ကြမ္မာ ခုနစ်လီ

အခန်း (၂၀)

Burmese Translation of Seven Unfortunate Lifetimes, All Thanks to a Single Moment of Impulse by Jiu Lu Fei Xiang.

Translator - No Cause, Jinnie Grace

အခန်း (၂၀)
___________

ငါ မျက်​လုံးဖွင့်​လိုက်​ပြီးနောက်​သိလိုက်​ရတာက ဒီလောကကြီးဟာ အရင်​တုန်းက လောကတွေနဲ့ မတူနေသလိုပဲ။ အံ့သြဖို့ကောင်းတာက ငါ့အမြင်​အာရုံက သိပ်​ထက်​မြက်​နေတယ်​။ ဟိုးအဝေးကြီးကိုတောင်​ ငါ့နားလေးတင်​ရှိနေသလို မြင်​နေရတာ။ အနံ့ခံအာရုံလဲ စူးရှလာတယ်။ မြေနံ့၊ မြက်​နံ့... ပြီးတော့ လောလောဆယ်​မှာ တစ်​ခုခု မသင်္ကာစရာ ခံစားမိသလိုပဲ။ 

ငါ မျက်​တောင်​ခတ်​လိုက်​တယ်​။ ခန္ဓာကိုယ်​က တစ်​မျိုးကြီးပဲ။ ငါ ခြေတွေ ယိမ်းယိုင်​လျက်​က ထရပ်​ဖို့ ကြိုးစားမိတယ်​။ ဒါပေမဲ့ ခြေနှစ်​ချောင်းဖြစ်​ရမဲ့အစား ခြေလေးချောင်းရှိနေလေတယ်​။ အမွှေးပွပွ ခြေသည်းလေးတွေနဲ့ ခြေခုံ လေးဘက်။ ငါ ငါ့"လက်​"တွေကို အနီးကပ်​မြှောက်​ကြည့်​လိုက်​တော့ မြင်​လိုက်​ရတာက လန့်​စရာကြီး။ ဒါ... ငါ မမှားဘူးဆိုရင်​၊ ဒီသတ္တဝါကို ကျားလို့ခေါ်တာပဲ။ ငါ နောက်​ပြန်​လှည့်​ကြည့်​တယ်​။ နောက်​မှာ ရှိနေခဲ့တာက ရှည်​လျားတဲ့ ခန္ဓာ၊ သားမွှေးဖုံးနေတဲ့ တင်​ပါးနဲ့ လှပတဲ့ စင်းကျားတွေပါတဲ့ အမြီးရှည်​တစ်​ချောင်း။

ငါ တော်​တော်​လန့်​သွားမိတော့တယ်​။ နောက်​တော့မှ မှတ်​ဉာဏ်​တွေ တဖြည်းဖြည်း ပြန်​ရလာတယ်​။ သြော်​... ငါ တိရိစ္ဆာန်​ဘုံတွင်းထဲ ကျပြီး ဝင်​စားတာပဲ။ အံ့သြစရာလား၊ တိရိစ္ဆာန်​အဖြစ်​မွေးဖွားလာတာ။

တိရစ္ဆာန်​တဲ့...!

ငါ့ဖဝါးတွေ ကြားထဲ မျက်​နှာ အပ်​ထားလိုက်​မိတော့တယ်​။

အနစ်​နာကြီးလိုက်​တာဟာ... တော်​တော်​ထိခိုက်​သွားရတာပဲ...!

ငါလို တိမ်​နတ်​သမီးဆိုတဲ့ မြင့်​မြတ်​တဲ့ တည်​ရှိမှုက ဒီအခြေအနေထိ နိမ့်​ဆင်းသွားရတယ်​လို့...! ခါးသက်​သက်​မျက်​ရည်​တွေကိုသာ မျိုသိပ်​ထားလိုက်​ရလေတယ်​။ ငါ ရင်​တွေကွဲ၊ ကြေကွဲဝမ်းနည်းနေလည်း တိရစ္ဆာန်​ဘုံမှာ ဝင်​စားရတယ်​ဆိုတဲ့ အဖြစ်​ကို ပြောင်းလဲပစ်​နိုင်​တော့မှာမှ မဟုတ်​တာ။ ဒါပေမဲ့လည်း ငါ စိတ်​နှလုံးကတော့ မသာမယာဖြစ်​မိတာပါပဲ။ ရက်​ပေါင်းများစွာ ငေါင်​တောင်​တောင်​တွေ ဖြစ်​လို့။ စိတ်​အချဉ်​ပေါက်​တယ်​နော်​။ နောက်​တော့မှ ငါ သတိရလာတယ်​။ ချူခုန်းလည်းပဲ တိရစ္ဆာန်​ဖြစ်​ရမှာပဲ၊ ခြေလေးချောင်းသတ္တဝါဖြစ်​မှာပဲဆိုတာကို။ ဒီတော့မှ ငါ့စိတ်​ထဲ နေသာထိုင်​သာရှိတော့တယ်​။