ငါ့တပည့်တွေ အကုန် ဗီလိန်တွေချည်းပဲ

အခန်း (၁၈၁) မျဉ်းတစ်ကြောင်း

အခန်း (၁၈၁) မျဉ်းတစ်ကြောင်း

ရွှီကျင်းက သက်ပြင်းချပြီးပြောလိုက်လေ၏။ “ဒါက ကိုယ်တော်တို့အသက်တွေကို ထိန်းထားတာနဲ့ ဆိုင်နေတာ” သူက အချက်ပြလိုက်သည်။

မဟာခွန်အားခန်းမ၏တပည့်လေးအချို့က ပြေးထွက်လာသည်။ မကြာမီ၌ သူတို့က အလောင်းများကို သယ်လျက်ထမ်းစဉ်များစွာဖြင့် ရောက်လာသည်။ သူတို့၏ အသွင်အပြင်အရ သူတို့သည် ကောင်းကင်ရွေးချယ်ခံဘုရားကျောင်း၏ ပင်မတပည့်များဖြစ်ရမည်။ အကြီးအကဲများတောင် ဖြစ်နိုင်သည်။

ရွှီကျင်းက အလောင်းများကို လက်ညှိုးထိုးပြပြီး ပြောလိုက်တော့သည်။

“ကောင်းကင်ရွေးချယ်ခံ ဘုရားကျောင်းရဲ့ စည်းကမ်းထိန်းသိမ်းရေးအဆောင်က ပထမကျောင်းထိုင် ခုံလျောင်နဲ့၊ ကျမ်းစာဆောင်ရဲ့ ပထမကျောင်းထိုင်ခုံကျန့်၊ ကြီးကြပ်ရေးရုံးတော်က တပည့်ရှစ်ဦးနဲ့ ဘုရားကျောင်း ကိုယ်တော်ဆယ့်နှစ်ပါး သူတို့အားလုံးက မဟာနတ္ထိထိဘုရားကျောင်းရဲ့ အံ့ဖွယ်ကိုယ်တော်ကြီးလေးပါး သတ်တာခံလိုက်ရတာ”

ခန်းမထဲတွင် သယ်လာသည့်အလောင်းသိပ်မများသော်ငြား ရွှီကျင်းကမူ အမည်များစွာ ရွတ်နေသည်။ သူပြောပြီးသည့်နောက် အမူအရာက တည်ငြိမ်နေသည်မှာ သေခြင်းတရားကို ကြုံတွေ့နေကြ ဖြစ်နေသည့်ပုံပေါ်၏။

“မဟာနတ္ထိဘုရားကျောင်းနဲ့ ကောင်းကင်ရွေးချယ်ခံဘုရားကျောင်းတို့က တစ်ဖက်တည်းပဲလေ။ မဟာနတ္ထိဘုရားကျောင်းက ကိုယ့်အဖွဲ့ဝင်တွေကို ဘာကြောင့်များသတ်ရမှာလဲ" လုကျိုးက မေးလိုက်၏။

“ပြောရရင်အရှည်ကြီးပဲ။" ရွှီကျင်းက ဖြည်းဖြည်းချင်းပြောလိုက်သည်။

“မဟာနတ္ထိဘုရားကျောင်းရဲ့ အကျော်အမော်ခုံရွှမ်း တံခါးပိတ်ကျင့်ကြံရာက ထွက်လာတဲ့အချိန်ကစပြီး မဟာနတ္ထိဘုရားကျောင်းက လောကီရေးရာအပေါ် သူတို့ရဲ့သဘောထားက ပြောင်းလဲသွားတာပဲ။ သူတို့ကိုယ်သူတို့ လူအားလုံးကို ဘေးအန္တရာယ်ကနေ ကယ်ဆယ်နိုင်တယ်ဆိုပြီး ဂုဏ်ဝင့်နေကြတာ။ ကောင်းကင်ရွေးချယ်ခံ ဘုရားကျောင်းနဲ့ မဟာနတ္ထိဘုရားကျောင်းက တစ်ယောက်အရေးကိစ္စ တစ်ယောက် ဘယ်တုန်းကမှ ဝင်မစွက်ဖက်ဖူးဘူး။ ဒါပေမဲ့” သူက ဆက်မပြောခင် ခဏရပ်လိုက်လေ၏။