إمبراطورية الأسود

البارت 71

صوباتو فإتجاهو غير مدركة لخطورة داكشي لي دارت دابا ... ماعارفاش بلي جميع الحدود تجاوزاتهم ... الشخص كايغلط غلط بسيط و بدون قصد معه و كايكون جزائو هو الموت ... كايهز فيه غير العين و كايكون جزائو الموت .. هي ماشي ولات كاتغلط اغلاط بساط ولا كاتكتافي غير بتخنزيرات لا لا لا .. هي ولات كاتوصلها للسبان و محاولة القتل و الغوات و زيد و زيد ولكن غير منين مزال حية واخا عارفها كانت جاسوسة هادي بنفسها معجزة حيت الجواسيس لي قبل منها كلهم ماتو على يديه بطرق يقشعر منها البدن ولكن يا ترى صبرو شحال غايدوم؟ .. صوبات السلاح لجهتو
ريماس : دابا غاتعيط لكلابك يجيبو لي خوتي ولا غانتبعك لرجالك
أرسلان : فنظرك ايلا طلقتك غا تبقاي حية!!
ريماس : ماكايهمنيش رجع لي خوتي سربييي عيط لهم .. خشا يديه فجيبو و نطق بكل هدوء
أرسلان : ( بهدوء ) من مور هاد الشارع كايتسناوك 4 ديال رجال .. فالشارع لي على جنبك ليسر كايتسناوك 2 رجال و حاليا مراقبينك كايتسناو الفرصة لي تكوني فيها بوحدك .. فالعمارة التانية لي على جنبك ليمن واقف قناص فالطبقة 18 كايتسناني غير نمشي ( جبد طيلي و حطو فودنيه ) و نقولو وقف معاك الحظ حتى هاد المرة و فلتي من هادو .. غادي تلقاي 2 طوموبيلات كايتسناوك فالدخلة ديال المدينة و 2 فالخرجة ديال المدينة .. ( حبس هضرتو و هضر فطيلي ) جيبهم للشارع ***** ... بدات كاتحقق من البلايص لي قال لها و فعلا لقات واحد الليزر مضروب فيها ضارت للجهة الثانية و فعلا لقات 2 رجال مراقبينها يعني محاصرة من جميع الجوانب
ريماس : رجالك هادو و نتا لي غاتهضر معاهم باش يخليوني نمشي و داااابا ولا كون اكيد ماغانترددش باش نقتلك
أرسلان : ايلا هضرت معاهم و مابقا حتى واحد فيهم قرب لجهتك شحال غاتبقاي عايشة نتي و خوتك؟! شهر!! ... شهراين؟ ... عام؟
ريماس : قادرا ندافع على راسي و خوتي .. ماغانخليكمش تأذيوهم فاااادي و ريناد نقتتتتل على ودهم و نشرب دم بناااادم على ودهم
أرسلان : ( ببرود ) قادرا دافعي عليهم من الفايروس لي كاين فالدم ديالك فالوقت الحالي نتي و خوتك؟!
♚ سي أصلان : كيفاش باقا حية الأغبياء؟؟؟؟؟
***** : سي أصلان راه جا مالك فاللحظة الأخيرة و نقذها
سي أصلان : علاش مزال ماقتلتوها؟؟؟؟؟ علاش مزال حية؟؟ ياك رجالنا محاصرين كاع الشوارع لي تما؟
***** : ميستر أرسلان معاها ا سي أصلان داكشي لاش ماقدرناش نقتلوها .. قطع عليه و بدا كايضرب يديه مع طبلة
سي أصلان : واش باغي يحممممقني؟؟؟؟ بغيت غييير نعرف اش هادشي تسلط عليا ولكن غاااااانقتلها بيدي
أسوار : جدي شكون غاتقتل؟؟
سي أصلان : جيتي مزال ماوجدتي راسك؟ طيارة عندكم الليلة
أسوار : كلشي واجد ولكن ا جدي ماجاوبتينيش شكون باغي تقتل؟؟
سي أصلان : من ايمتا و نتا كاندخل فشغالي سير شوف مراتك
أسوار : ( حس بنغزة فقلبو ) جدي واش مخبع عليا شي حاجة؟؟
سي أصلان : صافي داكشي لي بقا خاص غير تحاسبوني ... مشا من تما و خلا حفيدو ما مرتاحش ولكن لي متأكد منو أسوار هو الموضوع كايتعلق بيه حتى هو مادام مابغاش يقوليه .. هز طيلي ديالو و دوز نمرة ديال مالك هو لي كايكونو عندو جميع الخبارات ...