إمبراطورية الأسود

البارت 131

شافت فيديه و عقدات حجبانها
ريماس : مافهمتش علاش هاد الوشام كامل فيديك
أرسلان : ماعجبكش.!
ريماس : لا ماعجبنيش .. وشمة ولا جوج كافيين ولكن باش تكون واشم صحتك كاملة راه بزاف
أرسلان : ( عينيه على الطريق ) ناوي نزيد واحد
ريماس : علاش واش باقا البلاصة بين غاتزيد بعدا .. شاف فيها بإبتسامة جانبية
أرسلان : باقي بلاصة لبؤتي
ريماس : مافهمتش
أرسلان : دابا تفهمي .. حبس قدام واحد المحل كبير ديال المجوهرات .. نزل من اللوطو و عاود شد فيديها دخلو لداخل كان محل فخم بكل معنى الكلمة شاف مول المحل ارسلان و بقا كايرحب بيه اشد الترحيب حيت هو لي كاينظف لأرسلان الخاتم ديالو و كان كاينظف حتى خاتم جدو .. رحب بيهم و وصلهم فين يجلسو
صاحب المحل : نهار كبير هدا منين شرفتينا فالمحل ديالنا ا سي ارسلان مرحبا و الف مرحبا .. تشربو شي حاجة؟
أرسلان : لا ( شاف فريماس ) عجباتك شي حاجة؟
ريماس : لا عارفني ماعنديش مع هاد تخربيق
صاحب المحل : غير خليني نوريك شي موديلات جداد يقدرو يعجبوكم ا سي ارسلان
أرسلان : شوفي اش عجبك
ريماس : قوليه غير يجيب الموديلات جداد ديال خواتم المارياج
صاحب المحل : تبغي نجيب لك الموديلات ولا نعيط لمصمم المجوهرات ا سي أرسلان
أرسلان : عيط للمصمم .. مشا صاحب المحل يعيط للمصمم
ريماس : غاياخد الوقت بزاف خلينا نشريوهم باش مانضيعوش الوقت كتر
أرسلان : مانبغيش مرتي تلبس حاجة لابسينها غيرها
ريماس : على هاد الحساب ماغانختارش الخاتم ديالك من لي عندهم هنا .. من حقي نختار خاتم كيفما بغيت .. جا لعندهم صاحب المحل و معاه واحد من المصممين .. عطاه ارسلان المواصفات لي بغا لخاتم ريماس و كل ما كايزيد يوصف الخاتم ريماس كاتحاول تتخيلو فبالها ولكن ماقدراتش تتخيلو .. جات نوبتها حتى هي و عطات المواصفات ديال الخاتم لي بغات ريماس لأرسلان كان خاتم رجولي بكل معنى الكلمة .. ورا المصمم اش رسم لأرسلان باش يشوف واش الخاتم هو هداك كيفما بغا ولكن للأسف ماكانش كيف بغا .. عطاه اشارة باش يعطيه الدفتر يرسمو هو
مصمم المجوهرات : ها هو ا سي أرسلان .. شد الدفتر من عندو و قطع ديك الورقة عاود رسمو من جديد كيفما كان فمخيلتو و عطاه للمصمم لي عجبو تصميم داك الخاتم بزاف .. كان خاتم ملكي بإمتياز و فنفس الوقت ديال المارياج .. عطا لريماس تشوف الرسم ديالو للخاتم لي عطات المواصفات ديالو و فعلا كان كيفا بغات .. هي ما وراتش الرسم لأرسلان و ارسلان نفس الشي ماوراش الرسم لريماس
أرسلان : مشينا .. خرجو من المحل من مور ماعطاو للمصمم مقاسات الخواتم .. ركبو فاللوطو و ديمارا فإتجاه اخر
ريماس : غانرجعو للقصر
أرسلان : مزال عندنا واحد الغرض
ريماس : غانمشيو دابا نشوفو الكسوة
أرسلان : وي ( شاف فيها ) ماغاتتدخليش
ريماس : التصميم غاياخد الوقت بزاااف و نتا عارف
أرسلان : ماغاياخدش
ريماس : الكسوة ديال العرس كاتاخد الوقت
أرسلان : غاتاخدو فحالة خدمو عليها غير جوج يدين
ريماس : نتمنى ماتعطيهمش مواصفات شي خنشة
أرسلان : توقعاتك ديما صحيحة
ريماس : ماتنساش راه باقي الطقم لي غايكون من اختياري .. بتاسم ابتسامة خفيفة عرفها كاتهددو بلي ايلا دار لها شي شوهة فالكسوة غادي دير ليه شوهة فالطقم .. كان بدا كايضلام الحال ولكن مع ذلك مابغاش يأجل هاد جوج حوايج حيت مابقاش بزاف للعرس و هاد اليامات لي دازو كانو بجوجهم مشغولين غير العائلة لي وجدو تجهيزات العرس و المراسم لي غادي يديروهم .. وقف قدام واحد المحل كبير ديال فساتين الاعراس لقاو واحد المرا كبيرة و انيقة فإنتظارهم رحبات بيهم و مع بغات توري لأرسلان الفساتين ديال الاعراس لي كاينين حبسها ارسلان و قالها تعيط للمصممة .. جات المصممة سلمات عليهم و جلسات قدامهم يلاه بغات ريماس تركز مع هضرتو باش تعرف اش غايقول حتى جات عندها مولات المحل
مولات المحل : ( بإبتسامة ) تبعيني ا مدام ريماس باش تعطي المواصفات ديال الطقم لي باغا لسي أرسلان
ريماس : ( مراقبة ارسلان اش كايقول ) من بعد من بعد
مولات المحل : على ماعرفت العرس ديالكم مابقاش ليه بزاف ا مدام و الوقت كايطير من الاحسن تعطينا المواصفات دابا باش نخدمو عليه .. شافت فيها ريماس بضجر و مشات معاها