ငါးဆားနယ်လေးက ကမ္ဘာပျက်ကပ်စာအုပ်ထဲ ကူးပြောင်းသွားတယ် (ဘာသာပြန်)

၁

Unicode

ပျားပန်းခတ်နေသည့် စူပါမားကတ်အတွင်းမှ စျေးဝယ်သူများက စျေးဝယ်နေခြင်းကို ရုတ်တရက် ရပ်တန့်လိုက်ပြီး စျေးဝယ်တွန်းလှည်းကို တွန်းလာသည့် မိန်းကလေးအား အံ့အားသင့်စွာ ကြည့်လိုက်ကြသည်။

သူမက အသက်နှစ်ဆယ် အစောပိုင်းခန့်သာ ရှိသေးပြီး အလွန်လှပသည့် အပြာရောင်အားကစားဝတ်စုံကို ဝတ်ဆင်ထားကာ ဆံနွယ်များကို ခေါင်းနောက်တွင်စုကာ ပိုနီတေးလ်စတိုင်လ် ချည်ထားခဲ့သည်။

သူမ၏ လက်မောင်းလေးများက အားအနည်းငယ် ထည့်လိုက်လျှင်ပင် ကျိုးသွားတော့မတတ် ပိန်ပါးလှသော်လည်း သူမရှေ့ရှိ လှည်းပေါ်မှ ပစ္စည်းအပုံလိုက်က သူမ ခေါင်းထက်ပင် မြင့်မားနေခဲ့ပြီဖြစ်သည်။

ဘီစကစ်များ၊ ခေါက်ဆွဲခြောက်များနှင့် ဖျော်ရည်များ... သူမက စူပါမားကတ်အတွင်းရှိ စားသောက်စရာများအားလုံးကို ဝယ်ယူနေပုံရလေသည်။

ထိုမိန်းကလေးက လူတိုင်း၏ အကြည့်များကို သတိပြုမိသည့်အခါ ရှက်ကိုးရှက်ကန်းနှင့် ရယ်မောလိုက်သည်။

"ကျွန်မတို့ အိမ်မှာ မိသားစုဝင်တွေ အရမ်းများလို့လေ။ အဲဒါကြောင့် အများကြီး စားကြတာ။ ဟားဟား... ကျေးဇူးပြုပြီး ကျွန်မကို လမ်းနည်းနည်းလောက် ဖယ်ပေးနိုင်မလား။"

လူအများက သူမအတွက် အလျင်အမြန် လမ်းဖယ်ပေးလိုက်ကြပြီး သူမက အမြင့်အတူတူခန့်ရှိသည့် တွန်းလှည်းသုံးခု ရှိနေသော ငွေရှင်းကောင်တာဆီသို့ တွန်းလှည်းကို တွန်းသွားခဲ့သည်။

ယခု လူတိုင်းက ပို၍ပင် အံ့အားသင့်သွားကြသည်။

သူတို့၏ မိသားစုက မည်မျှကြီး၍ သူမက ထိုကဲ့သို့ များပြားလှသော အစားအသောက်များကို တစ်ထိုင်တည်း ဝယ်ယူရပါသနည်း။

သို့သော် ထိုမိန်းကလေးက မရပ်တန့်သေးပေ။ သူမက လက်ထဲမှ တွန်းလှည်းကို နေရာချပြီးနောက် ချက်ချင်းပင် တွန်းလှည်းအလွတ်တစ်ခုကို ယူဆောင်ကာ စင်များရှိရာဘက်သို့ တွန်းသွားခဲ့ပြီး ရပ်တန့်ခြင်းမရှိဘဲ အစားအစာများကို တွန်းလှည်းထဲ ဆက်လက်ထည့်နေခဲ့သည်။