الفوق لتحت و ضور وجهو لجهة شرجم ضحك بإستهزاء
أرسلان : على السلامة
إيفا : فين غانمشيو؟؟ ... ماجاوبهاش و ما هي الا ثواني حتى كسيرا و خلا غير العجاج موراه تبعاتو لوطو ديال أسوار و موراها لوطو ديال أبراهام لي كان جالس فجنبو أديب بقاو غاديين بتنظيم واحد مور واحد اما عند ايفا غير شافتو مكسيري بديك السرعة دارت سمطة حيت عمرها جربات تركب معاه و هو سايق بهاد سرعة بحال إكس يدخلهم فشي حيط شكون عرف .. شافها دارت سمطة و نطق بلا مايشوف فيها
أرسلان : كاتخافي زعما
إيفا : ماشي كانخاف من السرعة ا سي أرسلان غير الإحتياط واجب ماعرفنا اش يقدر يطرا
أرسلان : ماتايقاش فيا!!
إيفا : حاشا تايقة فيك ولكن فبحال هاد الأمور من الأحسن بنادم ياخذ الإحتياط
أرسلان : قلتي لي ماعندكش نقاط ضعف ياك؟
إيفا : ( بثقة ) وي سي أرسلان و هادشي علاش انا هنا باش تتأكد بلي ماعنديش نقاط ضعف
أرسلان : ( بإبتسامة جانبية ) ولكن بان ليا العكس قادر نحس بخوفك من الموت فهاد اللحظة .. خايفا تموتي!!
إيفا : بطبيعة الحال ماخايفاش كاينا موتة وحدة داكشي لاش ماعنديش علاش نخاف
أرسلان : الهضرة ماكافياش
إيفا : ولكن البلاصة لي غانمشيو لها دابا اكيد غاتكون كافية باش تعرف بلي ماكانخافش من الموت
أرسلان : الموت وحدة من نقاط ضعفك ايلا قدرتي توريني بلي ماكاتخافيش منها هادشي ماكايعنيش بلي ماعندكش نقاط الضعف
إيفا : و لاكان هادشي بصح شنو المغزى من هاد المشية ديالنا ا سي ارسلان
أرسلان : ( ببرود ) مليت و بغيت نبدل الجو ...