Worship Me, I Can Make You Rich (Myanmar Translation) U+Z (Complete)

Chapter 62 (U+Z)

-Unicode-

အခန်း ၆၂: တကယ်လို့ မင်းကို တစ်ယောက်ယောက် တားဆီးဖို့ ကြိုးစားရင် ချက်ချင်း တိုက်ပွဲဝင်ပစ်လိုက်! အရှုံးမပေးလိုက်နဲ့!

ရှောင်ဖော့လန် ကျွမ်းကျိုးကို တွေ့ရတဲ့အချိန်မှာ လေးရက်မြောက်နေ့ရဲ့ နေ့လယ်ခင်းတောင် ရောက်နေပြီ။

တစ်ရက်နဲ့ တစ်ညကြာသွားပြီဆိုပေမဲ့ ရှောင်ဖော့လန်ရဲ့ စိတ်လှုပ်ရှားမှုကို လျော့မသွားစေဘူး။ သူက ကျွမ်းကျိုးရှေ့မှာ ခပ်တည်တည်နဲ့ ရပ်လိုက်ပြီး သူဘယ်သူဘယ်ဝါဆိုတာကိုတောင် မပြောပြဘဲ အဲဒီမှာပဲ ရပ်ပြီး သူ့ကို ကြည့်နေတယ်။

ဘေးမှာတော့ ချန်ကျင့်ရွှယ်က တစ်ခုခုပြောချင်နေပေမဲ့ ရှောင်ဖော့လန် ကြိုပြီးသတိပေးထားတာကို သတိရပြီး သူ့စကားတွေကို ပြန်မျိုချလိုက်တယ်။

အဲဒါက ဝမ်ရှောင်းယွင်အဖို့ ရှောင်ဖော့လန်ကို ပထမဆုံး မြင်ရခြင်းပဲ။ လွန်ခဲ့တဲ့ ရက်အနည်းငယ် ကျွမ်းကျိုး အိပ်မောကျနေတဲ့အချိန်ကလည်း သူက အခန်းထဲက တစ်ခါမှ ထွက်မသွားခဲ့ဖူးဘူး။ သူက ရှောင်ဖော့လန် လူသားအဖြစ်ပြောင်းသွားတယ်ဆိုတာ သိပေမဲ့ ရှောင်ဖော့လန်ကို တစ်ခါမှ မမြင်ဖူးဘူး။

အဲဒါကြောင့် သူက အတော်လေး ချောတဲ့ကောင်လေးတစ်ယောက် ကျိုးကျိုးသွားနေတဲ့လမ်းကို ပိတ်ရပ်လိုက်တာကိုမြင်တော့ သူက မသိစိတ်အရ မျက်မှောင်ကြုတ်လိုက်ပြီး အေးတိအေးစက်နဲ့ မေးလိုက်တယ်၊ "မင်းက ဘယ်သူလဲ"

ဝမ်ရှောင်းယွင်ကိုယ်တိုင်တောင် သူ့ကို မမှတ်မိဘူးဆိုတာ မြင်လိုက်ရတော့ ရှောင်ဖော့လန်ရဲ့ နှုတ်ခမ်းက အနည်းငယ် တွန့်သွားပြီး နည်းနည်း စိတ်ကျေနပ်သွားသလို ဖြစ်နေတယ်။ အဲဒီနောက်တော့ ချက်ချင်း မျက်နှာပြန်ပြင်လိုက်ပြီးတော့ သခင့်ကိုပဲ ဆက်ပြီး ကြည့်နေလိုက်တယ်။

သူက စောင့်နေတယ်။ သခင်က "မင်းဘယ်သူလဲ" လို့မေးမှာကို စောင့်နေတယ်။

ပြီးရင် သူ့ သခင့်ကို ဟားတိုက်မယ်ပေါ့ - သခင် ကျွန်တော့်ကိုတောင် မမှတ်မိတော့ဘူး ဟားဟား!