ငါးဆားနယ်လေးက ကမ္ဘာပျက်ကပ်စာအုပ်ထဲ ကူးပြောင်းသွားတယ် (ဘာသာပြန်)

၂၅

Unicode

ငွေရှင်းကောင်တာ၏ ဘေးတွင် စင်သုံးခုရှိပြီး စင်တစ်ခုတွင် ပရိုမိုးရှင်းပေးထားသည့် ကိုလာ၊ နွားနို့၊ ဖျော်ရည်နှင့် အခြားသောက်စရာများဖြင့် ပြည့်နေသည်။ 

နောက်တစ်စင်တွင် နေ့စဥ်လိုအပ်သည့် ပစ္စည်းများဖြစ်သော သွားတိုက်ဆေး၊ ခေါင်းလျှော်ရည်၊ ရေချိုးဂျယ်လ်ကဲ့သို့သော ပစ္စည်းများရှိ၏။

နောက်ဆုံးတစ်ခုမှာ ဒစ်စကောင့်ချထားသည့် ပေါင်မုန့်များရှိနေသော နေရာဖြစ်ပြီး ထိုနေရာ၌ ပေါင်မုန့်အိတ်များစွာ ရှိလေသည်။

ကျန်းမြောင်မြောင်က ဒိန်ချဥ်သောက်ချင်သော်လည်း ၎င်းကို သယ်ရန်မှာ အလွန် လေးလံလှသောကြောင့် ပြတ်ပြတ်သားသား လက်လျှော့လိုက်ရသည်။ သူမက နေ့စဉ်လိုအပ်သည့် ပစ္စည်းများထားသည့်နေရာမှ သွားတိုက်ဆေးအချို့၊ ခေါင်းလျှော်ရည်ဘူးနှင့် ရေချိုးဂျယ်လ်တို့ကို ယူလိုက်ပြီး သူမ၏ အင်အားအများစုကို ပေါင်မုန့်တွေသယ်ရာ၌ အသုံးပြုလိုက်တော့သည်။

သက်တမ်းတိုသည့် လတ်ဆတ်သော ပေါင်မုန့်များက မှိုတက်နေခဲ့ပြီ ဖြစ်သော်လည်း တာ့လီဥယျာဥ်မှ နူးညံ့သော ပေါင်မုန့်များက စား၍ရနေဆဲ ဖြစ်သည်။

ကျန်းမြောင်မြောင်က ၎င်းတို့ကို ကောက်ကာ သူမ၏ ခြင်းတောင်းထဲ ထည့်ခဲ့ပြီးနောက် သူမက လာကူညီရန် လုချီမင်ကို အသံတိုးတိုးနှင့် ခေါ်လိုက်သည်။

လုချီမင်က ပြန်မဖြေခဲ့ပေ။ သူမက ပြန်လှည့်ကြည့်လိုက်ပြီး အေးခဲသွား၏။

သူ ဘယ်မှာလဲ။ သူအခုလေးတင် ဒီမှာ ရှိနေတာ မဟုတ်ဘူးလား။

"လုချီမင်...."

ကျန်းမြောင်မြောင်က သူ့ကို ခပ်တိုးတိုးခေါ်လိုက်ပြီး ရှေ့သို့ နှစ်လှမ်းလောက် လျှောက်လိုက်သည်။ သူမ ခြေထောက်​အောက်၌ တစ်စုံတစ်ခု ရှိနေပုံရသည်။

သူမ ငုံ့ကြည့်လိုက်သည့်အခါ သွေးရောင်နီရဲနေသည့် မျက်လုံးတစ်စုံကို မြင်လိုက်ရပြီး ကြောက်ရွံ့မှုကြောင့် အော်ဟစ်မိလုမတတ် ဖြစ်သွားခဲ့သည်။