إمبراطورية الأسود

البارت 66

شدات راسها لي بدا كايضور عليها كون ماتكالاتش مع الحيط كون جات طايحة للأرض
ريناد : ( مخلوعة ) ختي ريماس مالكي؟؟؟؟؟؟؟
فادي : ختي ريماس واش نعيطو للطبيب؟؟؟ سمية شيمااء فينكم ... رجعات شدات توازنها و بتاسمات لهم ابتسامة خفيفة باش طمنهم
ريماس : والو ا كبيداتي ماشي شي حاجة بلا ماتشوشو غير العيا
فادي : ( بقلق ) ختي علاش ماكاتعطيش الراحة لراسك
سمية : ( جات كاتجري ) مالك ا لالة؟؟؟
ريماس : ماشي شي حاجة واش الكوطي واجد؟
سمية : واجد ا لالة واش نحطو دابا
ريماس : حطيه
سمية : سمحيلي ا لالة على التدخل ولكن وجهك كايبان صفر مافيهش الدم
ريماس : غير بالعيا سيري حطي الكوطي .. كبيداتي غانطلع ناخد دوش باش نحيد العيا شوية و نرجع
فادي : غانطلع معاك ا ختي باش ماطيحيش فالدروج
ريناد : ختي علاش هاد الأيام وليتي كاتسخفي بزاف؟
ريماس : وال ا رينادتي ماديريش فبالك و ديها فقرايتك هادا غير العيا
فادي : ختي خاصك ضروري الطبيب
ريماس : وا صافي هاني وصلت من بعد و نشوفو هبطو تسناوني
ريناد و فادي : واخا ا ختي .. دخلات للبيت و مشات نيشان جلسات فالناموسية كاتحس براسها باقي كايضور عليها دخلات دوشات و رجعات لعندهم ... داز داك نهار و جا النهار الموالي
أصبحنا و اصبح الملك الله
فاقت عيانة ولكن مع ذلك كابرات .. دارت روتينها الصباحي و فطرات مع خوتها و توجهات للشركة .. بدات خدمتها و كاتحاول ما امكن تركز فخدمتها و تتغلب على الدوخة ... جا وقت الغدا هبطات لتحت باش تتغدا سالات و رجعات لخدمتها ماخلات ماشربات باش تتحيد منها الدوخة ولكن باقا على نفس الحالة و نفس الدوخة لي ولات كاتجيها هادي 10 ايام .. هاكا داز عندها النهار و لأول مرة كاتتسناه يسالي بفارغ الصبر باش ترجع للدار .. ما دوزات داك النهار غير بمشقة الأنفس ماعارفاش سبب الدوخة المفاجئة لي ولات كاتجيها .. جا لعندها الشيفور للشركة ركبات و توجه بيها للفيلا
الشيفور : انسة ريماس مالك؟؟؟ كاتباني لي عيانة
ريماس : ماعرفتش غير واحد دوخة ولات كاتجيني و ماعرفتش سببها
الشيفور : شربتي شي حاجة باش تطيرها لك؟؟؟
ريماس : شربت واحد دوا خفيف عندي عطاتو لي الخدامة و صافي
الشيفور : اينا وحدة من الخدامات ا انسة ريماس؟
ريماس : سمية
الشيفور : تقدري تجربي هاد الدوا؟؟ يقدر يفيدك ا انسة ريماس
ريماس : واخا ارا ... شداتو من عندو و شربات الما من موراه و فعلا نفعها و بدات كاتحس براسها كاتواكض
الشيفور : دابا شوية؟
ريماس : دابا حسن من اللول شنو سمية هاد الباسطيات؟
الشيفور : ******** ... صافي وصلنا
ريماس : نفسهم لي كنت كانشرب ولكن هادو فادوني حسن من لاخرين متأكد هادي هي سميتهم؟
الشيفور : انسة ريماس نقدر نهضر معاك فشي حاجة مهمة كاتخصك؟
ريماس : ( بإستغراب ) واخا هضر كانسمعك
الشيفور : هاد الموضوع خطير و عرفتو غير عن طريق الصدفة
ريماس : كانسمع هضر اش واقع؟؟؟
الشيفور : انسة ريماس نتي.. ... تحلات الباب لي من جهة ريماس
ريناد : ختي ريمااااااس جييتي
ريماس : ختي الغزالة جايا بعجاجتك
ريناد : اجي دغيا شوفي شكون جا لعندنااااا
الشيفور : انسة ريماس
ريماس : من بعد و قوليا
الشيفور : ولكن .. ماخلاتوش يهضر و خرجات هي و ريناد لي كانت جاراها من يديها .. دخلات لقات سي راضي و لؤي و مريم مشات كاتجري عنقات سي راضي
سي راضي : ( بقلق ) بنتي ريماس كي بقيتي
ريماس : كي غانبقا اكيد بيخير أهلا مريم لؤي صافا
مريم : ايلا مازرناك ماتزوريناش نهاااائيا زعما حنا يهود
لؤي : تواضعي معانا شوية و نوري لينا الفيلا بجمالك الخلاب
ريماس : سكت ا ضاسر كون تحشم .. نو ماشي هاكاك غير تشغلت مع الخدمة و صافي هادا ماكان
سي راضي : سمعت بلي ولات كاتجيك شي دوخة داكشي لاش جيت نشوفك .. واش مشيتي تشوفي الطبيب؟؟ ماتقوليش ليا مامشيتيش
ريماس : نو ا عمي راضي تلهيت غير مع الخدمة و صافي مالقيتش الوقت والله
سي راضي غدا غاتمشي للطبيب و هادي اخر هضرة متافقين؟؟؟
ريماس : واااخا متافقين
لؤي : باغا تحرمي عويناتي من هاد الزين قبل الوقت
مريم : بعد من البنت القرد ... دوزو ديك العشية ضحك و نشاط ريماس كانت موااكضة معاهم هاد المرة تعشاو و ودعوهم و مشاو .. طلعات تنعس من مور ماتمنات ليلة سعيدة لخوتها غير حطات راسها على المخدة و غفات .. بدا نهار جديد مليئ بأحداث جديدة .. فاقت دارت روتينها الصباحي و فطرات و خرجات لقات الشيفور كايتسناها .. رجعات لها الدوخة تاني
الشيفور : انسة ريماس
ريماس : ششش عافاك تال عشية فاش نكونو راجعين و هضر
الشيفور : ولكن ا انسة ريماس .. قاطعو طيلي لي كان كايصوني ...