إمبراطورية الأسود

البارت 132

رجعو لعندهم من مور مانصحات اديرة ريماس باش ترد البال خصوصا فهاد الفترة ديال المراسم .. عياو معاها تخلي داك الخليط فراسها حتى للصباح باش يديرو لها الحمام لي كايديرو لعرائسهم و الطقوس لي كايحميو الزوجين ولكن حلفات لا بقات بيه غير سالاو المراسم طلعات بالزربة للشومبر ديالها دخلات للدوش باش تفك ديك الحريرة لي دارو لها فشعرها بقات تغسل و تعاود .. كملات نهارها عادي بين خوتها فادي و ريناد لي هبطو عليها بالأسئلة على قضية الدين ولكن سدات الموضوع بجملة وحدة الموضوع طويل .. و كيفما كان قالها ارسلان غايغبر فعلا داك النهار مارجعش للقصر حتى لوقت متأخر فالليل دخل لقاها ناعسة قرب لعندها جر لها الغطا لي كان محيد عليها غطاها بيه و مشا لجناحو باش مايديرش شي تصرف يخليه يفقد سيطرتو .. صبح صباح اليوم الموالي فاقت دارت الروتين الصباحي من غسيل و لبس و سبور و فطور و مشات مع اديرة و ختها و جوليانا و شيرا و ايلينا و جميع نساء القصر دخلو لواحد الحمام صغير فالجهة الثانية فالقصر داير بحال حمام تركي تجمعو العيالات الكبار و بداو كايقراو شي تعاويذ و تمائم باش يحميو زعما ريماس و ارسلان من السحر موراها جابو واحد الصهريج عامر ما و دخلو جوج خدامات وحدة فيهم هازة صينية فضية فيها طبسيل ديال العسل و الثاني هازة صينية فضية فيها كاس ديال الخمر و مشطة .. عطاو داكشي لأديرة لي لاحتو فالصهريج كقربان زعما .. سالاو من هاد الطقس و جا وقت الغسيل .. و بدون ماتعدب اديرة راسها و تبعد عيالات لوايسها و بناتهم خوفا من السحر و نيت باش ماتتحاشمش معاهم لقات 10 ديال الخدامات دخلو و ضارو على ريماس باش مايقرب لجهتها حد و مايهز لها حد .. عاودو دارو لها الحنة و البيض فوق راسها و خلاوها حتى نشفات شوية عاد بداو يقشرو داكشي .. عطات اديرة كاع داكشي لي تقشر لوحدة من الخدامات لي سيفط ارسلان و قالت لها باش تخلط داكشي مع السكر و القمح حتى تمشي هي و دير داكشي فشي ثوب .. بقات كاتخوي الما على ريماس و ريماس كاتغسل راسها حتى سالات لقاتهم جايبين ليها البينوار و الفوطة
أديرة : دابا سالينا الطقوس بقا غير غدا و بعد غدا غايكون العرس و مور العرس كاين طقس اخر و هو اخر طقس يعني غدا غير رتاحي
ريماس : غدا باغا نخرج نقلب على شي حمام مغربي ولا منتجع فيه حمام مغربي
أديرة : علاش؟ ياك درنا لك الحمام ديالنا
ريماس : حتى الحمام ديالنا زوين
ريناد : وي ا ختي حتى انا باغا نمشي
جولينا : على هاد الحساب حتى انا غانمشي معاكم شوقتوني ليه
ريناد : هههههه غايعجبك بزاف
أديرة : غير ماتتعطلوش .. خلاتهم ريماس و طلعات للفوق عاودات غسلات راسها مزيااااان و هزات طيلي بدات كاتقلب فيه على شي منتجع و لا اي بلاصة يكون فيها حمام مغربي باش تكسل عضامها مزيان .. شوية صونا لها طيلي
أرسلان : بالصحة الحمام
ريماس : علاش ماقلتيش ليا كاينا الحنة حتى عندكم
أرسلان : سوق النسا ماكاندخلش فيه
ريماس : غدا غانمشي انا و ختي و جوليانا لحمام مغربي
أرسلان : علاش.!
ريماس : هاد الحمام ديال اليوم ماقنعنيش
أرسلان : شكون غايكون فالحمام المغربي
ريماس : غايكونو الناس شكون غايكون .. صونات ليه نمرة خرا
أرسلان : شوية و نعاود نعيط لك خلي طيلي حداك
ريماس : ايلا ماعيطوش ليا .. جاوب على النمرة لاخرا حطات طيلي و بدات كاتنشف شعرها شوية تمو داخلين دوك الخدامات لي سيفط ارسلان .. كانو هازين كل وحدة 4 ساشيات حطوهم و خرجو .. بقات مستغربة ديالاش هاد ساشيات .. بدات كاتقلبهم وحدة بوحدة لقاتو مسيفط لها دهاز ديال العروسة من اللول حتى اللخر واخا هادشي ماشي من عادتهم و اصلا هي ماتحتاجوش حيت كلشي كاين الا و انه بحث فعادات المغاربة و عرف بلي العروسة كايكون عندها دهازها عجباتها هاد المبادرة منو نوعا ما حيت وراها بلي على الأقل على الاقل ماشي اناني فقضية العرس .. رتبات داكشي و خرجات لعند ريناد و فادي دوزو النهار مع بعضياتهم منها كايدوزو الوقت و نيت كاتقلب على شي حمام مغربي حتى وصل الليل تعشاو و عاودو تفرقو باش ينعسو فإنتظار يوم جديد