"မြူးကြွတဲ့ တေးသံပျံ့လွင်လို့နေ ကူးပြောင်းစ တန်ခူးလေမှာ တစ်ယောက်တစ်လှည့်မို့ လှမ်းကာ ဖျန်းပက်ကြစဉ်...ပိတောက်ဖူးလေးတွေပန်ဆင်ထားသူရေ....."
သင်္ကြန်မင်းသားကြီးဟု တင်စားခေါ်ဝေါ်ခံရလောက်အောင်ပင် သင်္ကြန်သီချင်းများသီဆိုခဲ့သူ အဆိုတော်ကြီး ဇော်ဝမ်း၏ သင်္ကြန်မိုးသီချင်းသံကို အိမ်ရှေ့ကွပ်ပျစ်ပေါ်မှ ရေဒီယိုလေးမှ တစ်ဆင့်အတိုင်းသား ကြားနေရလေသည်။
ဘာလိုလိုနှင့် သင်္ကြန်အကြိုနေ့တောင် ရောက်ပါပကောလား။ သင်္ကြန်ဆိုသည်မှာ မြန်မာတို့၏ နှစ်သစ်ကူးပွဲတော်လည်းဖြစ်သည်။ မြန်မာ့ယဉ်ကျေးမှုအရ နှစ်ဟောင်းမှအညစ်အကြေးများကို နှစ်သစ်ကူးပြောင်းသော အတာသင်္ကြန်တွင် ရေပက်ဖျန်းကာ အညစ်အကြေးများ ဆေးကြောကြသည်ဟု အမေပြောပြဖူးလေသည်။
ဒီနှစ် သင်္ကြန်ကျတာ မြန်ဆန်လွန်းသည်ဟု နောင်ရိုး ထင်မိသည်။ အင်းလေ အရင်နှစ်တွေကဆို နွေကျောင်းပိတ်ရက်ဆို အကြာကြီးနေရသေးတယ်။ခုက ဆယ်တန်းစာမေးပွဲဖြေပြီးတာနှင့် ဘယ်လောက်မှ မကြာလိုက် သင်္ကြန်ရောက်သွားရော။
"သားရေ မပြီးသေးဘူးလား.."
အိမ်ရှေ့မှ အမေ၏ အော်ပြောသံကြောင့် နောင်ရိုးသစ်အတွေးလေးတစ်ချို့သည် ချက်ချင်းပင် ရေငွေ့လို ပျောက်ပြယ်သွားလေသည်။ သင်္ကြန်အကြိုနေ့မှာ ရေမကစားတော့ပဲ အမေတို့ ဦးလေးတို့နှင့်အတူ ဥပုသ်စောင့်လိုက်မည်ဟု ပြောထားသောကြောင့် အတော်ကြာနေသော နောင်ရိုး သတိပေးခံလိုက်ရခြင်းဖြစ်သည်။
"လာပြီ အမေ.."
နောင်ရိုးသစ် ပါးစပ်ကသာ လာပြီဟု အလွယ်ပြောလိုက်ရပေမယ့် ခုထိ အင်္ကျီမလဲရသေး။ ထို့ကြောင့် မနေ့ကတည်းက ကော့ပြန်နေအောင် မီးပူတိုက်ထားသည့် စတစ်အင်္ကျီလက်ရှည်အဖြူလေးအား ရွေးဝတ်လိုက်သည်။ ထို့နောက် ပုဆိုးအကွက်နုတ်လေးအား သပ်ရပ်စွာ ဝတ်ရင်း
အိမ်ရှေ့သို့ ထွက်လာခဲ့လိုက်သည်။
"ပြီးပြီ အမေ သွားရအောင်"
"အမလေးတော် ထွက်လာတော့လည်း ဒီပုံပါပဲ"
YOU ARE READING
ခွင့် (Unicode+Zawgyi)
Romanceတစ်ဘဝစာဖြစ်ဖြစ်၊ တစ်ခဏတာဖြစ်ဖြစ် အသက်ရှင်သန်ကျန်ရှိနေတဲ့ တစ်လျှောက်လုံး ချစ်ရသူ အနားမှာပဲ နေခွင့်ရချင်တယ်။
