إمبراطورية الأسود

البارت 133

هزات عينيها فيه و اشارت براسها بمعنى لا
أرسلان : ( بحدة اكثر ) ريماس دفليييه
ريماس : ( اشارة الرفض ) .. حيدات يديه عليها و دارت راسها بحالا غاتسرطو كإستفزاز ليه ماحسات براسها حتى ضربها لكرجوطتها مع حلات فمها شد لها فمها و حلو
أرسلان : تسرطيه نخليك تولي ضحكي و سنانك رايبين .. دفلاتو و مسحات فمها
ريماس : دفلتو .. قرب لفمها لقا فيه ريحة الشراب شدها من يديها و جرها للدوش حل الما بغا يغسل لها فمها و منعاتو بيديها بدات كاتغسلو هي .. وقفات باش تمسح فمها و زاد قربها ليه لقا باقي فيها ريحة الشراب
أرسلان : زيدي غسلي
ريماس : اش غانغسل؟ .. ياك نتا براسك شحال من مرة كانشم فيك ريحة شراب و ماكانقولك والو
أرسلان : ( بحدة ) انا راجل ا ريماس
ريماس : المفروض نتا لي ماخاصش تشربو ماشي انا اااه ولا نسيت الصهاينة عندهم حلال الشراب
أرسلان : بيتك
ريماس : ماغانمشيش و ماتبقاش تتدخل فيا شنو لبست و شنو مالبستش شنو شربت و شنو ماشربتش .. حط يدو من مور راسها و جرها
أرسلان : ايلا نسيتي دينك انا نفكرك فيه
ريماس : ماتفكرنيش و ماطلبتش منك ا ارسلان فكر غير راسك نتا لي بنتي لي تخربقو لك الخيوط
أرسلان : ( بحدة ) رييماس
ريماس : ( بنفس الحدة ) أرسلان ماتضغطش عليا على شي حاجة ماباغاااهاش
أرسلان : غاتبغيها و بزز عليك
ريماس : ماتغوتش عليا .. ماقبلتش نتزوج بيك باش تبدا تبزز عليا حوايج نتا براسك مامقتانعش بيهم حيااتي هادي
أرسلان : ( هز صبعو بتهديد ) غانبزز عليك و بزز عليك غاترجعي لدين الحق
ريماس : ( بسخرية ) دين الحق؟ نتا كاتعرف شي دين الحق بعدا؟ اش وليتي كاتخربق ا ارسلان .. هز يدو حتى للسما كان غايجمعها معاها بتصرفيقة ولكن توقف فأخر لحظة و حولها لقبضة ضرب بيها المراية لي كانت موراها حتى تشخشخات غير بسبب وقاحتها
أرسلان : خرجي باش مانغلطش فيك
ريماس : ماكنتيش تحتاج نقولها كنت غانخرج راسي ولكن قبل مانخرج حاول تفهم راسك و عرف راسك من رجليك و فهم علاياش كاتهضر كون كنتي باغي تقنعني بدينك كان ممكن نقتانع بيه حيت نتا مقتانع بيه ولكن باش تبغي تقنعني بحاجة فقط حيت شفتي فيها حوايج مناسبينك هدا راه سميتو تخربيق .. خرجات من تما من مور ماشعلات فداخلو بركان ولكن علاش؟ حيت ببساطة مايمكنش يأذيها باش يبرد و مايمكنش يقتلها باش يبرد كيفما كايدير مع الكل يعني ماكايناش شي حاجة لي كاتعصبو فالدنيا قد ريماس و واخا كاتعصبو الا و انه مايقدرش يأذيها أپار غا تنفر منو هو مايقدرش يأذيها و بسبب هادشي لي كايوقع لو معاها بعض المرات ماكايقدرش يميز نبرة الكدوب فصوتها ماشي حيت هي ماهرة باش تخفيها ولكن كاتخليه مايركزش فيها .. اما ريماس من مور ماشعلات نار الغضب فيه بإستفزازها و فعلتها خرجات لبيتها بضمير مرتااح لقاتهم جابو لها اللويزة شرباتها و نعسات عكس ارسلان لي الليل كامل مانعس اش كان كايدير و علاش بقا فايق الله و اعلم .

°° صباح اليوم التالي °°

فاقت ريماس هاد النهار مع ل5:00 دارت روتينها الصباحي و قررات تمشي تلعب سبور بكري حيت النهار عندها عامر بزاف .. خرجات من شومبر و شافت فالباب ديال ارسلان كانت مسدودة عاقلة بلي خلاتو البارح معصب بقات كاتفكر واش تمشي تطل عليه ولا بلاش .. زعما يكون كايتسناها بحال ديما باش يقنعها؟ ولكن هو البارح ماقالش لها اجي .. قررات تمشي لعندو و تشوف واش فايق و كي صبح من مور البارح واخا كلشي ماكاتبغيهش يبقا معصب .. مشات لجهة الجناح ديالو و بقات كاتفكر واش تدخل ولا لا قررات تدخل .. حلات الباب و دخلات شافت جهة ناموسيتو ماكانش ناعس .. زادت دخلات و شافت فالبلاصة لي كايكون جالس فيها مالقاتوش حتى لواحد الشوية لمحات عينيها شي حاجة حدا لاطيراس .. بقات كاتقرب خطوة بخطوة و عينيها غير ماكايزيدو يتحلو بسبب الصدمة لي لحد الساااعة ماقدراتش تستوعبها .. قلبها بدا كايضرب بالزربة و الفرحة تسللات لقلبها لا ماشي تسللات و انما ختارقات قلبها ماعرفاتش واش كاتحلم ولا فعلا فايقة واش فعلا هادشي واقع ولا لا ... واش فعلا نجحات؟؟؟ واش فعلا قدرات تبدل واحد بحال ارسلان؟؟؟ واش نجحات فأنه يدخل للإسلام .. كان ارسلان الصهيوني قباض الارواح لي من نهار حل عينيه فالدنيا و هو صهيوني هاد النهار ها هو ساجد فوق الصلاية فإتجاه القبلة ...