" Lavender ဆိုတဲ့ အခေါ်အဝေါ်က ရှေးဟောင်းပြင်သစ်စကား Lavandreကနေ ဆင်းသက်လာတာပါတဲ့ဗျ "
လာဗင်ဒါအကြောင်းလေး နားထဲစီးဝင်လာတော့ လာဗင်ဒါအနံ့သင်းသင်းလေးကို နှစ်သက်တဲ့ တစ်စုံတစ်ဦးကို အမှတ်မရှိ သတိရမိပြန်သည်။ အခုရော သူ့အခန်းလေးထဲ လာဗင်ဒါအနံ့လေး သင်းပျံနေပါဦးမလား။
" သူ့ရဲ့ပန်းစကားလေးက တစ်ဦးတစ်ယောက်ထဲကိုပဲ သစ္စာရှိရှိ ချစ်သွားပါမယ် တဲ့ "
သစ္စာရှိခြင်း ကို ကိုယ်စားပြုတဲ့ ပန်း ။
စွဲလမ်းခြင်း ကို ကိုယ်စားပြုတဲ့ ပန်း။
ကျက်သရေရှိခြင်း ကို ကိုယ်စားပြုတဲ့ပန်း။
" လာဗင်ဒါ ရဲ့ ရနံ့သင်းသင်းလေးက ကဗျာဆန်ပြီး လူ့စိတ်ကို လန်းဆန်းစေတယ် ... ကမ္ဘာကျော် cosmetic Brand တွေ တော်တော်များများမှာ လာဗင်ဒါပန်းကို အသုံးပြုကြတာတွေ့ဖူးပါလိမ့်မယ် ... တော်ဝင်တဲ့ပန်းလေးပေါ့ဗျာ အဟင်း "
သူ့ရဲ့ခပ်ဖွဖွရယ်သံလေးကြောင့် သူ့ဘေးနားကလူတွေကပါ လိုက်ပါပြုံးကြသည်။အသံကြည်ကြည်ငြိမ်ငြိမ်လေးဟာ သိပ်ကိုနားထောင်လို့ကောင်းသည်။ စိတ်ရှည်စွာ ချိုချိုပြေပြေလေး ပြောပြနေတာကြောင့် နားထောင်သူအဖို့ သဘောကျဖွယ်ရာ။
ဒီတခါ ရှင်သန်ခြင်းရဲ့ အရိပ်အောက်မှာ ပန်းအကြောင်းကို ပြောနေသောသူက ရန်း မဟုတ်သော ဝေး။
ဧည်သည့်တွေ အနားယူဖို့ ပြင်ဆင်ပေးထားတဲ့ ဧည့်စားပွဲလေးမှာ ထိုင်နေရင်း ဝယ်သူအမျိုးသမီးနှစ်ဦးအား ပန်းကို ဘယ်လိုပြုစုပျိုးထောင်ရမယ်ဆိုတာ သေချာ ရှင်းပြနေသော ဝေး ကို ရန်း ငေးကြည့်နေမိသည်။
ခေါင်းအစ ခြေအဆုံး ဝေး ၏ အပြုအမူတွေဟာ လေပြေလေးလို ငြင်သာငြိမ့်ညောင်းသည်။ရယ်သံဖွဖွလေးကအစ မျက်တောင်စိပ်စိပ်လေးတွေကိုအသာအယာခတ်လိုက်တာက အဆုံး နူးညံ့သိမ်မွေ့လွန်းသည်။
ဆံပင်ကို သပ်ရပ်စွာ ဖြီးသင်ထားတာကြောင့် ရှင်းလင်းနေသော နဖူးပြင်အောက်က လေးနက်တည်ကြည်တဲ့မျက်ဝန်းတွေကို ထင်ထင်ရှားရှားမြင်ရသည်။ မထူမပါး မျက်ခုံးနက်နက်နှင့်
အမြဲတင်းတင်းစေ့ထားသော်လည်း ပြုံးယောင်သန်းနေသော နှုတ်ခမ်းပါးတစ်စုံတို့ ပေါင်းစပ်လိုက်တဲ့အခါ ဝေး၏ ဥပဓိရုပ်သွင်သည် အင်မတန်ခန့်ညားထည်ဝါသည်။ သို့သော် သြဇာပြည့်ဝတဲ့ရုပ်သွင်မဟုတ်ဘဲ မြင်လိုက်ရင် စိမ့်စမ်းရေလေးပမာ အေးမြစေတဲ့ခန့်ညားခြင်းမျိုး ဖြစ်သည်။ထို့အပြင် ရန်း အကြည့်တွေထဲ ရှေးဆန်သော အသွင်ကို မြင်နေရသေးသည်။
