إمبراطورية الأسود

البارت 104

أرسلان : جدي بغيت نهضر معاك
سي أصلان : واش شي خبر خايب؟؟؟
أرسلان : ماشي بزاف ... شاف فرجالو باش يخرجو ستأذنو و خرجو
سي أصلان : ايلا كان خايب بزاف خليه حتى ننوض من الفراش
أرسلان : بخصوص ريماس
سي أصلان : يعني خايب؟؟
أرسلان : ماشي شي حاجة خطيرة
سي أصلان : فإينا موضوع؟؟؟
أرسلان : كدبت عليك
سي أصلان : كدبتي عليا؟؟
أرسلان : كدبة صغيرة
سي أصلان : ( تقاد فجلستو ) فاش كدبتي عليا؟؟؟
أرسلان : ريماس ماكانتش حاملة .. بقا جدو كايشوف فيه بصدمة .. عمرو ماكدب عليه و نهار كدب عليه كان بسبابها للمرة لي ماعندهاش عدد
سي أصلان : باش تحميها كدبتي على جدك؟؟؟؟؟ وصلات بيك للكدوب عليا؟؟؟؟ .. بقا كايشوف فيه ارسلان بشوفات دخلو ليه الشك فراسو .. زاد تفكر تخطيط لي خطط من مور ارسلان ضدها و ضد خوتها .. و اتفاقو مع مورغان و زيد و زيد عند بالو .. يعني فهاد الحالة بجوجهم بحال بحال هو كدب عليه و حفيدو قابلو بالمثل .. سكت دقائق و نطق
سي أصلان : كاتبغيها؟؟؟
أرسلان : ماكانأمنش بهاد الكلمة .. كانأمن بما كتر منها
سي أصلان : هادشي علاش كدبتي عليا؟؟؟
أرسلان : الموضوع كان كايستحق
سي أصلان : عمامك فراسهم؟؟؟
أرسلان : مامحتاجش نبرر .. شاف فيه مطولا و عاود هضر
سي أصلان : فكر مزيان قبل ماتقرر اي قرار
أرسلان : فكرت ا جدي
سي أصلان : ماغانوقفش لك فطريقك ولكن لي بغيتك تعرف هاد القرار غايخرج على امبراطورية فنينا فيها عمرنا كامل عارف هادشي؟؟؟
أرسلان : زواجي بيها ماعندوش دخل بهادشي
سي أصلان : زواجك بيها غادي يكون عندو تأثير كبير علينا و على سمعتنا
أرسلان : ماغادي يقدر يهضر حد
سي أصلان : فوجهنا ماغايهضروش و فضهرنا؟؟
أرسلان : ماكايهمنيش اش كايقولو فالضهر مدام فوجهي كايحنيو الراس
سي أصلان : موجودين البنات غير مستفين يتسناو غير كلمة من عندك كاين ما حسن منها ختار و ماكاينش لي غايهضر معاك
أرسلان : ختاريت مسبقا
سي أصلان : أمثالها و لي كايشبهو لها موجودين غير هما
أرسلان : ( بهدوء ) حتى حاجة ماكاتشبه لحاجة ... و حتى واحد ماكايعوض غياب شي حد ... الحوايج المختلفة فاش كاضيع ماكانلقاوش لها البديل و هادشي لي وقع معايا فهاد العام ... تنهد اصلان و جاوب
سي أصلان : ماغانوقفش فطريقك .. قررتي ايمتا غادير الخطبة؟
أرسلان : من هنا 2 سيمانات
سي أصلان : مزيان .. تقلب للجهة لاخرا و هو ماراضيش الى الوضع و مايمكنش يخليها تكون ام لحفادو من مور كاع داكشي لي دارت داكشي علاش بدا كايخطط و كايرسم اول الخطوات باش يتهنا منها ... خرج من عندو و مشا لجناحو
♔ كانت جالسة فالبيت و تفكيرها غير فأش غايكون وقع لداك خونا .. واش باقي حي ولا مات ولا اش وقع ليه .. ندمات كاع لاش قالتها ليه .. هو فعلا يستاهل الضرب و باغا ليه الحالة ديال اسوار على فعلتو ولكن ماشي يموت بسببها .. غير يفوتها هي و يموت ولا يحيى .. دازت قدام عينيها صورة جدو و الندبة لي بقات فوجهو بالحريق .. تبسمات بشر و بقات كاتتشفا فيه المهم ماخرجش بلاش و الإمارة بقات مطبوعة ليه فوجهو باش يتعلم يقرب لعائلتها .. ربي عطاها العكوزة ماكاتهضرش معاها ولكن جا اصلان و أدى الدور ديالها بإمتياز .. بانت لها الفيستا ديال ارسلان لي عطاها لها فاش كانو جايين .. مشات هزاتها و تفكرات استفزازو ليها .. مدام هو ماكايبغيهاش تطلق الشعر فأكيد غادي يبغيها دير الحجاب .. مي بيان سيغ ماغاديش ديرو حتى تخليه يمشي يقرا عليه و شوية بشوية غايبدا يتعمق .. هادي هي الفكرة لي كانت فبالها .. حطات الفيستا و مشات لبلاصتها باش تنعس