إمبراطورية الأسود

البارت 129

طاح فبالها واحد السؤال واش ممكن يكون أرسلان سادي؟! .. نفضات هاد الفكرة من بالها و نسبات تعاملو معاها فبحال هاد الأمور ناتج على انه ماكايعرفش الرحمة مي اكيد غايتبدل هادشي فاش مايبقاش يقتل .. هاكا كان تفكيرها .. خوات بالها من هاد التفاهات كيفما سماتهم و مشات تنعس اما عند ارسلان من مور ما مشا للسويت ديالو دخل دوش و لبس غير شورط مانعسش .. مشا جلس فوق واحد الفوطوي و بقا كايسترجع لحظاتو معاها اصلا هادشي لي عندو .. مجرد سلسلة صور لقبلات او احضان كادوز ليه فبالو الأسوء فالأمر هو هادشي مابقاش كافيه .. داكشي علاش ولا كايتخيل لحظاتو معها وقت المعاشرة الزوجية ولكن ما ان كايسالي الشريط حتى كايلقا راسو عندو غير سلسلة من الصور الوهمية لي ختالقها هو .. غير ملموسة و غير محددة و هادشي غير ماكايزيد يسخطو .. ها هي حداه ماكايفرقهوم غير مترات ولكن مايقدرش يقيسها ماشي على ود دينو ولكن باش ماتكرهوش عارفها كاتبغيه و حتى هو مهووس بيها ولكن راه اي تصرف غلط منو غايخليها تتقلب عليه كي الزمان .. بالنسبة ليه ريماس بحال شي ألماسة متقنة القطع و النحت .. لامعة و زوينة ولكن واخا هادشي الا ان هاد الألماسة عندها وجوه متعددة بحيث كل طبع من طباعها كايبهر عينيه و يعميه على النواحي الأخرى من شخصيتها .. تذكر شي حاجة خرا و حل واحد المجر و جبد منو كتاب بقا كايقرا فيه بحالا كايقلب على شي حاجة محددة ولكن مالقاهاش .. بقا على داك الحال حتى وصلات 3:00 ديال الليل سد الكتاب و مشا ينعس .
صبح صباح جديد فاقت ريماس مع ل5:00 دارت روتينها الصباحي و كالعادة فاش بغات تلبس سورفيط مالبساتش جيلي الفوقاني بقات غير بدخلاني لي كان لاصق و قصير .. حتى كانت خارجة شوية و هي تتفكر واحد الحاجة .. مشات لجهة صبابطها و بدات كاتقلب على واحد صباط حتى لقاتو جبدات كلينيكس لي كان وسط منو حلات كلينيكس و جبدات الخاتم ناوية ترجعو لأرسلان حيت اصلا مابقاش نافعها دابا .. هي كانت بغاتو غير باش تكشف اصلان ولكن دابا اصلان مات .. حلات الباب و دخلات كعادتها بلا دقان لقاتو كايتسناها
أرسلان : هضرت لك على الحوايج البارح
ريماس : صباح الخير
أرسلان : كاتبدلي الموضوع
ريماس : مابدلتوش مي شفت على الصباح باغي تبدا الخصام قلت نأجلوها حتى لمور الفطور
أرسلان : ( شاف فيها ) و باغا دابزي
ريماس : ايلا بديتي علاش لا
أرسلان : شفتي إيلينا البارح ولا ماشفتيهاش
ريماس : دابا علاش هاد المقارنات على الصباح
أرسلان : واش شفتيها كي ساترة راسها؟!!!
ريماس : هاديك إيلينا و انا ريماس .. بدلات دينها مزيان فرحت لها ولكن ماتقارنيش بيها حيت هي شكل و انا شكل ماتنساش المسلمين دايرين هاكاك و مادام راجلها لي هو خوك اسوار دخل الاسلام و دخلها حتى هي للاسلام حاجة طبيعية تلقاها لابسة داك اللبس
أرسلان : و نتي ماكنتيش مسلمة!!
ريماس : كنت و هادشي كان فالماضي ماشي دابا
أرسلان : علاش ماكنتيش كاتستري راسك بحالها
ريماس : واقيلا راه قلت لك خرجت من الاسلام غير باش نتفك من قيود اللبس و ناخد حريتي
أرسلان : دابا نشوفو شحال غايبقا راسك قاصح .. بدا أرسلان معاها فأمور دينية كايعطيها اسئلة و كاتجاوب عليهم و نفس الشي ريماس كاتعطيه اسئلة و يا لصدمة كان كايجاوب عليهم و كايعطيها مقارنات حتى شاف ارسلان فالساعة و قالها باش يحبسو حتى لغدا
ريماس : غانعاود نقولك غير كاتعيي راسك
أرسلان : داك الراس ايلا مارطابش غانهرسو لك
ريماس : هادشي ولا فيه التهديد
أرسلان : ماكانهددش .. كانطبق و نتي عارفاني نديرها .. شافت فيه و قلبات عينيها بغيظ .. جبدات الخاتم من جيبها و مداتو ليه ليدو
ريماس : كانظن هاد الخاتم كايخصك و هادي مدة كنتي كاتقلب عليه .. بقا كايشوف فيها و فالخاتم و لحد الساعة مستغرب فين كانت مخبعاه بالضبط حيت فاش سيفط ابراهام و مالك هضر معاهم يقلبو شومبر ديالها قنت بقنت ما مرة ما جوج ولكن كانت النتيجة نفس الشي ماكايلقاوهش حتى دخل الشك انها تقدر تكون خبعاتو خارج القصر .. هزو و خشاه فجيب الفيستا ديالو .. حل واحد المجر حداه و جبد واحد الظرف كبير و عطاه لها
أرسلان : هادو كايخصوك
ريماس : ديالاش هاد الظرف؟
أرسلان : حليه و تعرفي .. حلاتو و لقات كارط ناسيونال ديالها و الباسبور و الفيسا و رخصة السياقة لي رجعها لها على حسب فلسطين و جميع البطاقات البنكية ديالها .. عاود جبد ملف شداتو و لقات فيه جميع الاوراق ديال أملاكها فالمغرب بيان سيغ غير المحلات حيت الشركة دارت فاييط منين غبرات عليها عام .. شداتهم و جمعاتهم
ريماس : شكرا .. نيت كنت محتاجاهم
أرسلان : عادي
ريماس : خاصني نبدا الاجرائات باش نأسس شركة هنا
أرسلان : مور الفطور غانمشيو
ريماس : فين غانمشيو؟؟ ياك انا لي غا نوقف على شغلي بيدي
أرسلان : كانظن بلا مانعاود نحيي ذاكرتك بلي مابقا والو و تكوني مرتي
ريماس : اوسي كانظن بلا مانفكرك بلي قلت مابغيت حتى شي مساعدة حيت قادرة نطلعها راسي
أرسلان : ماغانعاونكش .. غانكون معاك
ريماس : و بنادم فاش غايشوفك معايا غايولي يتساهل معايا غير حيت نتا كاين معايا .. انا مابغيتش هادشي و مابغيت حد يتساهل معايا بغيت نوصل بمجهوداتي