إمبراطورية الأسود

البارت 120

ايوا اطط نشرح لكم جوج لعيبات ضروكم فراسكم
_ قضية ابراهام تكلخ حيت هو بنفسو لي ركب الكام و المايك .. تعمدت باش مايسولش جوليانا ايمتا عرفات ريماس بقضية اسلام جوليانا و تعمدت باش ماتقوليهش حتى هي بلي ريماس عرفات غيرواليوم حيت عندي احداث خاصني نسبقهم قبل مايمشي هو يقولها لأرسلان و يعتارف فهاد الفترة .. غاتقولو لا واااالو راه تكلخ فهادي .. غانعاود نفكركم بالنهار لي كانت ريماس هدداتو بلي غاتفضح علاقتو بجوليانا ايلا مشا حتى قال لأرسلان بلي غاتتسابق .. فديك الوقت ريماس قالت ليه غاتفضح علاقتو و شي حوايج خرين داكشي لاش هو كان ظن بلي ريماس عرفات فديك الوقت و راه فعلا ريماس كانت عرفات قضية اسلام جوليانا فداك الوقت داكشي لاش ماتصدماتش من جوليانا

2) بالنسبة لأرسلان تكلخ و عارف بلي ريماس كانت فالبيت .. انا قلت بلي جاه شك و داكشي علاش برد راسو و هضر معاها و هو ملاحظ نبرة صوتها حيت نبرة صوت بنادم هي منين كايعرف واش بنادم كايكدب ولا لا و راكم شفتو شحال من مرة طلعها غير من نبرة صوتها ولكن فاش ريماس راوغاتو و لعبات على هاد النقطة نقدرو نقولو تمحا لو الشك

•• عند سي أصلان
كان مجبد ففراشو و كايشوف فالسقف كايفكر فحفيدو لي مابقاش كايعرفو من نهار دخلات ريماس لحياتهم مع انه باقي كايكن ليه نفس الاحترام ولكن هادشي ماكافيش حيت أرسلان لي هو بنفسو حط قواعد صارمة .. هو بنفسو لي عاود كسرهم بيديه ارسلان لي كان كايكره المسلمين هو بنفسو لي ولا كايدخلهم للقصر .. فكر فأسوار لي بدل دينو للإسلام لهاد الدرجة أثرات عليه حتى هو؟؟ بهاد السهولة بدلو و نسا دين عائلتو؟؟؟ .. قواعد و قوانين بزاف تكسرو بسبب شخص واحد .. كايشوف امبراطوريتو لي بنا فيها هو و ارسلان سنين بحالا بدات كاتزعزع بواحد السرعة بطيئة ماملاحظها حتى واحد من غيرو .. حاول يقتلها مرارا و تكرارا ولكن هي كي المش بسبع رواح كل شوية كاتخرج شي حاجة من الجنب لي كاتنقذ لها حياتها و فالغالبية كاتكون هاد الحاجة صادرة من حفيدو و اقرب شخص ليه لي هو أرسلان .. ريماس فنظرو ولات كاتبان بحال الساحرة ولا نقولو بحال شي لعنة تسلطات عليهم كترو عليه الافكار و التوقعات المستقبلية الخايبة .. تنهد تنهيدة طوييلة حس بقلبو غايخرج مع ديك التنهيدة و نيت حس بقلبو ضرباتو كايقلالو شيئا فشيئا بسبب الفقصة و بسبب التفكير فأن امبراطورية روتشيلد غادي تتدمر .. شد فقلبو و بدا كايتنفس بصعوبة بالغة صدرو بقا كايتهز مع كل نفس كايطلعها .. شافوه دوك 2 لي مكلفين باش يبقاو معاه و مشا واحد كايجري لتحت باش يعيط للدكتور بينما الثاني بقا معاه كايحاول يخليه يتنفس .. هز داك لي كان باقي مع اصلان طيلي و بدا كايدوز فنمرة أبراهام لي كان غير حدا غرفة ريماس
الكارد 1 : سي أبراهام اجي دابا لجناح سي أصلان الوضع خطييير بزاااف
أبراهام : شنو واقع؟؟؟؟؟ ياك ماكاين باس؟؟؟
الكارد 1 : ماعرفتش اش وقع لسي أصلان فجأة ولا كايتقطع لو النفس احتمال كبير يكون غايتعرض لنوبة قلبية .. قطع عليه ابراهام و مشا كايجري لجناح اصلان ما هي الا دقائق حتى جاو الاطباء بقاو كايتسارعو و كل واحد كايجري من جهة باش يشوف اش واقع .. هز طيلي ديالو و دوز نمرة أرسلان بقا طيلي كايصوني و والو ماكايجاوب حد .. جاو 2 رجال هزو اصلان و هبطوه للمستشفى لي لتحت فحين ابراهام رجع لقدام غرفة ريماس و بقا كايدوز الرقم ديال ارسلان ولكن ماكان كايجاوب حد
• في مكان اخر •
***** : متأكد من هادشي لي كاتقول؟؟؟؟
***** 1 : ها هما التحاليل قدامك .. البصمة لي لقينا فالسلاح ديال ***** و هدا واحد من اهم رجالو
***** : الشيطااان بغا يشري لي الصداع مع *****
***** 2 : سي ***** و الوثيقة لي وقعتي عليها؟؟؟؟؟
***** : ( بعصبية ) مزال ماسيفطتو لي يحيدها لرجالو؟؟؟؟؟ جرييي يا الكلب حيدوها لهم قبل مايوصلوها لو ولا غاتكون هاديك هي الدمااااار ديالنا .. خرج واحد من هاد الاشخاص و تبعوه حراس اخرين
***** 1 : مشكييلة دابا ا بابا و اش غانديرو؟؟؟ ماخاصناش نسكتو على هادشي
***** : ها نتا غاتعرف اش غانديرو .. عيط على ***** و عقد لي معاه اجتماع اليوم غانوضحو هادشيي
***** 1 : لعبها و عرف كيف يلعبها ولكن نتا عارفا بابا ايلا علننا عداوتنا معاه هادشي غادي يضرننا و ماغايكونش فمصلحتنا
***** : داكشي علاش ماغانعلنش هادشي و كلشي غايمشي من لتحت لتحت ولكن قبل من هادشي خاصنا نسترجعو الوثيقة قبل ماتوصل ليديه
***** 1 : كان غباء منا نتيقو فيه انا من اللول ماكانتيقش فيه قلت لك ا بابا كايتقلب على بنادم دغيا و ماتقتيش
***** : وليت شاك بلي هو لي غايكون من مور موت *****
***** 1 : كلشي ممكن
♔ كانت جالسة فبيتها و شادة فيديها رواية و فجأة طاح فبالها سي راضي و ولادو .. كي غايكونو عايشين دابا واش مكملين حياتهم عادي و كي دايرا الامور فالمغرب و المحلات ديالها و رصيدها البنكي و الاملاك .. مابقات عرفات عليهم حتى حاجة ، و فجأة هبط لها المورال .. وقفات و توجهات لجهة الباب بشوية عليها ، حلات الباب و عيطات على أبراهام
ريماس : تقدر تعيط لي لوحدة من الخدامات؟؟
أبراهام : علاش ا مدام ريماس؟؟
ريماس : محتاجاها
أبراهام : شنو خاصك انا نجيبو لك ا مدام ريماس
ريماس : باغا قرعة ديال الويسكي تقدر تجيبها لي؟؟ .. بقا كايشوف فيها بإستغراب
أبراهام : قرعة ديال الويسكي؟؟؟
ريماس : وي قرعة ديال الويسكي ياكما مانعكم أرسلان حتى على هادشي/؟؟؟
أبراهام : شي طلبات خرا؟؟
ريماس : هاد الساعة والو .. سدات الباب و خلاتو واقف مستغرب واش فعلا تكون تبدلات؟؟؟ هي عمرها شربات كيفاش غاتشرب دابا .. هز طيلي و عاود دوز الرقم ديال ارسلان واخا ارسلان قالهم لي بغاتها جيبوها ليها ولكن فهاد الموضوع كان عندو شك و حس بلي خاصو ضروري يشاور أرسلان ولكن ارسلان ماكانش كايجاوب حيت ببساطة طيلي خلاه فالقصر ...