إمبراطورية الأسود

البارت 50

ستاعدات و خدات نفس عميق و بدات كاتجري ماعطلهاش مع بدات كاتجري ديمارا طوموبيل ... على عكس لي كايدير مع القياد لاخرين كايعطيهم دقيقة باش يبعدو فيها قدر المستطاع عاد كايتبعهم هاد الاختبار دارو لهم باش يعرف قدرة التحمل ديالهم تحت الضغوطات ... مع بدات كاتجري ديمارا لوطو و خلاها تمشي فسرعة محددة ماتسمعوش ديماراها تقولو ديمارااااها نيت حيت كان داير سرعة بطيئة شوية ... بقات كاتجري لمدة ساعة و اللوطو باقا تابعاها مابغاتش ضور تشوف فين وصلات .. دازت ساعة خرا و نفس الشيئ باقا إيفا صامدة و ماباغاش تستسلم دازت نص ساعة بداو كايبانو عليها علامات التعب دقات قلبها تزادو و بدات كاتعراق حيدات القاميجة بقات بديباردو و عاقدات القاميجة فالخصر ديالها و هي باقا كاتجري .. دازت نص ساعة خرا بداو رجليها كايعياو و أرسلان مزال ماهداه الله يقولها باراك 5 ديال سوايع و هي كاتجري ... رجليها عياو و مابقاتش كاتحس بيهم ولكن الإستسلام هو لي ماكاينش فقاموسها ... دازت 15 دقيقة خرا و هي باقا مكابرا ولكن صافي جهدها تقاضا بدات كاتتقل رجليها شوية بشوية حتى لحقات عليها اللوطو ديالو و بدات كاتقيسها ... رجليها فشلو عليها فأي وقت يقدرو يخواو بيها و تجي فالأرض ولات غير كاتلاوحهم ما هي الا لحظات حتى طاحت فالأرض بانت لها اللوطو رجعات مارشاريان حتى بعدات مدة ... شوية و هي تبان لها جايا مكسييريا لجهتها صااااافي منين ماقتلهاش مورغان ها هو غايصفيها لها أرسلان نيت بيديه غمضات عينيها كاتسنا اللوطو دخل فيها بقات مغمضة عينيها شي 5 دقايق و اللوطو مزال مادخلات فيها
أرسلان : غاتباتي تما؟ طلعي ... بدات كاتشوف فيه بعدم تصديق ياك عاد قالها القبر كايتسناك اش وقع دابا؟؟
إيفا : نجحت؟؟؟
أرسلان : كانظن موضوع الرتبة هنا غايتسد مادام عرفتي بلي ماكاتستاحقيهش ... لاح لها قرعة ديال الما و عاود كسيرا مارضاتش تخسر كيفاش خسرات فإختبار بحال هادا؟؟؟ لي ماعارفاهش هي هو ان ارسلان عمرو طول فشي اختبار اكتر من 3 ساعات يعني لا جينا نشوفو من واحد الناحية غانلقاوها هي مافشلاتش ولكن هو لي مابغاهاش تربح
إيفا : فين غاديين؟
أرسلان : المعسكر و من اليوم البلاصة لي نكون فيها غاتكوني فيها مفهوم كلامي ياك؟
إيفا : ( بغيض ) امم
أرسلان : ماسمعتش
إيفا : مفهوم كلامك ا سي أرسلان ... وصلو للمعسكر كانت حراستو مشددة و فينما ضرتي كاتلقا مجموعة ديال الحراس ... خرج من اللوطو و خلا واحد منهم يبلاصي اللوطو
أرسلان : سيري لبيتك و غدا ماتنسايش تنقلي حوايجك لمكتب اديب
إيفا : و علاش؟ ... خشا يديه فجيبو و صغر عينيه
أرسلان : كاديريها بلعاني؟!
إيفا : شنو درت؟؟؟
أرسلان : عاودتي درتيها!!
إيفا : مادرت والو
أرسلان : عاودي راجعي القوانين ولا غانراجعهم معاك بطريقتي 😉 ... غمزها و مشا عاد عرفات علاياش كان كايهضر كلمة علاش لي ولات كاترددها بزااف مؤخرا و الأسئلة لي ولات كاتسول بزاف و النقاش ... و هادشي ما بدا كايوقع حتى نبهها عليهم عاد كتارو بدون ماتحس ... باش تعرفوها كاتمشي بالعكس داكشي عندها فطريا سواء بالرقاقة ولا بلاش عزيز عليها العكس ... طلعات لبيتها مشات نيشان دخلات للدوش عاد مشات تنعس