အခန်း (၂၁၈) - အိုး... သနားစရာ Duchess Capet (၁)
စာရေးသူ - Zhái Miāo (宅喵)
ဘာသာပြန်သူ - No Noe ( Miracle_Phyu97)
ကျန်းယာ့ကောရဲ့ ခန္ဓာကိုယ်ဟာ အနည်းငယ် ယိမ်းယိုင်သွားကာ တုန်လှုပ်သွားပုံရသည်။ "ရှင့်စကားတွေ ရပ်လိုက်ပါ။ ရှင် ကျွန်မကို စွပ်စွဲပြောဆိုနိုင်ပေမယ့် ကြွယ်မင်ကိုတော့ မစွပ်စွဲသင့်ဘူး။"
ဖန့်ကြွယ်မင်သည် သူမရဲ့ သေးသွယ်သော ခန္ဓာကိုယ်လေးကို အမြန်ဖေးမလိုက်သည်။ ခန့်ညားချောမောသော အမျိုးသားနှင့် မိန်းမချောလေးတို့ဟာ တစ်ဦးနှင့် တစ်ဦး ဘေးချင်းယှဥ်ရပ်နေပုံမှာ သူတို့ကို ကောင်းကင်ဘုံမှ တွဲဖက်ပေးထားသည့် စုံတွဲတွေအတိုင်း လိုက်ဖက်လွန်းလှသည်။
ထိုမြင်ကွင်းက လီရှစ်ကျီကို အလွန်ဒေါသထွက်စေကာ သူ့မျက်လုံးတွေကို နီရဲသွားစေသည်။ သူသည် ကျန်းယာ့ကောအတွက် အရာအားလုံးကို စွန့်လွှတ်ခဲ့ပြီး ဒါက သူပြန်ရတဲ့ အရာတဲ့လား။
သူ့ဦးနှောက်ထဲ ဒေါသအထွက်လွန်ပြီး ခေါင်းပူလာသည်နှင့်အမျှ ဖန့်ကြွယ်မင်ကို နပန်းပြေးလုံးခဲ့သည်။ ဖန့်ကြွယ်မင်သည် ပုံမှန်လေ့ကျင့်ခန်း ပြုလုပ်သည့် အလေ့အကျင့်ရှိသူဖြစ်ပြီး အတိုက်အခိုက် ကျွမ်းကျင်သည်။ လီရှစ်ကျီသည် ငယ်ရွယ်ပြီး သန်မာသောကြောင့် သူတို့နှစ်ဦးရဲ့ တိုက်ခိုက်မှုများဟာ ညီတူညီမျှ ဖြစ်ခဲ့သည်။ သို့သော် ကျန်းယာ့ကောအတွက်မူ ကံဆိုးသွားခဲ့သည်။ သူမသည် အရှေ့သို့တက်ပြီး သူတို့နှစ်ဦး ရန်ဖြစ်နေတာကို ပြန်ဖြေပေးချင်ခဲ့သည်။ သူမကြောင့် ခန့်ညားချောမောသော အမျိုးသားနှစ်ယောက် ရန်ဖြစ်နေသည့်အတွက် သူမစိတ်အတွင်းမှာ ကျေနပ်နေမိသော်လည်း သူတို့နှစ်ဦးထဲမှ တစ်ဦး ဒဏ်ရာရရှိသွားမှာကို မမြင်ချင်ပေ။
ကံမကောင်းစွာဖြင့် သူမသည် အရေးကြီးသော အချိန်မှာ ရှေ့တက်သွားမိသည်။ လီရှစ်ကျီသည် ဖန့်ကြွယ်မင်ရဲ့ မျက်နှာကို ဝှိုက်လက်သီး ကျွေးလိုက်ချိန်တွင် ဖန့်ကြွယ်မင်က ရှောင်လိုက်သည်။ လီရှစ်ကျီသည် အရှိန်လွန်သွားသော သူ့လက်သီးကို အချိန်မီ ပြန်သိမ်းနိုင်ခြင်း မရှိသောကြောင့် သူ့လက်သီးချက်သည် ကျန်းယာ့ကောရဲ့ မျက်နှာပေါ်သို့ ကျဆင်းသွားခဲ့သည်။
