إمبراطورية الأسود

البارت 101

ريماس : ( ضربات راسها ) اووف نسييتو
ام العروس : ياك قلت لك تبقاي تهزيه معاك باش ماتشدش فيك القوى السلبية .. نتي تبارك الله زوينة و الشعر عندك كايشد العين ماعطيت لك داك الكتاب باش يحميك حتى عتابرتك بحال بنتي ماشفتيش غير دخلتي كي بقاو يشوفو فيك .. حطات ريماس يديها على كتف ام العروس
ريماس : هههه واخا واخا هاني غادا نجيبو
ام العروس : و ماتتعطليش العرس راه بدا
ريماس : دقائق و نكون عندك .. رجعات لدارها هزات الكتاب لي كان عبارة على ورقة صغيرة داخل سلسلة دايرة الخاطر للمرا و صافي .. عاد عاودات رجعات للعرس بقات كاتتحرك من هنا لهنا كاتعاونهم فتوزيع المشروبات بحالها بحال البنات لاخرين
♚ وصل للجزيرة هادي ربع ساعة .. لقا واحد الراجل كايتسناه بالطوموبيل ركب و توجهو للعنوان لي عندو و ابتسامة مابايناش بزاف مرسومة فوجهو و اخيرا و بعد عام غادي يشوف البنت لي تربعات على عرش قلبو ...

♚ واقف من بعيد ببذلتو الرسمية و وقفتو الرجولية .. حاضيها من بعيد غير كاتجري من هنا لهنا بداك طالون و فيديها البلاطو ديال المشروبات كاتعاون بنات الجزيرة فالتقديم ماركزش فحوايجها قد ما ركز فأنها قدام عينيه دابا .. بقا كايقرب بخطوات ثابتة لجهتها تحت نظرات سكان الجزيرة لي غاياكلهم فضولهم شكون هدا .. باينا فيه بلي غريب على الجزيرة .. واش شي واحد باغي يدير مشروع فجزيرتهم؟؟ واش ضي واحد باغي يشري جزيرتهم؟؟؟ كالعادة التساؤلات كثرات و الضيوف تحولو نظراتهم لجهة ريماس لي هازة البلاطو و كاتعيط لوحدة من بنات الجزيرة و لأرسلان لي واقف موراها يكون زعما كايجيها؟ ولا يكون راجلها؟ ايلا كان راجلها شكون هداك لي كايجي عندها ما بين الفترة و الفترة
ريماس : ( بصوت عالي ) مييييري هاكي البلاطو راني عمرتو
أرسلان : و للمرة الثانية كانطلاقاو من مور عام .. تغلغل صوتو بين مسامعها و ما ان عرفاتو حتى طاح البلاطو من يديها بالصدمة واش هو نيت؟؟؟؟ ولا غير جاب لها الله لا لا هدا صوتو و مايمكنش تنساه و كيفاش غاتنساه و هو مرة مرة كان كايتسلل لأحلامها .. ضارت لعندو بالعرض البطيئ باش تزيد تتأكد منو .. توسعو عينيها بالصدمة .. المفروض ماغايلقاهاش هنا .. المفروض ماغاتعاودش تشوفو .. المفروض نهاية هادشي كامل كان فالقصر و كانت هاديك صفحة و قطعاتها من دفترها .. تصنعات عدم الصدمة و جاوباتو عادي
ريماس : أرسلان؟ .. جبد يدو من جيبو و دوزها على ذقنو بينما عينيه كايتفحصوها انش بإنش من راسها لرجليها .. الشعر لي طالقاه .. الكسوة لي معرية ... قرب لودنيها شوية و نطق بهمس
أرسلان : تسبقيني ولا نهضرو هنا!!
ريماس : علاش غانسبقك؟؟؟ ... و علاش تابعني حتى لهنا؟؟؟؟؟؟ .. خطف نظرة لجهة الرجال لي كانو كايشوفو لجهة ريماس .. جرها من يديها و بقا غادي بيها اللوطو .. بقات كااتعكس ليه فالطريق حتى تهرس لها الطالون و كانت غاتتفدع ليها رجليها .. ماخلات ما قالت ليه و الضرب فيديه .. حتى جات ام العروس و خوتها و بعض رجال الجزيرة باش يفهمو اش واقع
ريماس : ( بالدارجة ) طلق من يدي راك شوهتيني واش ديما الشوهة فوقما نشوفك كاديرها
ام العروس : ( كاتشوف فأرسلان ) بنتي ريماس واش كاين شي مشكل .. رجع ريماس موراه و هضر معاهم
أرسلان : باغي نرجع مرتي عندكم شي مشكل!!
ريماس : ارسلان سكت ماتزيدش تكدب عليهم
اخ العروس : ( بصرامة ) طلق منها .. شاف فيه أرسلان ببرود عرفاتو غادي يحاول يقتلو .. من حسن حظو قبل مايجبد ارسلان الفردي ديالو و يتيري فيه حطات يديها على اليد لي خشاها باش يجبد الفردي ديالو .. ضار شاف فيها بشوفة مامفهوماش
ريماس : خلينا نتفاهمو باللتي هي احسن .. هما ما دارو والو ... شافت فالرجال لي جاو يفكوها منو
ريماس : ( بإبتسامة إطمئنان ) كانعرفو .. شوية و غادي نرجع غير كملو العرس
ام العروس : بنتي متأكدة نخليوك معاه؟؟
ريماس : وي خالتي متأكدة ماغايوقع لي والو
ام العروس : ماتتعطليش بزاف باش تكملي معانا العرس
ريماس : واخا ا خالتي
اخ العروس : ايلا وقعات شي حاجة غادي تلقايني حداك
ريماس : ميرسي رودريغو
صديق اخ العروس : ردي البال لراسك
ريماس : ميرسي مارتن
أرسلان : ساليتي؟!
ريماس : ( بعصبية ) صافي ساليت .. دخلها اللوطو و ركب من مور ما خرج الشيفور من تما ... كسيرا و خلاهم خايفين عليها لاتوقع ليها شي حاجة و خصوصا هما عارفين طبعها و هدا باين فيه ماكايتفاهمش ... كان صايك و هي راكبة حداه هضر بهدوء و عينيه على الطريق
أرسلان : ماقلتيش ليا!! ... عجبوك شوفات الرجال ليك ياك؟ .. ماجاوباتوش و تجاهلات هضرتو
ريماس : الصمت
أرسلان : علاش لي مازدتيش قطعتيها؟! مخلية 4 سنتيمتر شاداها ... حسات بالاعصاب طالعين معاها ولكن فضلات تسكت باش ماتقربلهاش معاه عاوتاني و يصدق قالب بيهم طوموبيل .. ماعرفاتش بلي سكاتها غير مازاد شعلو
ريماس : الصمت
أرسلان : فاش نسولك جاوبي
ريماس : فاش بغيتيني نجاوبك ا أرسلان؟؟؟ واش انا اصلا ماكنتش كانشوف فيهم و ماشفتش كي كايشوفو فيا و دابا كاتسولني عليهم؟؟؟ ... اصلا ماسوقيش كي كايشوفو فيا و حتى نتا ماشي شغلك
أرسلان : و سوق من هدا؟! شحال من مرة هضرت معاك داك الشعر جمعيه .. فرحانة بيه ياك؟!!
ريماس : الصمت
أرسلان : لحمك زاغ عليك .. و فمك غير حالاه كون ماضحكتيش و هضرتي معاهم و نتي كاتنطقي بسمياتهم كاع مايشوفو فيك ...