ငါးဆားနယ်လေးက ကမ္ဘာပျက်ကပ်စာအုပ်ထဲ ကူးပြောင်းသွားတယ် (ဘာသာပြန်)

၂

Unicode

သူမတွင် ပိုက်ဆံသိပ်မရှိသည့်အတွက် အစားအသောက်များကိုသာ အရင်ဆုံး ဝယ်ယူသိုလှောင်ထားနိုင်ပြီး ပစ္စည်းပစ္စယများများစားစား မရှိပေ။

သို့သော် မည်သို့ပင်ဖြစ်စေ သူမက အချိန်အကြာကြီး အသက်ရှင်နိုင်ရန် စီစဥ်မထားဘဲ သူမ၏ သေခြင်းက မည်သည့်အချိန်တွင် ကျရောက်လာမည်လဲ သေချာမသိပေ။ ဆယ်စုနှစ်တစ်ခုစာဖြစ်စေ နှစ်ရာချီ၍ဖြစ်စေ အသက်ရှင်ရသည်မှာ မည်သည့် ကွာခြားမှုမှ မရှိပုံရလေသည်။

ညအချိန်တွင် မီးစက်နှင့် ရေသန့်တို့ လာရောက်ပို့ဆောင်ခဲ့ကြသည်။

ကျန်းမြောင်မြောင်သည် ဆိုင်ရှင်ကို သူမအား မီးစက်အသုံးပြုပုံသင်ပေးရန် တောင်းဆိုခဲ့သည်။ သူမသည် မီးစက်က အလုပ်လုပ်ရန် ဆီဖြည့်ဖို့ရာလိုအပ်ကြောင်း သင်ယူခဲ့ပြီး အနီးရှိ လောင်စာဆီဆိုင်သို့ သွားကာ ဒီဇယ်စည်အနည်းငယ် ဝယ်ယူခဲ့သည်။

မြေအောက်ခန်းက ပစ္စည်းများ ပြည့်နေပြီဖြစ်သောကြောင့် ဧည့်ခန်းကို သန့်ရှင်းရေးလုပ်ခဲ့သည်။ ဆိုဖာနှင့် ကော်ဖီစားပွဲတို့ကို ကပ်ရပ်ထားလိုက်သည်။ ပုံးများကို နံရံတွင် ကပ်ကာထပ်စီထားပြီး ၎င်းတို့က ဧည့်ခန်းတစ်ဝက်ကို နေရာယူသွား၏။

အရာအားလုံးပြီးသွားသည့်အခါ ညလယ်ခေါင်သို့ ရောက်သွားခဲ့ပြီ ဖြစ်သည်။

ကျန်းမြောင်မြောင်က သူမအတွက် ဘာဘီကျူးအခုသုံးရာကျော် မှာယူခဲ့၏။ ယနေ့ပြီးနောက် သူမက နောက်ထပ် မည်သည့်အခါမှ ထိုကဲ့သို့ စားသောက်နိုင်လိမ့်တော့မည် မဟုတ်ပေ။

သူမ ဘာဘီကျူး စားပြီးသည့်အခါ ဖုန်းမှ Live လွှင့်သည့် App ကို ဖွင့်ကာ သူမ Acc သို့ ဝင်လိုက်သည်။

သူမသည် လွန်ခဲ့သော သုံးရက်က ဤစာအုပ်ထဲ ကူးပြောင်းလာခဲ့ပြီး Live လွှင့်သည့် ပလက်ဖောင်းတွင် Acc တစ်ခု မှတ်ပုံတင်ခဲ့ကာ ကမ္ဘာပျက်ကပ်အတွက် မည်သည့် ပစ္စည်းများ ကြိုတင်စုဆောင်းသင့်ကြောင်း ပြောပြခဲ့သည်။