إمبراطورية الأسود

البارت 46

ناضت من بلاصتها و الدم كايغلي فيها عطات وعد لراسها كيما خلات كرامتها تتجرح ... غادي تندمها و تخلي كرامتها تحت الرجلين ... صرفها غادي ترجعو مضاعف على 10 مرات ... خرجات من تما حاقدة و طالع لها الدم لواحد الدرجة ماكاتصورش
أرسلان : خرجي
أريل : راها خرجات ا حبيبي
أرسلان : كانهضر عليك نتي ... خرجي و مانعاودش نشوف وجهك من بعد و غانتفاهمو على هاد المجية و البلبلة لي دايراها قدامي
أريل : ولكن ا ... ... واخا بدون مايهضر غير خنزر فيها خرجات من تما و هي ماراضياش على الأسلوب لي هضر بيه معاها
أسوار : علاش جات لهنا؟؟
أرسلان : غدا سير وصلها منين جات ... خرج من تما و خلاهم شوية تبعو حتى اسوار خرج ساخط
أبراهام : نهارها قرب مابقا ليه والو
مالك : هي نهضرو مع حفار القبور من دابا
أبراهام : ماشفتيهاش كي هضرات مع انسة أريل؟؟ كون يعرف مورغان بهادشي ماكانظنش غادي يخليها حية و خصوصا انها صرفقات بنتو
مالك : بقا لها شوية و تنوض ضربنا حنا
أبراهام : ديك الرقاقة غير مازادت كملات الباقي مابقات تحتارم حد
مالك : ولكن ايمتا ميستر أرسلان غايحيدها لها
أبراهام : ماعرفتش انا براسي حرت من هاد الأحداث الأخيرة
♔ منين خرجات من تما طلعات نيشان لسطح المقر نهار كامل و هي تما قلبها شاعلة فيه شي حاجة كتر من العافية كيفاش يتفرض عليها طلب السماحة و قداام كلشي .. بقات تما مراقبا تداريب الجنود و عقلها كايفصل فالطريقة المناسبة لي غادي ترجع بيها صرفها ... بقات على داك الحال حتى ضلام الحال و الساحة بدات كاتخوا مافيقها غير الصوت لي جا من حداها
أرسلان : خاصك تعرفي بلي ممنوع شي حد يطلع لهاد البلاصة من غيري ... ضارت لقاتو جالس حداها و كايشوف فالساحة ناضت من تما بزربة حيت عارفا بلي ممنوع شي حد يطلع لتما ولكن هي كاتعجبها ديك البلاصة و هي فاش كاتعجبها شي حاجة ماكاتهتامش ايلا كانت ممنوعة ولا لا ولكن فالوقت الحالي ماشي من مصلاحتها تاخد و تعطي فالهضرة ... ناضت بزربة من تما و باين فيها طالع لها الدم ماحاملاش تهضر معاه
أرسلان : جلسي علاش وقفتي
إيفا : حيت ممنوع نطلعو لهنا ا سي أرسلان و حيت خاصني نلتازم بالقوانين ماخاصنيش نزيد نبقا هنا ولا لا؟ ... ناض من تما و مشا لجهتها كانو واقفين حدا الحافة ديال سطاح
أرسلان : اش كاديري هنا فهاد البرد؟! ... تعجبات من سؤالو واش من نيتو هادا؟؟؟ مرة يهز عليها سلاح و يجرح كرامتها و مرة يسولها اش كاديري هنا فهاد البرد ... هزات راسها جات عينيها فعينو و مع ديك الهزة ضرب فيهم ضو ديال القمر عطاهم واحد البريق سااحر ... عاودات قلبات وجهها لجهة الثانية حيت ممنوع يهزو العينين فلي عندهم رتب كبر منهم ... وي فعلا ممنوع يهزو فيهم العين ولكن مامفروضش يحنيو عينيهم للأرض و هادشي عارفاه هي داكشي لاش ماكاترضاش تحني راسها ماشي بحال الجنود لي متبعين سياسة العبيد ...
إيفا : انا جيت لهنا خصيصا باش نتبرد ا سي أرسلان ... سمعاتو صاط
أرسلان : تقدري تشوفي فيا عادي فاش نكونو بوحدنا ... عاودات شافت فيه و ترسمات ابتسامة استهزاء على شفايفها
إيفا : و فاش نكون مع الجنود و القياد و مع الأنسة اريل؟
أرسلان : إلزاما عليك تحتارمي بحالك بحال غيرك
إيفا : داكشي علاش ا سي أرسلان غادي نحتارمك و مانهزش فيك العين سواء كنت مع الناس سواء كنا بوحدنا
أرسلان : كايعجبني العناد ديالك و قصوحية راسك
إيفا : الصمت ... رجعات كاتشوف ولكن هاد المرة كانت كاتشوف فالغابة البرانية
أرسلان : داكشي لي شفتي فالصباح مع الجندي ... بقات كاتشوف فيه كاتتسناه يكمل
أرسلان : حاجة عادية و ابسط عقاب نقدر نوجهو لشي حد هز عينو فيا .. هنا كلشي كايحتارم لي من فوق منو باش ماتكونش السيبة فهمتي؟ يعني الإحترام و الإخلاص هنا هو كلشي و الثمن حياتك ... بقات كاتشوف فيه ماتخلعاتش من هضرتو حيت الإخلاص راها مخلصة ولكن الاحترام ماعاطياهش لكلشي ... عاطياه ليه غير هو ... بقات كاتشوف فيه مدة شنو زعما واش كايحاول يخلعها بهضرتو؟
أرسلان : ولكن مانضمنش لك غاتبقاي لابقيتي كاتشوفي بحال هاكا ... عاودات قلبات وجهها للجهة لاخرا
إيفا : كانعتاذر ماقصدتش ... شدها من الذقن ديالها و هز راسها تقابلو عينيها مع عينيه لي ظلام فظلام كاينفث منهم الشر
أرسلان : ( بنبرة خافتة ) ماعنديش مشكيل تبقاي تشوفي ... تنطرات منو بزعفة ماكاتحملش هاد التصرفات لي ولا كايدير معاها .. مع ديك النطرة لي تنطرات رجعات رجليها اللور و كانت غاتجي لتحت كون ماجرها لعندو حتى تخبطات مع صدرو
أرسلان : تبقاي تردي البال ... بعدات منو بخطوات
إيفا : ليلة سعيدة ميستر أرسلان خاصني نمشي باش غدا نقدر نفيق بكري
أرسلان : مزال ما ساليت هضرتي ... وقفات كاتسناه اش غايقول
أرسلان : تقدري من غدا ترجعي للرتبة ديالك ...
ربعات يديها و هزات حاجب بقات كاتشوف فيه مدة
إيفا : علاش ا سي أرسلان؟
أرسلان : ( خشا يديه فجيبو ) بديتي فخرق القوانين
إيفا : ماقصدتش ولكن ستغربت ا ميستر أرسلان ...
أرسلان : ماكايعجبونيش الأسئلة غدا رجعي لبلاصتك ... خلاها واقفة مستغربة ، عاودات رجعات لنفس الوضعية لي كانت فيها قبل مايجي و كاتفكر فشي خطة محكمة تنتاقم منها من ديك العاهرة ديال خاطبتو باقا كاتفكر حتى شافتها واقفة وسط الساحة هي و أسوار و باينا فيهم كايدابزو ماقدراتش تسمع هضرتهم داكشي لاش ضطرات تهبط لتحت و تتسنط ... و فعلا داكشي لي دارت هبطات كاتسلت فالدروج حتى وصلات و طلقات ودنيها
أريل : انا غانبقا هنا فهمتيني ولا لا؟؟؟ و ماعندكش الحق تقوليا واش نمشي ولا نبقا
أسوار : أريل فهميني راك غاتجبدي غير المشاكل قالك سيري صافي سيري حتى يعيط لك
أريل : اخررر هضرة عندي هي غانبقا ولا هادشي كامل غايوصل لسي أصلان هو لي غايفك هادشي و كانظن لاوصلو هادشي اكيد ماغايعجبوش الحال ... شدها من دراعها و زير عليها
أسوار : كاتهدديني دابا؟؟؟؟
أريل : حسبها كيف بغيتي
أسوار : ( ربع يديه ) كايبان لي باغا نيت سي مورغان يعرفك كاتمشي للبيران ياك؟؟ اش بان لك نقوليه حتى على المخدرات لي ولاو عندك بحال شريب الما؟؟
أريل : و شكون قالك غايتيق بيك؟ علاش ياكما يسحابلك بابا غايتيق فالغريب و يكدب بنتو ... جبد باليد الثانية طيلي ديالو و بدا كايدوز فتصاور و ابتسامة سخرية مرسومة على وجهو شوية صور لها طيلي باش تشوف
أسوار : ماغايتيقش بيا ولكن هاد الفيديو كانظن غادي يخليه يعاود التفكير واش فعلا نتي فخر لعائلة مورغان ولا جايبا ليهم الذل ... كان فيديو كاتشم فيه الكوكايين و كاتتصرف بحال شي وحدة مسطية بغات تحيد ليه طيلي ولكن بعدو عليها
أريل : حقييير ماكاتسواش
أسوار : كوني اكيدة مانوصلش لحقارتك ... تنطرات منو و تمات غادا لجهة اللوطو ضحك بإستهزاء عليها و تبعها وقفها
عند ريماس ... ترسمات ابتسامة خبيثة على محياها هادي فرصة و ماكاتعوضش ... جاتها فرصة تال بين يديها تنتاقم منهم بجوج هو حيت حاول يقتلها و هي حيت جرحات لها كرامتها ... خرجات من بلاصتها و مشات كاتسلت لجهة اللوطو لي غادي يركبو فيها و عينيها بالكاميرات لايشدوها متغاظية ... وصلات للوطو و هبطات للأرض بزربة نعسات على ضهرها تخشات من تحت اللوطو بقات مدة و هي كاتخربق فيها حتى قدرات تقطع لهم الفرانات ... شوية سمعات الصوت غادي و كايقرب ليها
إيفا : شيييت اش هاد الخرا مشكيييلة هادي ... بقات مخشية تحت اللوطو و كاتفكر اش دير ... ماخاصهمش يشوفوها حيت لاشافوها اكيد غادي يعرفوها هي لي من مور هادشي احسن قرار فالوقت الحالي هو تبقا فبلاصتها ... جمعات يديها عندها و دارت بيهم علامة إكس فوق صدرها و جمعات رجليها فجهة واحدة مستقيمة باش مايصدقوش دايزين عليها روايض ... ما هي الا لحظات حتى وصل أسوار و أريل لجهة اللوطو كاتسمع هضرتهم بوضوح باقيين مناكرين ، ركبو فاللوطو كاتسناهم بفارغ الصبر يدوزو و يدوز هادشي بيخير و الأهم مايعييقوش بيها ... شغل أسوار اللوطو و ديمارا و لحسن الحظ ماتأذاتش إيفا .. تفتحو البوابات و خرج و اخيييرا .. ناضت من بلاصتها بالزربة و هي كاتشوف فيهم غاديين للهلاك لي وجدات لهم .. بقات كاتسوس فيديها من الغبرة و ابتسامة الشر مرسومة على وجهها
إيفا : ههههه طريق السلامة ... مشات من تما و راااااشقة لها
غادا متغاظية على العينين لي مراقبينها ... طلعات فالدروج و غير وصلات للكولوار لقاتو قدامها واقف تمحات الابتسامة من وجهها
إيفا : ميستر أرسلان
أرسلان : نقدر نعرف سر هاد الإبتسامة
إيفا : والو ا ميستر أرسلان
أرسلان : متأكدة؟!
إيفا : هه شنو غايكون
أرسلان : المورال عندك كايطلع دغيا ... بقا كايشوف فيها بشي شوفات فشكل الشيئ لي خلاها تحاول تتهرب من تما بأي طريقة باش ماتكشفش
إيفا : هه وي بحال داكشي ا ميستر أرسلان احم نخليك غانمشي ننعس باش غدا نفيق بكري ... ماجات فين تكمل طريقها حتى شدها من دراعها و تم جارها لجهة مكتبو
إيفا : سي أرسلان اش واقع؟؟؟ طلقني راه غايجي شي حد غايفهمنا غلط سي أرسلااان ... ماسمعهاش او بالأحرى دار راسو ماسمعهاش .. وصلو للمكتب ديالو دخل و سد الباب و دفعها على الحيط قرب منها حتى بقاو سنتيمترات قلال بيناتهم و فكل ثانية كايزيد يقرب لعندها و يقلل المسافة حتى غطاها بالكتلة الجسمانية ديالو مطلعة راسها و عينيه فعينيها و قلبها كايضرب غايخرج من بلاصتو عمرها كانت قريبة ليه حتى لدرجة تحس بسخونية لحمو من فوق الحوايج ... أنفاسو الباردة كاضرب نيشان فوجهها ... عينيه ختارقو عينيها بدوك النظرات توترات و التوتر بان عليها تخلطو عليها العرارم
أرسلان : شنو قلت لك على الكدوب ا إيفا
إيفا : ميستر أرسلان بعد شوية و غانشرح لك كلشي بالتفصيل
أرسلان : قلت لك ماكانحملهومش ولا ماقلتهاش؟ ... عرفات راسها قوداتها بالمعقول و خلات الشيطان يلعب لها بعقلها اكيد ماغاديش يدوزها لها و هي بغات تسيفط خوه من لحمو و دمو للمقابر ... بدا كايبان فوجهو الإنفعال و هادي حاجة جديدة عليها و على الجميع حيت كلشي كان كايقول الجليد لي فألاسكا يدوب و الما ديالو يسخن ولكن أرسلان هو لي عمر دمو يسخن و هادو من الأشياء لي خلاها تتوتر نزيدو هادي على القرب لي بيناتهم فالوقت الحالي
إيفا : غير سمعني عافاك و غا نشرح لك
أرسلان : واش قلتها ولا ماقلتهاش؟؟؟؟
إيفا : قلتيها قلتيها ولك..
أرسلان : بغيتي تقتليه ياك؟؟؟؟ وصلات بيك الجرأة تبغي تقتلي خويا؟؟؟
إيفا : ( كاتنفي براسها ) لا لا ماكنتش باغا نقتلو كانقسم لك ماباغاش نقتلو كنت باغا نربيها حيت هي السباااب باش تجرحات كرامتي هاااد نهار واخا هي لي غالطة تيق بيا ماكانكدبش
أرسلان : باقا كاتكدبي؟؟؟ صوتك كايرجف بسبب الكدوب و باقا كاتكدبي؟؟؟ و فوجهيي؟؟؟
إيفا : ( بغضب ) همااااا لي ظلمووووني اااه كنت باغا نقتلهم حيت هما لي ظلمونيييي انا ماغلطتش هما لييي غلطوووو هما لي خاصهم يتعاقبو كنت عارفاك ماغاتعاقبهوومش حيت من طرفك و انا؟؟؟؟؟ انا شكون ياخد لي حقي منهم لاماخديتوش منهم؟؟؟؟ لا ا ايفا نتي ليك الله خاصك تصبريي و تتقبلي الاهانات و الظلم لي فحقك حيت كاتبقاي يتييييييييمة .. مقطوووعة من الشجرة ماعندك لي يسول فيك واخا نقتلوك ماعندك لي ينصصصفك ... اااااه بغيت نقتلهم و نعطيهم عقااابهم بيدي سمعتيييي بيديييي
أرسلان : إيفا
إيفا : ( بعصبية ) بغيتي تقتلني على هاد الفعلة؟؟؟ قتلني هاني قدااامك خود روحي اصلا مابقا عندي علاياش نعييش فهاد الدنياااا لي كانو الدراع الحاااامي لي مااااااتو ... هاني قدااامك خوود حق خوك لي غايكون دابا جا عزرائيل ياخد روحو عاقبنييييي اش كاتسناااااا هاني قداااامك عاقبنيييييي خاصك تعرف واحد الحاااجة كون تعطات لي الفرصة باش نعاود نقتلهم كون اكيد كنت غادي ندير نفس شي حيت ماندماااااناش نصبر لكلشي الا كرااااامتي ... بقات كاتهضر و العصبية باينا فوجهها مابقات عرفات اش كاتخرج من فمها قرييب تسبو حتى هو معاهم .. الصبر لي كان صابر معاها تا لحد الساعة تسالا منين بدات كاتغوت ليه فوجهو و منين وصلات بيها تبغي تقتل خوه ما بقاتش عندو و لو نقطة ديال الصبر ... يتبع