جريمة على ساحة خصرها !

٢٦

عند غيث الي كان بين بعثراته مثل عادته في مكتبه ومسك قضيتين رغم طلب جده انه يوقف كل القضايا ولكن قال لجدة وهو يطمنه "بتبقى قضية عصابة اللهب هي الاهم هذي مجرد قضايا اتسلى فيها" ..

ومايدري ليه التفت لدرج الاخير لمكتب جده لانه راح محتاج ياخذ ملف ووقتها لقى البوم ذكريات عائلته واخذها ورجع لمكتبه يفتحه هناك ويسترجع ذكرياته  .. كان بين يدينه يقلب الصفحات .. ظهر له جدته الي ماتت قبل ثلاث سنين تقريباً وكانت جميله اخذو الحسن اولادها منها .. وظهر عمه نواف وظهر الشخص الي يظنه ابوه وهو جابر .. وصور عديدة لحياة و سارة و اريام وقتها كانوا حياة وسارة في الابتدائي بس اريام بعدها مادخلت .. وصور له هو حامل اريام بين يدينه وواضح من ملامح وجهه اريام انها تبكي بس ناسي سبب بكائها .. وتراكمت ضحكاته لصوره كانت اريام فيها شاده شعره وهو واضح من ملامحه الألم.. صور له ولجدة وكيف نهاية كل صف دراسي يلتقطون صور مع بعض من اولى ابتدائي وحتى اخر سنة له بجامعته .. وقت يترقى بشغله .. وصور كثيره لا تعد ولا تحصى .. بقى يتأملها مده طويله وخصوصاً صور اريام الي كانت مختلفه عنهم كلياً بجمالها وحسنها الي ملازمها من طفولتها وما ينكر ان سارة وحياة كانوا جميلين ولكن هي اشد واكثر منهم .. كان يحاول يعرف هو يشبهه مين ؟ ما كان يشبهه ابوه ولا امه وملامح بسيطه من جده فقط .. توقفت انظاره عند صوره شخص والي واضح انها صوره قديمه جداً ولرجل في بداية العشرين تقريباً كان يحمل وسامه لا تصدق من شدتها تظن انه من بلاد اخرى ملامح خليجيه بحتّه حتى هيئته مختلفه كلياً عن كل الي شافهم .. رفعها وهو يتأملها بشدة ولوهله ظن انه هو ! كان يشبهه بشدة وكانهم شخص واحد ! ماعرفه ولا يتذكر انه لمحه وأساسًا الصوره كانت في البوم لوحدها اخذها وسقط من الالبوم صوره ثانيه .. رفعها بين انامله وكانت صوره مقطوعه من اليسار بحيث انه مايظهر الا طفل واحد وواضح ان عمره ماتعدا السنتين وكان واضح ان في حد جالس بجوار الطفل ذا لان في كتف طفل ظاهره بس مقطوعه الصوره من نصف الكتف .. يعني ماتظهر الا طفل وكتف لطفل ثاني .. بقى يتأمل فيها وعرف وقتها من مقارنته مع صور ان هذي الصوره له هو .. واخذها مع صوره الرجل ذاك ومشى باتجاه جدة يسأله عنها ..

-

كان دواس ومثل عادته مشغول برماية الان بين حراسه وخدمه وحشمه يرتشف من فنجان قهوته العربيه وانظاره على اهدافه الي مستحيل يخطأ فيها .. التفت على غيث الي وقف بجانبه وهو ياخذ البندقية الثانية ويطلق على الاهداف ويركز عليها ويصيبها بكل سهوله .. ابتسم بهدوء وهو يرى في ملامح غيث استنكار ونطق ب : طلع الي بجوفك واضح بفمك هرج
سكت غيث ومانطق بشيء لكنه رفع صورة الرجل ذاك بين انظار جدة ولاحظ تغير ملامح جده وكيف انه صابه الدوار وتمسك بغيث واخذ الصوره من بين ايدينه وهو يرتعش .. مسكه غيث وهو يمشي معه حتى الجلسه ويجلسون عليها ونطق خارج من سكوته بعد ماناوله الماء ليشربه : جدي من ذا ؟