Worship Me, I Can Make You Rich (Myanmar Translation) U+Z (Complete)

Chapter 3 (U+Z)

-Unicode-

အခန်း ၃: မင်းအဖေကို မေ့နေခဲ့ပြီ

ဝမ်ရှောင်းယွင်ရဲ့ ရှုပ်ထွေးနေတဲ့ အကြည့်အောက်မှာ ကျွမ်းကျိုးဟာ ခေါင်းမာမာနဲ့ပဲ "ငါက အရမ်းပုံမှန်ပဲ၊ ဒါကို ထူးဆန်းတယ်လို့ထင်ရင် ခင်ဗျားကသာ ပုံမှန်မဟုတ်တဲ့လူပဲ" ဆိုတဲ့ ပုံဖမ်းလိုက်ပြီးတော့ အမွှေးတိုင်ကို အမွှေးတိုင်ထွန်းတဲ့အိုးထဲ တိတ်တိတ်လေး စိုက်လိုက်တယ်။

ပူဇော်တဲ့အမှုကိစ္စတော့ ပြီးသွားပြီ။

ကျွမ်းကျိုးက သူနဲ့ 'အချိုရည်' ကြားမှာ ဆက်နွယ်မှုကို ရေးရေးလေး ခံစားလိုက်ရတယ်။

နောက်ဆုံးမှာ စိတ်အေးသွားသလို အသက်ရှုထုတ်လိုက်ပြီးတဲ့နောက် ဝမ်ရှောင်းယွင်ကို ပြုံးပြလိုက်တယ်။ ဒါပေမဲ့လည်း သူက နည်းနည်း ရှက်နေသေးတာမို့ သူ့အသံက ခြောက်ကပ်နေတယ်။ "ဆိုတော့... ခင်ဗျား၊ ခင်ဗျား ရောက်လာတာလား..."

ဝမ်ရှောင်းယွင်က ကျွမ်းကျိုးကို ဖျတ်ခနဲ လှမ်းကြည့်လိုက်တယ်။ အဲဒီနောက်မှာတော့ မြေပေါ်မှာ ချထားတဲ့ နတ်ဘုရားပုံတော်ဆီကို ထပ်ပြီး အကြည့်ရောက်သွားတယ်။

ဝမ်ရှောင်းယွင်ရဲ့ မျက်လုံးထဲမှာ ကြယ်အစုအဝေးကလူတွေဟာ ယုံကြည်ကိုးကွယ်တဲ့အရာရယ်လို့ မရှိကြဘူး။ သူတို့က လက်ရုံးရည်ကိုပဲ ကြည်ညိုကြတယ်။

ခွန်အားအကြီးဆုံးလူက သူတို့ နှလုံးသားတွေထဲမှာ စံနမူနာထားပြီး ကိုးကွယ်တဲ့လူပဲ။

အဲဒါကြောင့် သူက နတ်ဘုရားပုံတော်ကိုတွေ့တော့ သူ့စိတ်ထဲမှာ ရုပ်ထုတစ်ခုလို့ပဲ ထင်လိုက်တယ်။

မြို့တော်ဂြိုလ်က အကြီးဆုံးပလာဇာမှာ သူ့အဖေရဲ့ ရုပ်ထုတစ်ရုပ်ရှိတယ်။ နေ့တိုင်းနေ့တိုင်း အင်ပါယာမြို့သူမြို့သားတွေဟာ စစ်ပွဲနတ်ဘုရား ဝမ်ထျန်းကို လေးစားအောက်မေ့တဲ့ သင်္ကေတတစ်ခုအနေနဲ့ ပန်းတွေလာထားတပ်ကြတယ်။

နောက်ပြီး လူငယ်လေး အခုလေးတင် အချိုရည်ကပ်နေတဲ့ ရုပ်ထုက တော်တော်လေး လက်တွေ့ကျပြီး အသက်ဝင်အောင် ထွင်းထုထားတယ်။ လူငယ်လေးကိုယ်တိုင်နဲ့ ၇၀ - ၈၀ ရာခိုင်နှုန်းလောက်ကို တူနေတယ်။