" ဒီနှစ် အတွက် တစ်နှစ်တာ အကောင်းဆုံး သရုပ်ဆောင်ဆုကို ရရှိသွားတဲ့ သူကတော့...... "
ဆုပေးပွဲ ကို တက်ရောက်လာတဲ့ စကာတင်စာရင်းဝင် သရုပ်ဆောင် တွေသာမက TV ဖန်သားပြင်ကနေ ကြည့်ရှူနေကြတဲ့ တစ်နိုင်ငံလုံးက ပရိတ်သတ်တွေကပါ ရလဒ်ကို ရင်ခုန်စွာ
စောင့်စားနေကြသည်။
" ချိန်း ! "
ဆုကြေငြာသူက တစ်လုံးတည်းသော အမည်နာမ ကို တိကျပြတ်သားစွာ ကြေငြာလိုက်ပြီးနောက်မှာ ခန်းမကြီးထဲ လက်ခုပ်သြဘာသံများနဲ့ ပြည့်နှက်သွားပြီး ဒီနေ့ရဲ့ အဓိက ဇာတ်ဆောင်အား ပွေ့ဖက်ကြ ဂုဏ်ပြုစကားပြောကြနဲ့ ရုတ်ရုတ်သဲသဲဖြစ်သွားသည်။ ထိုနည်းတူစွာ တနိုင်ငံလုံးတွင်လည်း ထခုန်က ကာ ဝမ်းမြောက်နေကြသူတွေလည်း အများအပြား။
စင်မြင့်ထက်တွင် ဆုလက်ခံပြီးနောက် ကျေးဇူးတင်စကားပြောရန်အတွက် မိုက်ကို ကိုင်လိုက်ကာ
" မင်္ဂလာပါ ချိန်း ပါ
ကျေးဇူးတင်ထိုက်တဲ့ ကျေးဇူးရှင်တွေ အကုန်လုံးကို ကျေးဇူးတင်ပါတယ် "
ကျေးဇူးတင်စကားကို တိုတိုတုတ်တုတ်ပြော သွားတာကိုက သူ ရဲ့ ဆွဲဆောင်မှုတစ်ခုပင်။
" ဂုဏ်ပြုပါတီ ရှိတယ်နော် ချိန်း "
ဆုပေးပွဲက အပြန်လမ်းမှာ မန်နေဂျာ ကိုနေဦး ပြောလိုက်တဲ့ စကားကြောင့် သူ မျက်မှောင်ကြုတ်လိုက်သည်။
" ညတွင်းချင်းလား "
" အင်း ကုမ္ပဏီက အကုန်စီစဥ်ထားပြီးပြီ အနုပညာရှင်တွေကိုလည်း ဖိတ်ထားပြီ မီဒီယာတွေကိုလည်း ခေါ်ထားတယ် "
သူ လေပူတစ်ချက် မှုတ်ထုတ်လိုက်သည်။ သူတို့ စီးပွားရေးကိုပဲ ကြည့်တဲ့ တစ်ကိုယ်ကောင်း သမားတွေ။ စာချုပ်ပြည့်ရင်တော့ လက်တွဲဖြုတ်လိုက်တော့မယ်။
မင်္ဂလာပါ
ကျွန်တော့်နာမည် ရှိန်းမြင့်မိုရ်ဝန်း ပါ အနုပညာနာမည်ကတော့ ချိန်း ပါ။
အသက် 23 နှစ်ပါ။ International Relations major ကို ယူထားပြီး တတိယနှစ်နဲ့ ကျောင်းနားထားတာမို့ စာပေပညာဆုံးခန်းမတိုင်သေးဘူး ပြောရမှာပေါ့။
ရန်ကုန်ကပါပဲ။
